ចេះរៀបចំខ្លួនតែ ៤ចំណុចនេះ មនុស្សស្រីនឹងមើលទៅស្អាត ហើយថ្លៃថ្នូរបំផុត

2018-08-17 01:00:00
ចំនួនមតិ 0 | ចំនួនចែករំលែក 0

ការចេះរៀបចំខ្លួនគឺជាចំណុចសំខាន់ណាស់សម្រាប់មនុស្សស្រី ជាពិសេសបើត្រូវចេញទៅក្រៅចូលសង្គមទៀត គឺកាន់តែត្រូវមើលទៅស្អាត ថ្លៃថ្នូរ ខ្ពង់ខ្ពស់។ ថ្លៃថ្នូរនៅត្រង់នេះ មិនមែនចង់ណែនាំឲ្យស្រីៗទៅទិញកាបូប សម្លៀកបំពាក់ថ្លៃៗ ប្រ៊េនៗមកស្លៀក ឬប្រើនោះទេ ប៉ុន្តែគឺចង់បានន័យថាការបង្កើតតម្លៃឲ្យខ្លួនឯងថ្លៃថ្នូរតែម្ដង។ មកស្វែងយល់ ៤ចំណុចសំខាន់ជាមួយកញ្ញាទាំងអស់គ្នា ថាតើធ្វើយ៉ាងណាខ្លះទើបក្លាយជាមនុស្សស្អាត ថ្លៃថ្នូរ៖

១. រៀបចំរូបសម្បត្តិឲ្យបានល្អ

ឥរិយាបថ និងរូបសម្បត្តិខាងក្រៅ មានសារសំខាន់សឹងតែគ្រប់ស្ថានការណ៍ មិនថាជាដំណើរដើរ ឈរ អង្គុយ គឺត្រូវមានភាពសង្រួម និងព្យាយាមហ្វឹកហាត់ឲ្យបានសមរម្យ។ តួយ៉ាង កាយវិការអង្គុយរបស់អ្នកក៏អាចធ្វើឲ្យអ្នកស្អាត ឬមិនស្អាតបានដែរ ហើយផ្ទៃមុខ ម៉ូដសក់ សម្លៀកបំពាក់ទៀតសោត គួរតែមានការរៀបចំឲ្យមានរបៀបរៀបរយ និងស៊ីគ្នាល្អជាមួយបុគ្គលិកលក្ខណៈរបស់អ្នក។

២. រៀបចំការគិតឲ្យបានល្អ

អ្នកនឹងក្លាយជាមនុស្សស្រីមានមន្តស្នេហ៍ភ្លាមៗ នៅពេលអ្នកបានបញ្ចេញគំនិតដែលវៃឆ្លាត គួរឲ្យចង់ស្ដាប់ មិនប៉ះពាល់ផ្លូវចិត្តអ្នកដទៃ និងមានប្រយោជន៍ដល់អ្នកនៅជុំវិញខ្លួន។ អ្វីដែលសំខាន់គឺត្រូវហ្វឹកហាត់គិតវិជ្ជមាន មានភាពចាស់ទុំ មិនឆេវឆាវ និងមានទស្សនៈល្អៗចំពោះបញ្ហា ក៏ដូចជាមនុស្សជុំវិញខ្លួន។

៣. រៀបចំចរិតឫកពាឲ្យបានល្អ

ការចេះរៀបចំចរិតឫកពាឲ្យបានល្អគឺជារឿងសំខាន់បំផុត។ ការធ្វើជាខ្លួនឯង ឬបញ្ចេញចរិតដើមរបស់ខ្លួននោះ គឺជារឿងល្អហើយ ប៉ុន្តែវាត្រូវកាត់បន្ថយខ្លះ នៅពេលយើងចូលក្នុងសង្គម។ សម្រាប់ការចេះរក្សាមារយាទ មិនថានៅក្នុងសង្គមប្រភេទណា បើយើងចេះរៀបចំខ្លួនឲ្យសមរម្យ ចេះគោរពអ្នកជុំវិញខ្លួន និងស្គាល់កាលៈទេសៈ អ្នកនឹងមើលទៅថ្លៃថ្នូរភ្លាម។

៤. រៀបចំពាក្យសម្ដីឲ្យបានល្អ

ការចេះនិយាយប្រកបដោយខ្លឹមសារ និងសិល្បៈ នឹងអាចទាក់យកអារម្មណ៍អ្នកស្ដាប់បាន។ ត្រូវនិយាយឲ្យមានភាពពីរោះពិសា មិនប្រើភាសាអសុរោះ ឬភាសាណាដែលមើលងាយ ចាក់ដោតអារម្មណ៍អ្នកដទៃ។

គ្រប់ចំណុចដែលរៀបរាប់ខាងលើនេះ សុទ្ធតែជាអ្វីដែលយើងអាចធ្វើទៅបាន ហើយបើអ្នកធ្វើបានគ្រប់ចំណុចហើយ អ្នកនឹងមើលទៅជាមនុស្សថ្លៃថ្នូរ និងទាក់ទាញ ៕

ចុចអាន៖

ប្រភព៖ rugyim ប្រែសម្រួល៖ ស្វាយ វ៉ាន់ថន