ប្រុសៗមិនបាច់ទាល់តែជាអ្នកមានទេ មានតែ៥ចំណុចនេះ ស្រីៗណាក៏ចង់រៀបការជាមួយ
- 2018-06-24 05:03:06
- ចំនួនមតិ 0 | ចំនួនចែករំលែក 0
ប្រុសៗមិនបាច់ទាល់តែជាអ្នកមានទេ មានតែ៥ចំណុចនេះ ស្រីៗណាក៏ចង់រៀបការជាមួយ
នៅពេលនៅជាយុវវ័យ ការមានសង្សារម្នាក់អាចមិនចាំបាច់គិតអ្វីច្រើនទេ គឺគ្រាន់តែនៅក្បែរគ្នាហើយមានក្ដីសុខគឺគ្រប់គ្រាន់។ ប៉ុន្តែនៅពេលអាយុកាន់តែច្រើន ពេលដែលត្រូវគិតគូររឿងរៀបការ រឿងងាយៗនេះនឹងក្លាយជារឿងលំបាក។ ចង់ដឹងអត់ថា បុរសបែបណាដែលនារីចង់រៀបការជាមួយ? តាមដានជាមួយកញ្ញាខាងក្រោមនេះ៖
១. មិនមានចរិតព្រាន
អ្នកណាទៅ ចង់បានមនុស្សមានចរិតផិតក្បត់ជាស្វាមី បើដឹងហើយនៅតែរៀបការជាមួយទៀតគឺមានតែនាំរឿងមកឈឺក្បាលតែប៉ុណ្ណោះ។ មនុស្សស្រីមួយរយទាំងមួយរយចង់បានបុរសដែលស្មោះត្រង់នឹងខ្លួន ស្រលាញ់នាងតែម្នាក់ និងមានចិត្តនឹងនរគ្រប់គ្រាន់ មិនងាយមានអារម្មណ៍ផ្ដេសផ្ដាសជាមួយស្រីផ្សេង។
២. មិនប៉ះពាល់ល្បែងភ្នាល់ ស្រា បារី
បុរសខ្លះមុខមាត់ស្អាតបាត ប៉ុន្តែមានគុណវិបត្តិត្រង់ចំណុចនេះ ក៏ធ្វើឲ្យមនុស្សស្រីពិបាកនឹងទទួលយកដែរ។ អ្វីដែលសំខាន់បំផុតនោះគឺរឿងសុខភាពទៅអនាគត បើរៀបការមានកូនមានចៅជាមួយគ្នា ប៉ុន្តែត្រូវមករវល់ព្យាបាលជំងឺដែលកើតមានដោយសារការផឹក ការជក់ ឬរកលុយបានក៏ត្រូវយកទៅដោះបំណុលដោយសារល្បែងបែបនេះ គឺប្រាកដជាមិនមែនរឿងល្អឡើង។
៣. ស្រលាញ់គ្រួសារ
មនុស្សស្រីរៀបការហើយគឺមានតែគ្រួសារនេះហើយដែលជាទ្រព្យសំខាន់បំផុតរបស់នាង ដូច្នេះនាងក៏ចង់បានបុរសដែលអាចផ្ដល់ភាពកក់ក្ដៅ និងមានទំនួលខុសត្រូវខ្ពស់លើគ្រួសារដែរ។ បុរសដែលចេះគិតគូរពីអនាគតគ្រួសារ ចេះព្រួយបារម្ភពីសុខទុក្ខ មានពេលវេលាគ្រប់គ្រាន់សម្រាប់ប្រពន្ធកូន ក៏ដូចជាឪពុកម្ដាយ តែងតែជាក្ដីប្រាថ្នារបស់នារីគ្រប់គ្នា។
៤. មានមុខរបរ ការងារច្បាស់លាស់
ប្រាកដណាស់ លុយមិនអាចទិញសេចក្ដីស្នេហាបានទេ ប៉ុន្តែសេចក្ដីស្នេហាចាំបាច់ត្រូវចាយលុយ។ មនុស្សប្រុសដែលមនុស្សស្រីចង់រៀបការជាមួយមិនចាំបាច់ទាល់តែជាអ្នកមាន ឬសេដ្ឋីមកពីណានោះទេ គឺគ្រាន់តែជាមនុស្សដែលមានគំនិតរកស៊ី ធ្វើការរកលុយ មិននាំភាពក្ដៅក្រហាយឲ្យគ្រួសារ និងចេះសន្សំប្រាក់ទុកប្រើពេលមានអាសន្ននានាគឺបានហើយ។
៥. មានភាពចាស់ទុំ
រឿងនេះសំខាន់ខ្លាំងណាស់។ មនុស្សប្រុសមួយចំនួនហាក់មិនទាន់ក្លាយជាមនុស្សចាស់ទុំ ឬដឹងក្ដីទាល់តែសោះ ដោយនៅតែឲ្យឪពុកម្ដាយសម្រេចចិត្តឲ្យគ្រប់រឿង សូម្បីតែរឿងស្នេហា។ បើគេមិនទាន់ហ៊ានសម្រេចចិត្ត អារកាត់រឿងអ្វីដោយខ្លួនឯង គ្មានភាពជាអ្នកដឹកនាំ ឬលក្ខណៈសម្បត្តិជាមេគ្រួសារទេ អនាគតគឺពិបាករស់នៅជាមួយគ្នាណាស់ ៕
ចុចអាន៖
ចង់ឲ្យប្រពន្ធសប្បាយចិត្ត និងមានសុភមង្គល មិនមែនជារឿងលំបាកនោះទេ
អនាគតកូនក្រមុំម្នាក់ៗ គួរតែមានច្បាប់ទាំង ៥ នេះ ទុកត្រៀមសម្រាប់ថ្ងៃរៀបការ