ដើម្បីសុវត្ថិភាព និងកិត្តិយសផ្ទាល់ខ្លួន ស្រីៗមិនគួរផុស ៥យ៉ាងនេះលើហ្វេសប៊ុកឡើយ
- 2017-11-01 09:51:16
- ចំនួនមតិ 0 | ចំនួនចែករំលែក 0
ដើម្បីសុវត្ថិភាព និងកិត្តិយសផ្ទាល់ខ្លួន ស្រីៗមិនគួរផុស ៥យ៉ាងនេះលើហ្វេសប៊ុកឡើយ
បច្ចុប្បន្ននេះ អ្នកណាៗក៏ប្រើបណ្ដាញសង្គមដើម្បីជាការទាក់ទង និងអាប់ឌែតព័ត៌មាននានាជាមួយមិត្តភ័ក្ដិ និងអ្នកស្គាល់គ្នាទាំងឡាយ ដោយសារវាផ្ដល់ភាពងាយស្រួលច្រើន។ តែដោយសារភាពងាយស្រួលនេះហើយ ទើបធ្វើឲ្យមនុស្សជាច្រើនភ្លេចគិតថាអ្វីដែលបានបង្ហោះជាសាធារណៈនឹងអាចផ្ដល់ផលអាក្រក់មកលើខ្លួនវិញនៅពេលក្រោយ។ ដូច្នេះហើយថ្ងៃនេះ កញ្ញា សូមណែនាំរឿងរ៉ាវចំនួន ៦ដែលអ្នកមិនគួរបង្ហោះលើបណ្ដាញសង្គមនានា ដូចជា Facebook, Instagram ឬ Twiter ជាដើម។
១. ផុសជេរអ្នកដទៃ
ការជេរត្មះតិះដៀលអ្នកដទៃតាមបណ្ដាញសង្គម គឺជារឿងមិនគួរធ្វើសោះឡើយ ព្រោះវាប៉ះពាល់ខ្លាំងដល់កិត្តិយស និងផ្លូវចិត្តអ្នកដែលយើងជេរ នាំឲ្យបញ្ហាកើតឡើងមិនចេះចប់ ថែមទាំងធ្វើឲ្យមនុស្សដទៃៗនៅលើបណ្ដាញសង្គមមើលមកយើងក្នុងផ្លូវមិនល្អថែមទៀត។ ថាមិនត្រូវ វាក៏អាចប៉ះពាល់ដល់ការងាររបស់អ្នកទៀត ក្នុងករណីមេ ឬមិត្តរួមការងាររបស់អ្នកបានឃើញពាក្យអសុរោះទាំងអស់នោះចេញពី Status របស់អ្នក។
២. បង្ហោះរូបសិចស៊ីជ្រុល
ការបង្ហោះរូបសិចស៊ីជ្រុលរបស់ខ្លួន ក៏មិនមែនជារឿងគួរធ្វើដែរ ព្រោះក្រៅពីធ្វើឲ្យ image របស់អ្នកក្លាយជាមិនល្អក្នុងខ្សែភ្នែកអ្នកដទៃហើយ វាក៏មិនល្អបើសិនជាមេនៅកន្លែងការងារបានឃើញ។ កាន់តែគ្រោះថ្នាក់ទៀត បើមានមនុស្សរោគចិត្តមួយចំនួនបានឃើញហើយព្យាយាមស្រាវជ្រាវព័ត៌មានលម្អិតពីខ្លួនអ្នកដើម្បីប៉ុនប៉ងធ្វើរឿងអាក្រក់ ឬយករូបរបស់អ្នកទៅប្រើប្រាស់ក្នុងផ្លូវមិនល្អ។
៣. បង្ហោះរូបសម្ញែងទ្រព្យផ្សេងៗ
ការបង្ហោះរូបរបស់មានតម្លៃដូចជា លុយ ឬមាសពេជ្រផ្សេងៗ មិនមែនជារឿងខុសនោះទេ ប៉ុន្តែវានាំភ័យអន្តរាយមកកាន់ខ្លួនអ្នកបាន ព្រោះសម័យនេះជនទុច្ចរិតលើបណ្ដាញសង្គមក៏មានមិនតិចនាក់ដែរ ដូចដែលធ្លាប់ឃើញតាមព័ត៌មានជាច្រើនស្រាប់។
៤. រូបភាពកំពុងផឹកស្រា ឬជក់បារី
អ្នកខ្លះអាចប្រកែកថាការផឹកការជក់គឺជារឿងធម្មតា ដែលអ្នកណាៗក៏ធ្លាប់ធ្វើ ប៉ុន្តែគួរយល់ថាការថតរូបខណៈដែលកំពុងផឹកគ្រឿងស្រវឹង ឬជក់បារីរួចយកមកបង្ហោះលើបណ្ដាញសង្គមនេះ មិនមែនជារឿងល្អទេ ព្រោះប្រសិនបើថ្ងៃណាមួយអ្នកនៅកន្លែងធ្វើការ ឬចៅហ្វាយនាយរបស់អ្នកឃើញ វានឹងធ្វើឲ្យកេរ្តិ៍ឈ្មោះរបស់អ្នកក្នុងវិស័យការងារត្រូវភ្ជាប់ជាមួយភាពអវិជ្ជមាន។
៥. ឆាត សន្ទនាផ្ទាល់ខ្លួន
ការ Screeshot ឆាតឆ្លើយឆ្លងក្នុងប្រអប់សារផ្ទាល់ខ្លួនមកបង្ហោះជាសាធារណៈ គឺជាការមិនផ្ដល់កិត្តិយសជាខ្លាំងចំពោះអ្នកដែលអ្នកបានឆាតជាមួយ គឺដូចជាការយករឿងសម្ងាត់ៗមកទម្លាយជាសាធារណៈដូច្នោះដែរ ព្រោះពេលខ្លះអ្នកដែលយើងឆាតជាមួយមិនប្រាកដថាចង់បង្ហាញរឿងរ៉ាវដែលនិយាយជាមួយអ្នកឲ្យអ្នកដទៃបានដឹងនោះទេ លើកលែងតែគេអនុញ្ញាតឲ្យអ្នកផុសតែម្ដង។
រឿងមួយចំនួនដែលយើងមិនបានគិតថាជារឿងធំដុំ អាចនឹងត្រលប់មកសាងបញ្ហាធ្ងន់ធ្ងរមិនគួរឲ្យជឿបាន ដូច្នេះហើយនៅក្នុងបណ្ដាញសង្គមក៏ដោយក៏យើងត្រូវប្រយ័ត្នប្រយែង និងគោរពសិទ្ធិគ្នាឲ្យបានដូចក្នុងសង្គមពិតដែរ ៕