កំហុសធំបំផុតរបស់មនុស្សប្រុសគឺ គិតថាមនុស្សស្រីស្រលាញ់ហើយ គ្មានថ្ងៃចាកចេញ
- 2020-04-08 02:40:00
- ចំនួនមតិ 0 | ចំនួនចែករំលែក 0
កំហុសធំបំផុតរបស់មនុស្សប្រុសគឺ គិតថាមនុស្សស្រីស្រលាញ់ហើយ គ្មានថ្ងៃចាកចេញ
នៅលើលោកនេះ មនុស្សប្រុសត្រូវដឹងថា អ្វីដែលមានហើយ ក៏នឹងអាចចាកចេញនៅពេលណាមួយ ប្រសិនបើយើងមិនឲ្យតម្លៃវា។ ហើយមនុស្សស្រីដែលធ្លាប់ស្រលាញ់អ្នកលើសខ្លួនឯងនោះ ក៏អាចដោយសារតែទង្វើរបស់យើង ហើយចាកចេញបានដូចគ្នា។
មនុស្សស្រីនៅពេលដាក់ចិត្ត ដាក់កាយស្រលាញ់នរណាម្នាក់ហើយ មិនក្រែងក្នុងការលះបង់ យុវភាព ពេលវេលា ឬថែមទាំងអាជីពការងារ ដើម្បីរត់តាមអ្វីដែលបេះដូងខ្លួនចង់បាននោះទេ។ ពេលទើបចាប់ផ្ដើមស្រលាញ់ មនុស្សស្រីគិតថា ការលះបង់ទាំងអស់នេះ នឹងត្រូវបានតបស្នងមកវិញដោយសណ្ដានចិត្តស្មោះសរបស់មនុស្សប្រុស។ គួរឲ្យសោកស្ដាយ មនុស្សប្រុសមួយចំនួន បែរជាប្រកាន់យកគំនិត មានថ្មីចោលចាស់។ ពេលមិនទាន់បានគេជាផ្លូវការ អ្វីក៏ហ៊ាននិយាយចេញមក ដើម្បីបានគេជាកម្មសិទ្ធិ។ ដល់ពេលបានគេហើយ បែរជាលែងអើពើ។ នៅពេលនេះ ពួកគេគិតថា ខ្លួនមានអីត្រូវតោងទាមគេទៀត ពេលនេះគឺដល់វេនមនុស្សស្រីត្រូវការគេវិញម្ដង។ គេនៅតែប្រកាន់ខ្ជាប់ថា មនុស្សស្រីក្លាយជារបស់គេហើយ នឹងនៅជារបស់គេមួយជីវិត ទោះបីជាមានរឿងអ្វីកើតឡើងក៏ដោយ។
យ៉ាងណាក្ដី អ្វីៗសុទ្ធតែមានកំណត់ បូករួមទាំងភាពអត់ធ្មត់របស់មនុស្សស្រីផងដែរ។ ស្រលាញ់លះបង់យ៉ាងណា ទ្រាំទ្រយ៉ាងណា ក៏នឹងមានពេលមួយទ្រាំនឹងការឈឺទៀតលែងបាន។ ពេលនោះហើយ ដែលមនុស្សស្រីនឹងដើរចេញដោយគ្មានក្រលេកក្រោយសូម្បីបន្តិច។ នៅពេលនោះហើយ ទើបមនុស្សប្រុសដឹងថា គេបាត់បង់មនុស្សម្នាក់ដែលធ្លាប់ស្រលាញ់គេពិតមែន។
សម័យនេះ មនុស្សស្រីឆ្លាតណាស់ ទោះឆោតពេលស្រលាញ់ក៏ពិតមែន តែបើគេដឹងថា មនោសញ្ចេតនាមួយនេះដល់ផ្លូវទាល់ សង្គ្រោះលែងបានហើយ គេប្រាកដជាដើរចេញ ទោះមានអារម្មណ៍ដូចគេចាក់មួយកាំបិតក៏ដោយ។ ព្រោះគេមិនអាចអោបផ្កាកុលាបបានឡើយ ទោះបីជាខាងក្រៅស្អាតទាក់ទាញពិតមែន តែបន្លាចាក់មក គ្មានអ្នកណាអាចទ្រាំមួយជីវិតទេ៕
អានបន្ត៖ បើស្នេហាអ្នកដូចរូបតុកត្តានេះ បង្ហាញថាវាជាស្នេហាដ៏សាមញ្ញ និងមានសុភមង្គលមួយ