ចង់បង្កើនភាពផ្អែមល្ហែមជាមួយស្វាមី ប្រពន្ធគួរមានរបស់ទាំងនេះក្នុងបន្ទប់គេង
- 2020-04-02 07:05:00
- ចំនួនមតិ 0 | ចំនួនចែករំលែក 0
ចង់បង្កើនភាពផ្អែមល្ហែមជាមួយស្វាមី ប្រពន្ធគួរមានរបស់ទាំងនេះក្នុងបន្ទប់គេង
បន្ទប់និងគ្រែគេងគឺជាចំណុចសំខាន់ក្នុងការបន្ថែមភាពស្និទ្ធស្នាល និងផ្អែមល្ហែមរវាងប្ដីប្រពន្ធ មិនថាទើបរៀបការថ្មីថ្មោង ឬយូរយ៉ាងណាឡើយ។ ហេតុផលគឺថា កន្លែងនេះជាទីស្ងប់ស្ងាត់ និងជាកន្លែងឯកជនរបស់អ្នកទាំងពីរដែលអាចបញ្ចេញមនោសញ្ចេតនាទៅកាន់គ្នាទៅវិញទៅមក។
ដើម្បីជាគំនិតខ្លះៗសម្រាប់មិត្តនារីដែលត្រូវការបន្ថែមភាពស្រស់ស្អាត និងផាសុកភាពក្នុងបន្ទប់គេង វិបសាយកញ្ញានឹងបង្ហាញរបស់មួយចំនួនដែលស្រីៗគួរចាប់អារម្មណ៍ ដាក់ក្នុងបន្ទប់។
គ្រែមាំ ពូក ខ្នើយទន់ល្មើយ
អាការៈអស់កម្លាំងទាំងឡាយនឹងបាត់បង់ទៅអស់ ប្រសិនបើបានគេងនៅលើពូក និងខ្នើយទន់ល្មើយ គ្រែរឹងមាំមិនឮសំឡេងង៉ែតង៉ត ឬយោលចុះយោលឡើង។ ដូច្នេះទោះបីតម្លៃអាចនឹងខុសគ្នា តែដើម្បីផាសុកភាពដល់ក្រុមគ្រួសារ មិត្តនារីគួរពិចារណាទិញគ្រែ និងពូកខ្នើយដែលមានគុណភាពខ្ពស់ ជាជាងប្រើរបស់ធូរថ្លៃតែឆាប់ខូច ឬប៉ះពាល់អារម្មណ៍ពេលគេងជាដើម។
ក្រៅពីគុណភាពនៃសម្ភារៈចាំបាច់ទាំងនេះហើយ ភរិយាក៏គួរគិតឱ្យបានដិតដល់ដល់ការបោកគក់ និងថែទាំឱ្យបានជាប្រចាំ ព្រោះបើសិនខ្នើយធុំក្លិន ឬមានក្អែល ឡើងអាចម៍អណ្ដើក ក៏រំខានដល់ផ្លូវអារម្មណ៍បានដែរ។
ដាក់ទឹកអប់ ឬទឹកដែលមានក្លិនក្រអូប ឬផ្កាស្រស់
ក្លិនគឺជាកត្តាសំខាន់ជាងគេ។ កាលណាក្លិនក្នុងបន្ទប់មានសភាពមិនល្អ អារម្មណ៍ល្អទាំងឡាយក៏នឹងបាត់បង់ទៅតាមនោះដែរ។ ដូច្នេះដើម្បីទាក់ចិត្តស្វាមីនិងខ្លួនឯងផង ស្ត្រីគួរតែដាក់ទឹកអប់ដែលមានក្លិនប្រហើរ ឬប្រើទៀនក្រអូប ឬអាចប្រើជាផ្កាស្រស់ក៏បាន ព្រោះវានឹងសាយភាយក្លិនប្រហើរ មិនឈួលខ្លាំង ដែលអាចធ្វើឱ្យអារម្មណ៍បានធូរស្រាល ភ្លេចអស់ទុក្ខកង្វល់។
រៀបចំទូរខោអាវ ទូរសម្អាង តុដាក់សម្ភារៈឱ្យបានរៀបរយ
មិត្តនារីមួយចំនួនតែងជួបបញ្ហាជាមួយនឹងការរៀបចំបន្ទប់ ដោយសារតែត្រូវចេញទៅធ្វើការ ឬរកស៊ីខាងក្រៅ។ ប៉ុន្តែនេះក៏ជាកត្តាចងចិត្តស្វាមីបានមួយចំណែកធំដែរ ព្រោះបុរសទោះបីមិនសូវពូកែរៀបចំទុកដាក់ តែចូលចិត្តនារីណាដែលចេះរៀបចំផ្ទះឱ្យមានសណ្ដាប់ធ្នាប់ និងរៀបរយ។
រៀបកៅអី ឬសាឡុងសម្រាប់អង្គុយដាច់ពីគ្រែគេង
សម្រាប់អ្នកដែលមានបន្ទប់គេងធំទូលាយ បើអាចគួរតែរៀបចំកូនតុ ដោយមានកៅអី ឬសាឡុងទន់ៗសម្រាប់អង្គុយលេង ឬធ្វើការ ឱ្យដាច់ដោយឡែកពីគ្រែគេង ព្រោះតាមពិតទៅ មិនគួរប្រើគ្រែឬកន្លែងគេងមកឡូកឡំជាមួយការងារ ឬអង្គុយលេងឡើយ ដែលជាហេតុនាំឱ្យរំខានអារម្មណ៍ពេលគេង។
ប្រើអំពូលពងមាន់ ឬពន្លឺស្រទន់
អ្នកខ្លះអាចមិនទម្លាប់នឹងការគេងបិទភ្លើងងងឹតស្លុប អ្នកខ្លះទៀតក៏អាចនឹងមិនទម្លាប់នឹងការគេងបើកភ្លើង។ ដូច្នេះដើម្បីរកដំណោះស្រាយសម្រាប់អ្នកទាំងពីរ គួរប្រើអំពូលពងមាន់ ឬអំពូលដែលមានពន្លឺស្រាលស្រទន់ដែលក្រៅពីអាចសម្រួលការគេងហើយ វាអាចបង្កើនអារម្មណ៍ផ្អែមល្ហែម និងពុះកញ្ជ្រោលដល់គូស្នេហ៍បានទៀតផង៕