មនុស្សស្រី! ភាពឯកាមិនគួរឲ្យខ្លាចដូចពេលអ្នកគ្មានលុយចាយនោះទេ
- 2020-03-30 02:30:00
- ចំនួនមតិ 0 | ចំនួនចែករំលែក 0
មនុស្សស្រី! ភាពឯកាមិនគួរឲ្យខ្លាចដូចពេលអ្នកគ្មានលុយចាយនោះទេ
សម្រាប់ខ្ញុំឯកាមិនគួរឲ្យខ្លាចខ្លាំងដូចពេលខ្ញុំគ្មានអីសោះនោះទេ ព្រោះពេលនោះសូម្បីតែអាហារដែលខ្ញុំចង់ញ៉ាំ ខោអាវដែលខ្ញុំចង់ស្លៀក ស្រាដែលខ្ញុំចង់ផឹក បន្លប់ភាពឯកាក៏គ្មានលុយទិញវាដែរ។ នោះទើបជារឿងដែលគួរឲ្យខ្លាចបំផុតសម្រាប់ជីវិតខ្ញុំ។
នៅពេលស្នេហាត្រូវបានបញ្ចប់ មនុស្សស្រីនឹងត្រូវជួបអារម្មណ៍ឈឺចាប់ខ្លាំងបំផុត ព្រោះនាងនឹងត្រូវស្ពាយស្នាមអតីតកាលមកជាមួយគ្រប់រូបភាពទាំងអស់។
នាងនឹងគិតថានាងជាមនុស្សម្នាក់គត់ដែលនៅសល់លើពិភពលោកនេះ នាងគ្មានសេសសល់អីទៀតនោះទេ។
ស្នេហាពិតជាមានឥទ្ធិពលខ្លាំងបែបនេះមែនទេ?
ត្រូវហើយស្នេហាពិតជាសំខាន់ បែបនេះហើយទើបមានមនុស្សជាច្រើនសុខចិត្តបោះបង់ខ្លួនឯងចោលនៅពេលបាត់បង់ស្នេហា។
មានគេបានសួរខ្ញុំថា បើសិនជាខ្ញុំមានស្នេហា តើនឹងរៀបការពេលណាដែរ?
ខ្ញុំឆ្លើយទៅគេយ៉ាងជឿជាក់ថា «ទេ ខ្ញុំគ្មានស្នេហាទេ ហើយរឿងរៀបការកាន់តែឆ្ងាយទៅទៀត»
ដឹងទេថាហេតុអីបានជាខ្ញុំជ្រើសរើសផ្លូវនេះ?
ពេលមួយដែលបានបែកគ្នាជាមួយមនុស្សប្រុសដែលខ្ញុំស្រឡាញ់ខ្លាំងបំផុតក្នុងជីវិត ខ្ញុំស្ទើរតែសម្លាប់ខ្លួនទៅហើយ។ ខ្ញុំយំរហូតសឹងតែគ្មានទឹកភ្នែកស្រក់មកទៀត។
ការងារក៏ខ្ញុំមិនធ្វើ ខ្ញុំបានសុំឈប់មួយរយៈធំ។
ខ្ញុំបានចំណាយពេលដើរលេងស្ទើររាល់ថ្ងៃដើម្បីភ្លេចគេ តែទោះទៅដល់ទីណាក៏ខ្ញុំនៅតែមានអារម្មណ៍ថាឯកាខ្លាំង។
ខ្ញុំឯកាណាស់ ខ្ញុំពិតជាឯកាខ្លាំង រហូតគិតថាពិភពលោកនេះហេតុអីសោះកក្រោះយ៉ាងនេះ ហេតុអីងងឹតបែបនេះ?
ខ្ញុំពិតជាខ្លាចភាពឯកាណាស់ ខ្ញុំខ្លាចវាណាស់ ហើយខ្ញុំពិតជាមិនចង់ទទួលបានអារម្មណ៍នេះទៀតទេ។
មួយរយៈខ្លីក្រោយមក ខ្ញុំចាប់ផ្ដើមដាច់លុយ ព្រោះខ្ញុំមិនបានទៅធ្វើការ ហើយពេលនោះទើបខ្ញុំយល់ថាជីវិតនេះគ្មានលុយគឺកាន់តែគួរឲ្យខ្លាចជាងភាពឯកានោះទៅទៀត។ ពេលនោះសូម្បីតែអាហារដែលខ្ញុំចង់ញ៉ាំ ខោអាវដែលខ្ញុំចង់ស្លៀក ស្រាដែលខ្ញុំចង់ផឹក បន្លប់ភាពឯកាក៏គ្មានលុយទិញវាដែរ។
ខ្ញុំក៏ចាប់ផ្ដើមចូលធ្វើការវិញ ព្រោះមិនបែបនេះទេខ្ញុំនឹងស្លាប់មុនពេលរបួសនេះជាសះស្បើយទៅទៀត។
មកដល់ពេលនេះខ្ញុំក៏បានសប្បាយចិត្តច្រើន ហើយការឈឺចាប់ដែលធ្លាប់ចាក់ដោតពេញបេះដូងខ្ញុំក៏បានកាត់បន្ថយច្រើន។
ពេលនេះខ្ញុំបានដាក់ការស្រឡាញ់ខ្ញុំទាំងអស់ទៅលើការងារ ហើយខ្ញុំជឿថាវាល្អជាងខ្ញុំផ្ញើក្ដីស្រឡាញ់នោះទៅនឹងមនុស្សប្រុស។
ទោះពេលនេះខ្ញុំនៅម្នាក់ឯងមែន តែយ៉ាងណាក៏ខ្ញុំមានលុយដែរ ខ្ញុំអាចប្រើលុយខ្ញុំធ្វើឲ្យជីវិតខ្ញុំប្រសើរជាងពេលដែលខ្ញុំគ្មានលុយ។
ភាពឯកាមិនគួរឲ្យខ្លាចជាងពេលអត់លុយក្នុងហោប៉ៅនោះទេ ជឿខ្ញុំទៅ តែបើអ្នកឯកាហើយ អត់លុយទៀតនោះទើបជីវិតអ្នកដូចចុះនរក។
បើមានថ្ងៃណាមួយអ្នកខូចចិត្តដោយសារបែកបាក់ស្នេហា អ្នកក៏មិនត្រូវឈប់ធ្វើការ ឈប់រកស៊ី និងបោះបង់ខ្លួនឯងដែរ ព្រោះពេលនោះជីវិតអ្នកមិនខុសអីពីធ្លាក់ក្នុងភក់ជ្រាំទេ។ ត្រូវតែបន្តការងារអ្នកទៅមុខទៀត ទោះបេះដូងអ្នកខ្ទេចខ្ទីដូចគេចិញ្ច្រាំក៏ដោយ ព្រោះវានឹងប្រសើរជាងមុនបើអ្នកអាចទ្រាំបាន៕
ចុចអាន៖ដំបូន្មានស្នេហាសម្រាប់មនុស្សស្រីគ្រប់គ្នា ដើម្បីកុំឲ្យពិបាកចិត្តនៅពេលក្រោយ