ឆ្លងកាត់ពេលវេលាលំបាក៤យ៉ាងនេះបាន ប្តីប្រពន្ធគ្មានថ្ងៃលែងលះគ្នាឡើយ

2020-03-27 08:55:00
ចំនួនមតិ 0 | ចំនួនចែករំលែក 0

រូបភាពនៃមង្គលការ គឺជាសុភមង្គលដែលប្តីប្រពន្ធណាក៏ចង់រក្សារហូតដល់ចាស់ស្លាប់។ យ៉ាងណាក៏ដោយ ការរស់នៅមិនចុះសម្រុងគ្នា ធ្វើឲ្យម្នាក់ៗដាច់ចិត្តស៊ីញ៉េលើក្រដាសលែងលះមួយសន្លឹកដែលគួរឲ្យឈឺចាប់បំផុត។ ប្រសិនបើទាំងប្តី និងប្រពន្ធអាចកាន់ដៃគ្នាឆ្លងកាត់ទុក្ខលំបាក៤យ៉ាងនេះបាន នោះជីវិតរៀបការរបស់ពួកគេគ្មានថ្ងៃរលំរលាយនោះទេ។

រូបតំណាង

**១. ពេលវេលាដ៏ឈឺចាប់បំផុត**

ជម្លោះគឺជារឿងដ៏លំបាកបំផុតក្នុងជីវិតប្តីប្រពន្ធ ពេលខ្លះដោយសារតែមិនអាចគ្រប់គ្រងអារម្មណ៍ខឹងពីរបីនាទីរបស់ខ្លួនមិនបាន ក៏ជ្រុលសម្តីស្ទើរក្អួតឈាមដាក់ដៃគូម្ខាងទៀតឲ្យឈឺចាប់បាន។ យ៉ាងណាមិញ បើទាំងប្តីនិងប្រពន្ធសុខចិត្តធ្វើមិនដឹងមិនលឺបំភ្លេចរឿងទាំងនោះចោល របួសផ្លូវចិត្តក៏អាចធូរស្រាល។ អ្នកទាំងពីរក៏មានឱកាសយល់ពីគ្នាទៅវិញទៅមកបានពេញលេញ និងមានន័យសម្រាប់មង្គលការមួយនេះ។ លើលោកនេះគ្មាននរណាល្អឥតខ្ចោះឡើយ ពេលដែលអ្នកអាចបំភ្លេចរឿងទាំងនោះចោលបាន អត់ធ្មត់ដាក់គ្នាទៅវិញទៅមកបាន នោះអាពាហ៍ពិពាហ៍ច្បាស់ជាស្ថិតស្ថេរនិងរីករាយ។

រូបតំណាង

២. ពេលដែលអ្នកទាំងពីរ ត្រូវការគ្នា

ភាពជាគូគឺសំខាន់ខ្លាំងណាស់ ក្នុងមង្គលការមួយនេះ។ ពេលប្រពន្ធត្រូវការប្តី កាលៈទេសៈនេះប្តីត្រូវតែមានវត្តមាន។ ពេលប្តីបាក់ទឹកចិត្ត ហត់នឿយ នាមជាប្រពន្ធត្រូវតែរឹងមាំនិងលើកទឹកចិត្តស្វាមី។ ប្តីនិងប្រពន្ធគឺជាគូ ប្រៀបដូចចង្កឹះដែលមិនអាចខ្វះគូរបស់វាបាន។ ត្រូវធ្វើស្រមោលនៅពីក្រោយចាំគាំទ្រគ្នាទៅវិញទៅមក នៅពេលនរណាម្នាក់ត្រូវការបំផុត។ បើអ្នកទាំងពីរអាចរក្សាជំហរបែបនេះបាន ទំនាក់ទំនងគ្មានថ្ងៃប្រេះស្រាំនោះទេ។

៣. ពេលសាច់ញាតិណាម្នាក់ស្លាប់

ការឈឺចាប់បំផុត គឺពេលដែលសាច់ញាតិរបស់ប្តីឬប្រពន្ធមាននរណាម្នាក់ចែកឋានទៅ។ ពេលនោះ អ្នកទាំងពីរដាច់ខាតត្រូវតែរឹងមាំជាមួយគ្នាដើម្បីការពារនិងមើលថែគ្នាទៅវិញទៅមក។ ស្ថានសុភមង្គលគឺស្អិតនិងផ្អែមល្ហែមណាស់ បើទោះតាមកាំជណ្ដើរឡើងទៅរាងជូរចត់បន្តិចក៏ដោយ។ ស្វាមីភរិយា ត្រូវរៀនពីរបៀបកាត់បន្ថយកំហឹង ការយោគយល់ និងចេះអាណិតអាសូរ។

រូបតំណាង

៤. ពេលដែលម្នាក់ទៀតផ្លាស់ប្ដូរចិត្ត

មិនខ្វះទេ ដែលអាពាហ៍ពិពាហ៍ជាច្រើនត្រូវលែងលះដោយសារមនុស្សទី៣បង្ហាញខ្លួន ប៉ុន្តែក្នុងស្ថានការណ៍នេះ ក៏មានបុរសជាច្រើនបានភ្ញាក់ខ្លួនថា តាមពិតមានតែប្រពន្ធរបស់ខ្លួនទេគឺជាស្នេហាពិតក្នុងជីវិតរបស់គេ។ នេះមិនបានលើកទឹកចិត្តឲ្យមានការផិតក្បត់ទេ តែមានគូជាច្រើនណាស់ដែលជួបរឿងឈឺចាប់បែបនេះ។ ដូច្នេះ មានតែរក្សានិងថែឬសគល់នៃចំណងស្នេហានេះទេ ទើបអាចរក្សាអាពាហ៍ពិពាហ៍បាន។ នោះគឺជាភាពស្មោះត្រង់ ការអត់ធ្មត់ទៅវិញទៅមក ដើម្បីចាក់ឬសមិនឲ្យប្រេះឆា៕

អានបន្ត៖ ប្តីល្អ គ្មានថ្ងៃធ្វើរឿង ៥ យ៉ាងនេះចំពោះប្រពន្ធឡើយ

ប្រភព៖ Phunutoday ប្រែសម្រួល៖ លឹម សុនា