ចង់ស្គមខ្លាំងពេក អ្នកនឹងនាំគុណវិបត្តិទាំងនេះចូលខ្លួន

2020-03-10 05:00:00
ចំនួនមតិ 0 | ចំនួនចែករំលែក 0

នាសម័យទំនើបដូចសព្វថ្ងៃនេះ មានម្ហូបអាហារឆ្ងាញ់ៗ រួមទាំងចំណីចំណុកបង្អែមជាច្រើន ដែលឃើញហើយចង់តែភ្លក់គ្រប់មុខ។ ពេលខ្លះញ៉ាំរហូតដល់ឡើងគីឡូខ្លាំងទើបព្យាយាមសម្រកមកវិញ ឯអ្នកខ្លះទៀតស្គមពេក ដោយសារតែញ៉ាំតិចឬបណ្តាលមកពីមានជំងឺប្រចាំកាយ។ យ៉ាងណាក៏ដោយ មិនគួរបណ្តោយឲ្យខ្លួនស្គមស្គាំងហួសកម្រិតទេ ព្រោះអ្នកនឹងជួបគុណវិបត្តិជាច្រើននឹកស្មានពុំដល់។

រូបតំណាង

**១. រាងកាយខ្សោយជាងធម្មតា**

រាងកាយរបស់អ្នកស្គម តែងតែខ្សោយជាងអ្នកដែលមានគីឡូធម្មតា។ មិនថាប្រព័ន្ធប្រសាទឬខួរក្បាលនោះទេ នឹងត្រូវធ្វើការធ្ងន់ធ្ងរ។ សម្រាប់អារម្មណ៍វិញក៏ឆាប់ឆេវឆាវមួម៉ៅផងដែរ។ លើសពីនេះ អ្នកមានមាឌស្គមស្គាំងខ្លាំងពេក អាចប្រឈមខ្ពស់នឹងការដួលសន្លប់ អថេរផ្លូវចិត្ត មិនសូវរឹងមាំ ឆាប់កើតទុក្ខពិបាកចិត្ត ជាពិសេសនៅពេលដែលពួកគេមានជំងឺក្នុងខ្លួនស្រាប់។

២. មានបញ្ហាផ្នែកសាច់ដុំនិងឆ្អឹង

រូបតំណាង

ថ្វីត្បិតតែអ្នកស្គមមិនសូវមានគ្រោះថ្នាក់ខ្លាំងដូចអ្នកធាត់លើសកម្រិតក៏ដោយ ប៉ុន្តែពួកគេមានសមាសភាពសាច់ដុំតូច ដែលពុំមានកម្លាំងពេញលេញ ក្នុងការធ្វើកិច្ចការផ្សេងៗ។ ម្យ៉ាងវិញទៀតអ្នកស្គមអាចជួបបញ្ហាឆ្អឹងមិនរឹងមាំ ងាយបាក់ឬពុក ជាពិសេសនៅពេលមានគ្រោះថ្នាក់នានាជាយថាហេតុ។

៣. មានបញ្ហាជាមួយនឹងប្រព័ន្ធដំណើរការនៃឈាម

មនុស្សស្គមមានហានិភ័យខ្ពស់ក្នុងការកើតជំងឺស្លេកស្លាំង និងសម្ពាធឈាមធ្លាក់ចុះ។ ដោយសារតែចង្វាក់បេះដូងរបស់ពួកគេដើរយឺតជាងអ្នកដែលមានរាងកាយធម្មតា។ អ្នកមាឌស្គម មានកម្រិតនៃការរំលាយអាហារទាប ជាហេតុធ្វើឲ្យរាងកាយមានដំណើរការនៃឈាមតិចតួចទៅតាមនោះដែរ។ ការក្រោកពីគេងលឿនពេក អាចបណ្តាលឲ្យឈឺក្បាល ព្រោះសម្ពាធឈាមស្ថិតក្នុងកម្រិតទាប ហើយក៏អាចប្រឈមនឹងការដួលសន្លប់ ឬបាត់បង់ស្មារតីជាងមនុស្សទូទៅ។

៤. ប្រព័ន្ធរំលាយអាហារដំណើរការមិនប្រក្រតី

រូបតំណាង

ទម្លាប់នៃការញ៉ាំអាហារពុំបានគ្រប់គ្រាន់ត្រឹមត្រូវ ធ្វើឲ្យប្រព័ន្ធរំលាយអាហារមានដំណើរការមិនប្រក្រតី អាចបង្កជាការភើ ដោយសារមានជាតិអាស៊ីដក្នុងក្រពះលើសកម្រិត។ នៅពេលក្រពះជួបបញ្ហា អ្នកក៏អាចមានអាការៈទល់លាមកញឹកញាប់ ដោយសារប្រព័ន្ធរំលាយអាហារនៃរាងកាយមានកម្រិតទាប ជាហេតុបង្កផលប៉ះពាល់ដល់មុខងាររបស់ពោះវៀន។

៥. មានបញ្ហាអ័រម៉ូន

នៅពេលរាងកាយស្គមស្គាំងពេក អ័រម៉ូនរបស់អ្នកក៏គ្មានស្ថិរភាពដែរ។ អ្នកអាចមករដូវក្នុងបរិមាណតិចតួច ឬពិបាកក្នុងការមានផ្ទៃពោះ ឬម្យ៉ាងទៀតអាចប្រឈមនឹងការរលូតកូន ដោយសាររាងកាយមិនរឹងមាំគ្រប់គ្រាន់ ដើម្បីឲ្យគភ៌លូតលាស់។

នរណាក៏រំពឹងចង់បានរាងស្អាតដែរ ប៉ុន្តែត្រូវប្រាកដថាអ្នកមានសុខភាពល្អ មិនស្គមលើសកម្រិតដែលអាចបង្កឲ្យរាងកាយចុះខ្សោយ លែងរឹងមាំដូចមនុស្សទូទៅនោះទេ៕