មនុស្សប្រុសបើមាន៨ចំណុចនេះ ចាត់ទុកថាគ្រប់គ្រាន់សម្រាប់មនុស្សស្រីហើយ

2020-03-04 05:10:00
ចំនួនមតិ 0 | ចំនួនចែករំលែក 0

និយាយពីរឿងស្នេហា មនុស្សប្រុសមួយចំនួនតែងមានទស្សនៈដែលមិនពិតពីមនុស្សស្រីគឺគិតថា ស្រីៗច្រើនប្រាថ្នាស្វែងរកដៃគូដែលមានលក្ខណៈល្អឥតខ្ចោះ ពោលគឺទាំងស្អាត ទាំងចេះដឹង និង មានទ្រព្យធនជាដើម។ យ៉ាងណាមិញ ការគិតទាំងនោះគឺមិនពិតទាំងស្រុងនោះទេ។ មនុស្សស្រីឱ្យតម្លៃទៅលើរឿងរ៉ាវបេះដូងច្រើនជាងហេតុផលបន្ទាប់បន្សំទាំងនោះ។ ដូច្នេះហើយ សូមមិត្តបុរសៗឈប់មានការយល់ច្រឡំទៀតទៅ នារីមិនបានទាមទារឱ្យអ្នកមានភាពល្អឥតខ្ចោះនោះទេ គឺត្រឹមមាន ៨ ចំណុចនេះគឺគ្រប់គ្រាន់ហើយសម្រាប់នាង ៖

១. នាងចង់ឱ្យអ្នកចំណាយពេលវេលាជាមួយនាង

រូបតំណាង

កាដូដែលមានតម្លៃបំផុតដែលអ្នកអាចជូនទៅមនុស្សដែលខ្លួនស្រឡាញ់នោះគឺ ពេលវេលា។ ការចំណាយពេលរបស់អ្នកដើម្បីនៅជាមួយនាង អាចធ្វើឱ្យនាងរីករាយជាងទទួលបានរបស់មានតម្លៃនានាទៅទៀត។ ពេលដែលភាគីបុរសតែងផ្តល់នូវពេលវេលាគ្រប់គ្រាន់សម្រាប់នាង វាបញ្ជាក់យ៉ាងច្បាស់ថាអ្នកផ្តល់តម្លៃឱ្យទំនាក់ទំនងរបស់អ្នកទាំងពីរ ព្រមទាំងនាងផងដែរ។

២. នាងចង់ឱ្យអ្នកគោរពឱ្យតម្លៃនាង

រូបតំណាង

ពេលខ្លះសម្ដីមិនអាចស្ដែងពីអារម្មណ៍ពិតរបស់មនុស្សម្នាក់បានឡើយ ដូច្នេះហើយវាតម្រូវឱ្យមានទង្វើភ្ជាប់មកជាមួយផងដែរ។ អ្នកអាចនិយាយរាប់រយ រាប់ពាន់ដងថាអ្នកស្រឡាញ់ និង គោរពនាងខ្លាំង ក៏ប៉ុន្តែបើទង្វើនិងកាយវិការរបស់អ្នកមិនបានដូចនឹងសម្ដីរបស់អ្នក នោះវាក៏គ្មានន័យអ្វីនោះដែរ។ ដូច្នេះហើយទើបនារីភាគច្រើនទាមទារឱ្យអ្នកបង្ហាញថាអ្នកឱ្យតម្លៃ និង គរពនាងពិតប្រាកដ។

៣. នាងចង់ឱ្យអ្នកខិតខំដើម្បីទំនាក់ទំនងមួយនេះ

រូបតំណាង

ចំណុចនេះមិនបានមានន័យថានាងត្រូវការកុលាប៩៩ទងអ្វីពីអ្នកនោះទេ។ នាងក៏មិនបានត្រូវការឱ្យអ្នកធ្វើអ្វីដែលអ្នកមិនអាចធ្វើទៅរួចដែរ។ ពេលខ្លះនាងគ្រាន់ចង់ឃើញថាអ្នកពិតមានចិត្តធ្វើអ្វីៗដើម្បីនាង និងដើម្បីស្នេហាអ្នកទាំងពីរ មិនថាវាជារឿងតូចតាចយ៉ាងណានោះទេ។

៤. នាងចង់ឱ្យអ្នកចេះគោរពពាក្យសម្ដីរបស់ខ្លួន

រូបតំណាង

នាងមិនចង់ស្ដាប់ពាក្យកុហកបោកប្រាស់ និយាយឱ្យតែផុតពីមាត់នោះទេ។ នាងមិនត្រូវការសន្យាខ្យល់ ឬ ពាក្យពេចន៍ផ្អែមល្ហែមយករួចខ្លួននោះឡើយ។ អ្វីដែលនាងត្រូវការគឺ អ្នកគោរពនូវសម្ដីដែលខ្លួនបាននិយាយ ឬ សន្យាជាមួយនាង ពោលគឺកុំបំផ្លាញការជឿទុកចិត្តរបស់នាងដោយការនិយាយហើយមិនដែលឃើញធ្វើឱ្យសោះ។

៥. នាងចង់បានអ្នកនៅក្បែរ ពេលនាងត្រូវការ

រូបតំណាង

នាងដឹងថាគ្មានអ្នកណាល្អគ្រប់យ៉ាងនោះទេ តែនាងគ្រាន់ចង់បានបុរសម្នាក់ដែលអាចនៅក្បែរនាង ជួយលើកទឹកចិត្តនាង ធ្វើឱ្យនាងអាចញញឹមនៅពេលនាងគ្មានអ្នកណានៅក្បែរ ឬ មានអារម្មណ៦ថាឯកាជាដើម។ បុរសម្នាក់ដែលមិនឈរឱបដៃពេលឃើញនាងជួបប្រទះបញ្ហាក្នុងជីវិត បុរសម្នាក់ដែលឱបនាងហើយប្រាប់នាងថាអ្វីៗនឹងប្រសើរឡើង បុរសប្រភេទនេះហើយទើបជាបុរសក្នុងក្តីស្រមៃរបស់នាងពិតប្រាកដ។

៦. នាងចង់ឱ្យអ្នកជួយគាំទ្រ និង លើកទឹកចិត្តនាង

រូបតំណាង

ពេលខ្លះ នាងមិនបានចង់ឱ្យអ្នកសម្រេចរាល់ក្តីស្រមៃរបស់នាងទេ នាងគ្រាន់ចង់មានអ្នកឈរក្បែរនាង ផ្តល់កម្លាំងចិត្តឱ្យនាង ខណៈនាងព្យាយាមឈោងចាប់ក្តីស្រមៃរបស់ខ្លួនដោយខ្លួនឯង។

៧. នាងចង់ឱ្យអ្នកស្តាប់នាង

រូបតំណាង

ពេលនាងហត់នឿយ ឬ ស្មុគស្មាញជាមួយរឿងអ្វីមួយ នាងចង់មានមនុស្សម្នាក់ដែលអាចស្ដាប់ពីការរ៉ាយរ៉ាប់របស់នាង។ នាងក៏មិនបានសុំឱ្យអ្នកជួយរកដំណោះស្រាយ ឬ មធ្យោបាយអ្វីឡើយ គឺត្រឹមយកចិត្តទុកដាក់នឹងអ្វីដែលនាងនិយាយប្រាប់ ហើយបើកចិត្តទទួលយកគ្រប់រឿងដែលកើតឡើងចំពោះនាង និងមិនព្រងើយកន្តើយពេលនាងត្រូវការអ្នកបំផុត។

៨. នាងចង់ឱ្យអ្នកស្រឡាញ់នាងដូចដែលនាងស្រឡាញ់អ្នក

រូបតំណាង

នាងមិនត្រូវការឱ្យអ្នកមានអ្វីគ្រប់យ៉ាងដូចបុរសដទៃ ហើយនាងក៏គ្មានថ្ងៃប្រៀបធៀបអ្នកនឹងគេដែរ តែអ្វីដែលនាងសុំពីអ្នកគឺក្តីស្រឡាញ់តែមួយមុខគត់។ នាងមិនចង់ឱ្យអ្នកស្រឡាញ់នាងដោយផ្តល់នូវវត្ថុ ឬ កាដូមានតម្លៃអ្វីនោះទេ តែនាងចង់ឱ្យអ្នកស្រឡាញ់នាងដូចដែលនាងស្រឡាញ់អ្នកគឺគ្រប់គ្រាន់ណាស់ទៅហើយ៕

ចុចអានបន្ត៖ វិធីសាស្ត្រ ៤យ៉ាង ក្នុងការដើរចេញពីស្នេហាដែលគ្មានផ្តល់អ្វីឱ្យអ្នក ក្រៅពីភាពឈឺចាប់

ប្រភព៖ HerWay ប្រែសម្រួល៖ Siyou Tang