ទម្លាប់ពេលព្រឹក៦យ៉ាងដែលធ្វើឱ្យអ្នកឡើងទម្ងន់លើសដើម

2020-03-03 01:00:00
ចំនួនមតិ 0 | ចំនួនចែករំលែក 0

មិនមែនអ្នកគ្រប់គ្នាសុទ្ធតែងើបពីគេងមកស្រស់ស្រាយនោះទេ។ មានអ្នកខ្លះមានអារម្មណ៍តប់ប្រមល់ មិនស្រស់ស្រាយ មិនចង់ធ្វើអ្វីទាំងអស់ ហើយក៏មិនបានយកចិត្តទុកដាក់លើទម្លាប់នៅពេលព្រឹកទេព្រោះគិតថាវាមិនសូវសំខាន់។ អ្នកប្រហែលជាមិននឹកស្មានទម្លាប់ពេលព្រឹកក៏អាចប៉ះពាល់ការសម្រករបស់អ្នកដែរ។ ហេតុនេះហើយប្រសិនបើអ្នកមានទម្លាប់អាក្រក់ទាំង៦នេះដល់ពេលដែលត្រូវកែហើយ៖

១. មិនចង់ត្រូវកម្តៅថ្ងៃពេលព្រឹក

យោងទៅតាមការសិក្សារបស់ PLOS One ប្រសិនបើអ្នកមិនចូលចិត្តត្រូវកម្តៅពេលព្រឹកហើយព្យាយាមបិទបាំងកម្តៅថ្ងៃនោះ អ្នកកំពុងតែបាត់បង់ឱកាសសម្រកទម្ងន់ដែលកម្តៅព្រះអាទិត្យផ្តល់ឱ្យហើយ។ អ្នកដែលត្រូវកម្តៅព្រះអាទិត្យនៅពេលព្រឹកច្រើនតែមានកម្រិតនៃការឡើងទម្ងន់ទាបជាងអ្នកដែលមិនសូវត្រូវកម្តៅ។ ការសិក្សាក៏បានណែនាំថាអ្នកគួរតែត្រូវកម្តៅព្រះអាទិត្យយ៉ាងហោចណាស់ឱ្យបាន២០ទៅ៣០នាទីនៅពេលព្រឹក។

២. ខ្លាចជញ្ជីង

ភាគច្រើនអ្នកដែលឧស្សាហ៍ឡើងគីឡូគឺមិនសូវជាចង់ថ្លឹងទម្ងន់ប៉ុន្មានទេ។ យូរៗទើបថ្លឹងម្តងហើយក៏ឡើងទម្ងន់មិនគួរឱ្យជឿ។ ការដែលមិនសូវថ្លឹងទម្ងន់ក៏ជាមូលហេតុធ្វើឱ្យឡើងគីឡូដែរ ជាពិសេសនៅពេលព្រឹក។ មូលហេតុនោះគឺនៅពេលដែលអ្នកឧស្សាហ៍ថ្លឹងទម្ងន់នោះអ្នកនឹងមានការប្រុងប្រយ័ត្នខ្ពស់ ហើយអ្នកក៏អាចដឹងបាននៅពេលដែលឡើងទម្ងន់តិចតួច។ ពោលគឺមិនហួសពេលនឹងសម្រក។

៣. អត់អាហារពេលព្រឹក

អ្នកសម្រកទម្ងន់មួយចំនួនធំគិតថាការអត់ញ៉ាំអាហារពេលព្រឹកគឺអាចសម្រកបានលឿនហើយមានប្រសិទ្ធភាព។ តែអ្នកទាំងនោះគិតខុសហើយ ថាមពលគ្រប់យ៉ាងគឺពឹងផ្អែកលើអាហារពេលព្រឹកនៅពេលអ្នកញ៉ាំអាហារពេលព្រឹកបានគ្រប់គ្រាន់នោះអ្នកអាចបន្ថយការញ៉ាំអាហារពេលថ្ងៃនិងយប់បាន។ ការដែលអត់អាហារពេលព្រឹកមានតែនាំឱ្យអ្នកឃ្លានហើយចង់ញ៉ាំពេញមួយថ្ងៃ។

៤. មិនរៀបគ្រែពេលក្រោកពីគេង

ការរៀបចំគ្រែពេលភ្ញាក់ពីគេងក៏អាចជួយអ្នកឱ្យសម្រកទម្ងន់បានដែរ។ ទោះចង់ឬមិនចង់អ្នកគួរតែរៀបគ្រែគេងឱ្យបានស្អាតព្រោះវាអាចជួយឱ្យគេងបានស្កប់ស្កល់ហើយកាត់បន្ថយកម្រិតនៃការឡើងទម្ងន់។ អ្នកក៏អាចរៀបចំគ្រែគេងហើយហាត់ប្រាណបន្តិចនៅពេលព្រឹក។

៥. ទម្លាប់ញ៉ាំកាហ្វេច្រើនតែមិនញ៉ាំទឹកគ្រប់គ្រាន់

ការដែលញ៉ាំកាហ្វេច្រើនជាងញ៉ាំទឹកទៀតនោះ វាអាចជាផលអាក្រក់ដល់ទំហំចង្កេះរបស់អ្នក។ ក្នុងរាងកាយមនុស្សត្រូវការជាតិទឹកច្រើនជាងអ្វីទាំងអស់ជាពិសេសនៅពេលព្រឹក។ ទឹកជួយបញ្ចេញនូវជាតិពុលទាំងឡាយដែលមានពេញមួយយប់នៅពេលដែលអ្នកគេងនិងជំនួយដល់មេតាប៉ូលីស។

៦. គេងទ្រមក់

ការគេងច្រើនពេកមានតែធ្វើឱ្យអ្នកឡើងទម្ងន់ បើទោះបីជាអ្នកព្យាយាមសម្រកក៏ដោយ។ រាងកាយអ្នកមិនអាចដំណើរការបានល្អនិងទៀងទាត់។ ហើយការគេងតិចពេកក៏អាចនាំឱ្យឡើងទម្ងន់ដែរគឺអ្នកមិនសូវបញ្ចេញសកម្មភាពនិងអស់កម្លាំងដែលជាហេតុនាំឱ្យអ្នកឃ្លានហើយញ៉ាំច្រើន៕