៥ យ៉ាងមិនគួរស្នើសុំឲ្យដៃគូធ្វើ ដើម្បីតម្រូវចិត្តខ្លួនឯង
- 2020-02-25 04:30:00
- ចំនួនមតិ 0 | ចំនួនចែករំលែក 0
៥ យ៉ាងមិនគួរស្នើសុំឲ្យដៃគូធ្វើ ដើម្បីតម្រូវចិត្តខ្លួនឯង
ថ្វីត្បិតតែជីវិតរបស់មនុស្សម្នាក់ៗខុសៗគ្នា ទៅតាមបែបបទនៃគ្រួសារ វប្បធម៌ប្រពៃណី ឬប្រទេសក៏ដោយ នៅតែមានចំណុចមួយចំនួន ដែលមនុស្សយើងមានលក្ខណៈស្រដៀងឬដូចគ្នាតែម្តង។
ចំណុចពិសេសទាំងនោះហើយ ដែលធ្វើឲ្យមនុស្សពីរនាក់មានអារម្មណ៍ល្អនឹងគ្នា រហូតដល់លង់ស្នេហ៍ជ្រាលជ្រៅបាត់មុខមិនបាន។ គ្រប់យ៉ាងអាចនឹងស្រស់បំព្រងនាគ្រាដំបូង ប៉ុន្តែចូលដល់ដំណាក់កាលមួយ មិនថាភាគីម្ខាងណាក៏ដោយ ឲ្យតែមានភាពអាត្មានិយម ចង់ទាមទារឲ្យដៃគូផ្គាប់ចិត្តខ្លួនឯងខ្លាំងពេក ស្នេហាច្បាស់ជារង្គោះរង្គើមិនខានទេ។
**១. ទាមទារឲ្យដៃគូលាក់បាំងទំនាក់ទំនងជិតឈឹង**
មានអ្នកខ្លះជ្រើសរើសទំនាក់ទំនងស្នេហាបែបឯកជន ឯខ្លះទៀតបង្ហាញឲ្យគេឯងដឹងដោយមិនលាក់លៀម ទោះបីមិនដឹងថាថ្ងៃមុខមានរឿងអ្វីកើតឡើងក៏ដោយ។ ក្នុងករណី២នេះ វាជារឿងទូទៅរបស់គូស្នេហ៍ ប៉ុន្តែសម្រាប់អ្នកដែលមានបំណងចង់លាក់ជិតឈឹង ដោយសារមានជនទី៣ជាអាថ៌កំបាំងនៅពីក្រោយខ្នង ឬមិនទាន់អាចបំភ្លេចស្នេហ៍ចាស់បាន ទើបជាបញ្ហាធំ។ យ៉ាងណាមិនគួរភ្លេចពីដៃគូដែលកំពុងតែស្រលាញ់ និងយកចិត្តទុកដាក់ពិតប្រាកដចំពោះអ្នកនោះឡើយ។ ទោះបីស្ថិតក្នុងដំណាក់កាលរក្សាភាពជាឯកជនឲ្យគ្នាទៅវិញទៅមកក៏ដោយ យ៉ាងហោចណាស់អ្នកក្លាហានហ៊ានប្រាប់មនុស្សជិតស្និទ្ធឲ្យដឹងពីទំនាក់ទំនាក់មួយនេះ ដៃគូច្បាស់ជារំភើប និងមានមោទកភាពពេកពន់ណាស់ទៅហើយ។
២. ចាំពឹងពាក់លើដៃគូជ្រុលពេក
បញ្ហាធំចម្បងដែលតែងនាំឲ្យរឿងរ៉ាវមកឲ្យគូស្នេហ៍មិនចេះចប់ គឺការចាំពឹងពាក់លើដៃគូជ្រុលហួសហេតុពេក មិនថាអារម្មណ៍ លុយកាក់ ឬក្តីស្រលាញ់នោះទេ។ ត្រូវចាំថា មានតែការចេះស្រលាញ់ខ្លួនឯងប៉ុណ្ណោះ ទើបអាចធ្វើឲ្យអ្នកមានជំហររឹងប៉ឹង ដោយពុំចាំបាច់ពឹងពាក់លើគេច្រើនពេក ហើយក៏មិនផ្ញើសុភមង្គលលើគេទាំងស្រុងនោះដែរ។
៣. ធ្វើអ្វីមួយដែលបំផ្លាញសុខភាព
ប្រសិនបើដៃគូមិនលើកទឹកចិត្តឲ្យអ្នកថែរក្សាសុខភាព ដូចជាមិនចង់ឲ្យទៅហាត់ប្រាណ ឬបង្ខំឲ្យជក់បារី ផឹកស្រាជាដើម អ្នកគួរដកខ្លួនចេញឲ្យទាន់ពេលវេលា ជាជាងនៅទ្រាំទ្របំផ្លាញសុខភាពកាន់តែទ្រុឌទ្រោមដោយមិនដឹងខ្លួន។ ម្យ៉ាងទៀតគេក៏គ្មានសិទ្ធិអីមកបញ្ជាអ្នកឲ្យធ្វើតាមគ្រប់រឿងទេ ព្រោះបែបនេះ វានឹងបណ្តាលឲ្យប៉ះពាល់ទាំងផ្លូវកាយនិងផ្លូវចិត្ត។
៤. ចង់ឲ្យដៃគូឈប់ធ្វើរឿងអ្វីដែលជាចំណង់ចំណូលចិត្តផ្ទាល់ខ្លួន
នរណាៗក៏ត្រូវការពេលវេលាផ្ទាល់ខ្លួនដែរ ដើម្បីបំពេញនូវចំណង់ចំណូលចិត្ត ធ្វើអ្វីដែលតែងតែធ្វើពីមុនមក។ ជឿជាក់ថាអ្នកទាំងពីរមិនអាចដូចគ្នាទាំងស្រុងឡើយ ដូច្នេះហើយមានការបែងចែកឲ្យបានស្មើគ្នាប៉ុណ្ណោះ ទើបសមស្របទៅនឹងតម្រូវការទាំងសងខាង ដោយមិនចាំបាច់បង្ខំឲ្យដៃគូ បោះបង់នូវអ្វីដែលខ្លួនស្រលាញ់ចូលចិត្ត។
៥. ចង់ឲ្យដៃគូផ្លាស់ប្តូរទៅជាមនុស្សម្នាក់ផ្សេងទៀត
គូស្នេហ៍ដែលស្រលាញ់គ្នាពិតប្រាកដ នឹងទទួលយកនូវអ្វីដែលដៃគូមាន ដោយមិនកំណត់លក្ខខ័ណ្ឌ។ គូស្នេហ៍គួរធ្វើអ្វីដែលជាខ្លួនឯង ដោយមិនបាច់ព្យាយាមផ្លាស់ប្តូរឲ្យទៅជាមនុស្សម្នាក់ផ្សេងទៀតនោះដែរ៕
ចុចអានបន្ត៖ ពាក្យសាមញ្ញៗ៥ម៉ាត់ ដែលសង្សារអ្នកចង់ឮចេញពីមាត់អ្នកបំផុត