អាហារ៥ប្រភេទមិនល្អឡើយសម្រាប់អ្នកមានស្បែកងាយប្រតិកម្ម

2020-02-18 08:20:00
ចំនួនមតិ 0 | ចំនួនចែករំលែក 0

ស្បែកងាយប្រតិកម្មគឺអាការៈដែលនាំឱ្យស្បែកប្រែទៅជាខុសប្រក្រតីទៅនឹងបរិស្ថានជុំវិញ ដែលជាធម្មតា ស្បែកប្រភេទនេះច្រើនតែលេចចេញនូវសញ្ញាដូចជា ឆាប់ឡើងក្រហម របក មានស្នាមអុជ រលាក ឬរមាស់។

ការស្រាវជ្រាវពីអ្នកជំនាញជាច្រើនរកឃើញមូលហេតុចម្បងៗដែលនាំឱ្យស្បែកប្រែទៅជាឆាប់ប្រតិកម្ម ដូចជា កត្តាតំណពូជ ការបំពុលផ្សេងៗ ការស្ថិតក្រោមកម្ដៅ ឬអាកាសធាតុរងាខ្លាំងនិងញឹកញាប់ពេក កត្តាបម្រែបម្រួលអរម៉ូន វ័យ ការតានតឹង ការញ៉ាំចំណីអាហារខុស និងមួយទៀតគឺអាចមកពីការប្រើផលិតផលខុសនឹងប្រភេទស្បែក។

ខាងក្រោមនេះគឺជាអាហារ៥ប្រភេទសម្រាប់អ្នកដែលមានស្បែកឆាប់ឡើងប្រតិកម្មគួរតែតមឱ្យបាន ព្រោះមិនដូច្នោះទេ អាចនឹងនាំឱ្យកាន់តែមានបញ្ហាធ្ងន់ធ្ងរ៖

១-ប្រភេទម្សៅស្អិត (Gluten)

ជាតិ Gluten គឺជាប្រូតេអ៊ីនដែលមាននៅក្នុងនំប៉័ង និងនំដុតទាំងឡាយ ជាពិសេសគឺអាហារដែលផ្សំពីស្រូវសាឡី។ ជាទូទៅ អ្នកដែលមានប្រតិកម្មនឹងជាតិ Gluten គឺវានឹងចូលទៅបំផ្លាញរោមឆ្មារៗដែលនៅលើភ្នាសពោះវៀន បណ្ដាលឱ្យចេញជារោគសញ្ញាខុសៗគ្នា។ អ្នកខ្លះទៅជាហើមពោះ ឈានដល់ការចេញរមាស់ ឬរោលលើស្បែក ហើយពេលជាតិ Gluten នេះចេញពីក្នុងរាងកាយអស់ អាការៈទាំងនេះក៏បាត់ទៅវិញដែរ។

ចំណែកអ្នកខ្លះទៀតមិនមានអាការៈហើមពោះ តែមានកើតទៅជាពងបែក ឬកន្ទាលត្រអាកលើស្បែក។ ដូច្នេះបានន័យថា អ្នកគួរតែជៀសឱ្យឆ្ងាយពីប្រភេទនំប៉័ង ទឹកសណ្ដែក ស្រាបៀរ ធញ្ញជាតិជាដើម។

២-ទឹកដោះគោ

ប្រូតេអ៊ីនទឹកដោះគោអាចបង្កទៅជាអាល្លែកស្ស៊ីចំពោះមនុស្សមួយចំនួន។ ដូច្នេះដើម្បីជៀសវាងបញ្ហា អ្នកគួរតែអានគ្រឿងផ្សំនៃដបឬកំប៉ុងទឹកដោះគោ មិនថាជាប្រភេទទឹកដោះដែលគ្មានជាតិខ្លាញ់ ឈីស ស្ករធ្វើពីទឹកដោះ ក៏ដោយ ត្រូវប្រាកដថាផលិតផលទាំងនោះមិនបានផ្សំឡើងពីប្រូតេអ៊ីនទឹកដោះគោ។

ទឹកដោះគោក្នុងភេសជ្ជៈផ្សេងៗ ក៏ត្រូវប្រាកដដែរថាគ្មានប្រូតេអ៊ីនចម្រាញ់ពីដោះគោ

អ្នកគួរតែងាកមកផឹកទឹកដោះដែលចម្រាញ់ពីផ្លែអាល់ម៉ុន ស្រូវ ឬក៏ខ្ទិះដូងវិញ ទើបមានសុវត្ថិភាពជាងទឹកដោះដែលច្របាច់ពីសត្វគោ។

៣-ស៊ុត

ជាពិសេសផ្នែកសនៃស៊ុតតែងតែអាចបង្កឱ្យស្បែកទៅជាកន្ទួល ឬរោលបាន។ ជាតិអ៊ីស្តាមីនដែលមាននៅក្នុងរាងកាយមនុស្សមួយចំនួនច្រើនតែមានប្រតិកម្មជាមួយនឹងផ្នែកសនៃស៊ុត ហើយត្រឹមតែប៉ុន្មាននាទីបន្ទាប់ពីការញ៉ាំស៊ុតស ស្បែកអាចនឹងប្រែទៅជារមាស់ ឬរោល។

៤-អាហារដែលបន្ថែមជាតិពណ៌

ជាតិពណ៌ដែលដាក់នៅក្នុងអាហារ និងប្រភេទអាហារដែលរក្សាបានទុកបានយូរ ច្រើនតែផ្ដល់ផលរំខានដល់អ្នកដែលមានស្បែកងាយប្រតិកម្ម។ ដូច្នេះអ្នកគួរតែញ៉ាំអាហារដែលប្រើធម្មជាតិ ហើយជៀសវាងអាហារកំប៉ុង អាហារបង្កក ឬអាហារប្រអប់។ ក្រៅពីធ្វើឱ្យស្បែកទៅជារមាស់ កន្ទួល អាហារប្រភេទនេះក៏អាចធ្វើឱ្យឈឺក្បាល ធេងធោង អស់កម្លាំង និងបញ្ហាផ្លូវអារម្មណ៍ផងដែរ។

៥-ស្រាក្រហម

សារធាតុ Tannin ដែលមាននៅក្នុងស្រាក្រហមអាចបណ្ដាលឱ្យមនុស្សមួយចំនួនចេញកន្ទាលត្រអាក ឬស្បែកឡើងក្រហម។ ចំណែកស្រាសដូចជាមិនសូវមានបញ្ហាប៉ុន្មានទេ បើសិនផឹកក្នុងបរិមាណតិចតួច ប៉ុន្តែក៏ត្រូវកំហិតបរិមាណត្រឹមត្រូវដែរ ប្រសិនបើអ្នកឃើញថាស្បែកមានបញ្ហា ឬខុសប្រក្រតី៕

អត្ថបទនេះនាំមកជូនដោយ derma365 ឬអាចចូលទៅកាន់ Facebook Page Guardian Cambodia ដើម្បីទទួលបានព័ត៌មានបន្ថែម!