ជីវិតអាពាហ៍ពិពាហ៍ ហេតុអ្វីបែរជា "គុកឥតជញ្ជាំង" សម្រាប់មនុស្សប្រុសមួយចំនួន?
- 2019-12-09 05:15:00
- ចំនួនមតិ 0 | ចំនួនចែករំលែក 0
ជីវិតអាពាហ៍ពិពាហ៍ ហេតុអ្វីបែរជា "គុកឥតជញ្ជាំង" សម្រាប់មនុស្សប្រុសមួយចំនួន?
អ្នកប្រហែលជាធ្លាប់បានឮចេញពីមាត់របស់មនុស្សប្រុសមួយចំនួនហើយថា "កុំចាញ់បោកអាពាហ៍ពិពាហ៍ឱ្យសោះ ព្រោះវាជា គុកឥតជញ្ជាំង យ៉ាងពិតប្រាកដ"។ យ៉ាងណាមិញ មិនមែនមនុស្សប្រុសទាំងអស់សុទ្ធតែគិតបែបនេះឡើយ មានអ្នកខ្លះក៏គាត់ពេញចិត្តនឹងជីវិតគូរបស់គាត់ ហើយតែងគិតវិជ្ជមានជានិច្ច រាល់ពេលជួបបញ្ហា។
តើកត្តាអ្វីខ្លះដែលធ្វើឱ្យមនុស្សប្រុសមួយចំនួនមានការគិតអវិជ្ជមានបែបនោះ? ចំពោះអាពាហ៍ពិពាហ៍ដែលគួរតែមានភាពស្រស់បំព្រង ហើយត្រូវបានព្រមព្រៀងទាំងសងខាងនោះទៅវិញ?
**១. កាត់បន្ថយពេលវេលាជាមួយមិត្តភក្តិ៖**
មនុស្សប្រុសគិតថាពេលរៀបការរួច ខ្លួននឹងលែងសូវបានចេញទៅក្រៅ ដើរលេង ផឹកស៊ី ជាមួយមិត្តភក្តិរបស់ខ្លួនហើយ។ ពេលវេលាមួយភាគធំត្រូវបានប្រគល់ឱ្យទៅគ្រួសារ និង ភរិយាបាត់ទៅហើយ។
ទោះការដើរលេង ផឹកស៊ី ជាមួយមិត្តភក្តិខ្លួនជារឿងសំខាន់សម្រាប់មនុស្សប្រុសក៏ពិតមែន តែបើខ្លួនតាំងចិត្តចង់បង្កើតគ្រួសារហើយ គួរកាត់បន្ថយខ្លះ និង ព្យាយាមគិតពីទឹកចិត្តប្រពន្ធផងដែរ មិនមែនគិតតែពីអារម្មណ៍ខ្លួនចង់សប្បាយនោះទេ។
២. គិតថាមានប្រពន្ធ សេរីភាពខ្លួនត្រូវបាត់បង់៖
ជាធម្មតាទេ ពេលរៀបការហើយ បុរសជាប្តី គិតថា គេមិនអាចទៅណា ឬ ធ្វើអ្វីដែលខ្លួនចង់ដូចពេលនៅខ្លួនមួយនោះទេ តែក៏មិនដល់ថ្នាក់បាត់ពេញ ១០០%ដែរ។ ប្រុសៗដែលមានទម្លាប់ទៅណាមកណាតាមចិត្ត មិនដែលត្រូវមានការអនុញាតពីនរណានោះឡើយ។ ប៉ុន្តែក្រោយរៀបការ ពួកគេខ្លះ ហាក់បីដូចជាប្រពន្ធ ឆក់យកនូវសេរីភាពរបស់គេ។
ជាក់ស្តែង មិនមែនមនុស្សស្រីគ្រប់រូបសុទ្ធតែបិទសិទ្ធិ មិនឱ្យទៅណា ឬ ធ្វើអ្វីសោះនោះដែរ។ បើបុរសជាប្តី មានហេតុផលច្បាស់លាស់ ពន្យល់ដោយសម្រួល ឬ មិនញឹកញាប់ពេក នារីដែលជាភរិយាច្បាស់ជាអាចយល់បាន និង មិនហាមឃាត់នោះទេ។
៣. ប្រាក់ខែ ឬ ចំណូលត្រូវប្រគល់ឱ្យប្រពន្ធទុកដាក់៖
បុរសជាប្តីអាចគិតថា ហេតុអ្វីក៏ខ្លួនមិនមែនជាអ្នកទុកដាក់ នូវចំណូលដែលខ្លួនខំរក ហើយត្រូវប្រគល់ជូនប្រពន្ធទៅវិញ? ការដែលតែងតែគិតបែបនេះហើយ ទើបធ្វើឱ្យបុរសកាន់តែមានមតិអវិជ្ជមានចំពោះ ជីវិតប្តីប្រពន្ធ។
ជីវិតគូច្រើនមានការចំណាយរួម ហើយប្តីក៏មានកាតព្វកិច្ចច្រើនទៀតត្រូវធ្វើ ដូចនេះហើយភាគច្រើនប្រពន្ធជាអ្នកទុកដាក់ការងារ រឿងចំណូលចំណាយនៅក្នុងគ្រួសារ។ យ៉ាងណាមិញ បើបុរសជាប្តីមានបញ្ហារឿងនេះ គប្បីជជែកគ្នាមុនរៀបអាពាហ៍ពិពាហ៍ ចៀសវាងមានការមិនពេញចិត្តក្រោយរៀបការ។
៤. ស្មោះស្ម័គ្រជាមួយប្រពន្ធ៖
ប្រុសៗដែលមានប្រពន្ធហើយ មិនអាចមានទំនាក់ទំនងជាមួយមនុស្សស្រីដទៃដាច់ខាត។ ចំណុចនេះច្រើនជាចំណុចដែលបុរសភាគច្រើនមិនអាចធ្វើបាន ក៏ជាមូលហេតុចំបងដែលពួកគាត់មិនសូវចង់រៀបការដែរ ព្រោះគាត់គិតថាត្រូវ ចំណាយពេល ១ជីវិតដើម្បីរស់នៅ ស្មោះស័្មគ្រ និង ស្រឡាញ់ទៅលើនារីតែមួយរូបគត់ ដែលជាប្រពន្ធនោះ។
ប្រុសៗ អាចចៀសវាងមានថា អារម្មណ៍ក្រោយរៀបការ ដូចជាប់ក្នុងគុកឥតជាញ្ជាំង៖
សូមមានភាពច្បាស់លាស់សិន មុនសម្រេចចិត្តរៀបការ ដើម្បីកសាងគ្រួសារជាមួយនារីណាម្នាក់ដែលមានការស្រឡាញ់ទៅវិញទៅមក។ បុរសគួរគិតឱ្យគ្រប់ជ្រុងជ្រោយ និងឱ្យបានច្បាស់ ជាពិសេសរឿងតាំងចិត្តរស់នៅជាមួយនាងអស់មួយជីវិត។ អ្នកមិនអាចមានទំនាក់ទំនងជាមួយស្រីណាផ្សេង ក្រៅពីការរាប់អានបែបមិត្តធម្មតា។ បើអ្នកគិតថា អ្នកនឹងមិនអាចធ្វើបានទេ សូមកុំទៅបំផ្លាញជីវិតរបស់នារីម្នាក់ដែលនាងមិនដឹងអ្វី ហើយតាំងចិត្តស្មោះស័្មគ្រនឹងអ្នកមួយជីវិតនោះអី៕
អានបន្ត៖ ដាច់ខាតកុំរៀបការជាមួយបុរសដែលមានទម្លាប់១០យ៉ាងនេះ