សម័យនេះរវាង លុយ និងចិត្ត តើគួរជ្រើសរើសមួយណា?

2019-12-05 02:00:00
ចំនួនមតិ 0 | ចំនួនចែករំលែក 0

គេថាលុយគ្រាន់តែជារបស់ក្រៅខ្លួន ប៉ុន្តែអត់វា នឹងពិបាកក្នុងខ្លួន។ ពិតណាស់ លុយជារបស់ក្រៅពិតមែន ប៉ុន្តែវាពិតជាសំខាន់សម្រាប់ការរស់នៅក្នុងសង្គមនេះ។ ក្ដីស្រលាញ់គឺជាអារម្មណ៍ដែលយើងមិនអាចរកអ្វីមកជំនួសបាន ខណៈដែលលុយនៅពេលខ្លះយើងអាចរកអ្វីមកជំនួសបាន។ យ៉ាងណាក្ដី គូស្នេហ៍ជាច្រើនត្រូវចែកផ្លូវគ្នា ព្រោះរឿងលុយ ព្រោះបើទោះបី ស្រលាញ់គ្នាខ្លាំងប៉ុណ្ណា តែបើត្រូវហូបបាយជាមួយដុំអំបិល ប្រាកដជាគ្មានអ្នកណាមកទ្រាំលំបាកជាមួយយើងនោះទេ។

រូបតំណាង

មនុស្សមួយចំនួនមានសំណាងល្អ ដែលបានជួបមនុស្សដែលអាចទទួលយកឋានៈរបស់ខ្លួន និងអត់ធនឆ្លងកាត់ការលំបាកជាមួយគ្នាបាន ដើម្បីកសាងអនាគតរួមគ្នា ហើយនៅពេលពួកគេបានថ្កុំថ្កើង មិនថាមានបញ្ហា ឈ្លោះគ្នា គេនឹងលួងលោម និងខ្វាយខ្វល់គ្នាជានិច្ច ព្រោះពួកគេនឹកដល់ពេលដែលលំបាកជាមួយគ្នា។ វាប្រៀបដូចជាការពិសោធន៍ឲ្យពួកគេដឹងថា នេះហើយគឺជាមនុស្សដែលស្រលាញ់គេពិតប្រាកដ។

រូបតំណាង

ប៉ុន្តែមនុស្សខ្លះសំណាងមិនល្អក៏បានជួបអ្នកដែលមើលឃើញតែលុយ មើលឃើញភាពស្រណុកសប្បាយច្រើនជាងក្ដីស្រលាញ់។ មានហេតុផលជាច្រើនដែលធ្វើឲ្យមនុស្សជាទីស្រលាញ់របស់យើងត្រូវចាកចេញ ប៉ុន្តែវាក៏មិនមែនជាកំហុសរបស់គេដែរព្រោះវាជាតម្រូវការ វាជាក្ដីសុខរបស់គេ ដែលយើងគ្មានសិទ្ធិបង្ខំ ឬហាមគេមិនឲ្យគិតបែបហ្នឹងនោះឡើយ។ បើយើងមានគ្រប់យ៉ាងឲ្យគេរស់នៅសុខស្រួលហើយ ប៉ុន្តែគេបែរមិនពេញចិត្តទៀត គួរតែដោះលែងគេទៅ ហើយគួរទុកពេលចាំមនុស្សដែលគេពេញចិត្តនូវអ្វីដែលយើងមាន និងព្រមសាងអនាគតជាមួយយើងវិញប្រសើរជាង។

រូបតំណាង

អ្នកខ្លះគឺលើសពីសំណាងអាក្រក់ មានមនុស្សដែលខ្លួនស្រលាញ់ហើយ ប៉ុន្តែបែរជាត្រូវលំបាក ព្រោះគេមិនដែលជួយ គ្មានទំនួលខុសត្រូវ ប៉ុន្តែបែរជាចេះបំផ្លាញទ្រព្យតែម្យ៉ាងគត់។ កសាងមកបានប៉ុណ្ណា រកបានប៉ុណ្ណា ក៏មិនចេះស្កប់ស្កល់។ ជួបបែបនេះគឺសឹងតែចង់ត្រលប់រស់នៅម្នាក់ឯងវិញ ព្រោះស្រលាញ់គ្នាហើយមានតែក្រ រលាយហិនហោចទៅៗ។

ការមាននរណាម្នាក់ជាគូជីវិត បើចង់បានដៃគូល្អ គឺទាល់តែយើងមានអ្វីល្អដែរ។ វាពិតហើយដែលលុយមិនសំខាន់ស្មើចិត្ត ឬក្ដីស្រលាញ់ ប៉ុន្តែវាគឺជាអ្វីដែលធ្វើឲ្យជីវិតគូដំណើរទៅរលូនបាន។ សម័យនេះមានចិត្តតែម្យ៉ាង គឺមិនគ្រប់គ្រាន់នោះទេ គឺត្រូវចេះជួយគ្នាដែរ ជួយគ្នារកស៊ី ជួយគ្នាធ្វើការ ជួយមើលថែគ្នា ជួយសន្សំគ្នា។ បើជាមេផ្ទះ ត្រូវធ្វើជាមេផ្ទះល្អ បើជាមេគ្រួសារ ក៏ត្រូវធ្វើជាអ្នកដឹកនាំដែលល្អ នោះទើបជីវិតគូរបស់យើងអាចគង់វង្សយូរអង្វែង ៕

ចុចអាន៖

អត្ថបទ៖ ស្វាយ វ៉ាន់ថន