បុរសឆាប់អស់ចិត្តលឿនបំផុត បើអ្នកមិនកម្ចាត់ចរិតគួរឲ្យធុញទាំងនេះចេញពីខ្លួន

2019-12-02 05:20:00
ចំនួនមតិ 0 | ចំនួនចែករំលែក 0

មនុស្សប្រុសតែងនិយាយរឿយៗថា ស្រីៗឲ្យតែពេលមានស្នេហា គឺឆាប់បញ្ចេញប្រតិកម្មហួងហែងនឹងដៃគូខ្លាំង រហូតដល់ពេលខ្លះគ្រប់គ្រងអារម្មណ៍លែងបាន ធ្វើអ្វីគ្មានហេតុផល។ ទោះបីជាអ្នកមានក្តីស្រលាញ់លើសលប់ចំពោះដៃគូយ៉ាងណាក៏ដោយ ដាច់ខាតគួរកម្ចាត់ទម្លាប់គួរឲ្យធុញចេញពីខ្លួន បើមិនចង់ឲ្យគេឆាប់អស់ចិត្ត លែងចង់នៅក្បែរតទៀត។

១. ម្ចាស់ក្សត្រីនៃភាពអវិជ្ជមាន

រូបតំណាង

សម្រស់ស្អាតទាក់ទាញ ក៏មិនអាចដក់ជាប់ក្នុងបេះដូងរបស់គាត់បានយូរ ដរាបណាអ្នកប្រកាន់នូវគំនិតអវិជ្ជមាន ក្រញេវក្រញូវមិនស្រស់ស្រាយ ចាំចាប់តែកំហុស មើលមិនឃើញពីចំណុចល្អនិងតម្លៃដែលគាត់មាន។ ទាំងនេះហើយ ជាហេតុធ្វើឲ្យគ្មានកម្លាំងចិត្តចង់បន្តនៅអង្វែងជាមួយអ្នក។

២. ទន្ទឹងចាំឲ្យខាងប្រុសចេញលុយគ្រប់ពេល

មនុស្សប្រុសបានរងសម្ពាធពីតួនាទីចេញលុយប៉ាវខាងស្រីពេលញ៉ាំអី ប៉ុន្តែវាមិនមែនជាកាតព្វកិច្ចរបស់គាត់ឡើយ។ គាត់មិនមែនជាម្តាយឪពុក ដែលត្រូវចិញ្ចឹមឲ្យលុយអ្នកចាយគ្រប់ពេល ហើយគាត់ក៏អាចជួបបញ្ហាហិរញ្ញវត្ថុដូចគ្នា ដូច្នេះហើយកុំរំពឹងដាក់បន្ទុកតែម្ខាងៗ។ បើស្រលាញ់ពិត គួរចេះចែករំលែកគ្នាទៅវិញទៅមក។

៣. ប្រកាន់ជំហរខ្លួនឯងខ្ពស់ជ្រុល

រូបតំណាង

មនុស្សម្នាក់ៗតែងមានគុណវិបត្តិរៀងៗខ្លួន។ បើដឹងថាមានចំណុចណាមួយមិនល្អហើយ ត្រូវកែប្រែចេញកុំទុកយូរ។ កាលណាអ្នកនៅប្រកាន់ជំហរខ្លួនឯងជ្រុល មិនអាចសម្របខ្លួន ចង់ឲ្យគេតាមចិត្តជានិច្ច រហូតដល់ថ្ងៃណាមួយ ភាពអត់ធ្មត់របស់គាត់ត្រូវរលត់ ស្នេហាក៏គង់តែរលត់ទៅតាមហ្នឹងដែរ។

៤. បិទសិទ្ធសេរីភាពជិតឈឹង

រូបតំណាង

ហាមឃាត់សឹងគ្រប់រឿងទាំងអស់ មិនថាការជួបជុំមិត្តភ័ក្តិ ធ្វើដំណើរកម្សាន្ត និយាយលេងជាមួយមិត្តស្រីៗ គឺសុទ្ធតែត្រូវបានអ្នកបិទសិទ្ធគ្មានសល់។ មិនទាន់ក្លាយជាប្តីប្រពន្ធផង ប៉ុន្តែគ្មានសេរីភាពផ្ទាស់ខ្លួនសូម្បីបន្តិច ស្នេហាផ្ទុកទៅដោយការខ្វះទំនុកចិត្ត តើនរណាចង់រស់នៅជាមួយអ្នកអស់ពេញមួយជីវិតនោះ?

ដើម្បីឲ្យស្នេហាទៅមុខដោយរលូន ត្រូវតែចេះយល់ពីគ្នាទៅវិញទៅមក និងចូលរួមចំណែកទាំងសងខាងទើបបាន៕