វិធីសាស្រ្តកសាងទំនុកចិត្ត និងទទួលយកការផ្លាស់ប្តូរថ្មីៗក្នុងជីវិត

2019-11-21 04:25:00
ចំនួនមតិ 0 | ចំនួនចែករំលែក 0

នៅក្នុងជីវិត មានរឿងជាច្រើនដែលយើងមិនអាចគ្រប់គ្រងបាន ក្នុងនោះក៏មានការផ្លាស់ប្តូរផងដែរ។ ការផ្លាស់ប្តូរមិនមែនជារឿងអាក្រក់ទាំងអស់នោះទេ គ្រាន់តែវាពិបាកនឹងទទួលយកបន្តិចពីដំបូង។ ការផ្លាស់ប្តូរធ្វើឱ្យយើងអាចបោះបង់រឿងចាស់ចោលបានខ្លះ និង ធ្វើឱ្យដឹងថាខ្លួនរឹងមាំប៉ុណ្ណា។ ខាងក្រោមនេះជាគន្លឹះខ្លះៗដែលជួយឱ្យអ្នករៀនទទួលយកការផ្លាស់ប្តូរថ្មីៗនៅក្នុងជីវិត៖

រូបតំណាង

**១. ស្វែងរកអ្វីដែលអ្នកខ្លាច**

ជំហានដំបូងដើម្បីទទួលយកការផ្លាស់ប្តូរថ្មី គឺត្រូវលះបង់រឿងអតីតកាលចោលសិន ហើយដើម្បីបោះវាចោល អ្នកត្រូវដឹងថា តើការផ្លាស់ប្តូរថ្មីនោះវាធ្វើឱ្យអ្នកពិបាកទទួលយកត្រង់ចំណុចណា។ ឧទាហរណ៍ថាអ្នកខ្លាចបាត់បង់ការងារមួយដែលអ្នកស្រលាញ់ អ្នកមិនអាចទទួលយកបានទេបើវាជាការពិត ប៉ុន្តែអ្នកត្រូវចាំថាការបាត់បង់អ្វីមួយ នឹងផ្តល់ឱ្យអ្នកនូវអ្វីថ្មីមូយទៀត ហើយអ្វីដែលថ្មីនោះ វាអាចប្រសើរជាងអ្វីដែលអ្នកធ្លាប់មាននោះទៀតក៏ថាបាន។

រូបតំណាង

២. គួរដឹងថាអ្វីដែលអាចស្ថិតនៅក្រោមការគ្រប់គ្រងរបស់អ្នក

គ្មាននរណាម្នាក់ទៅគ្រប់គ្រងរឿងរ៉ាវបានគ្រប់សព្វនោះទេ តែអ្នកគួរទទួលយកថា មានរឿងខ្លះវាចាំបាច់គង់កើតឡើង ទោះជាអ្នកខំប្រឹងទប់ស្កាត់វាមិនឱ្យកើតឡើងក្តី។ អ្នកអាចប្រើទស្សនៈមួយនេះ ដើម្បីយកឈ្នះនូវការផ្លាស់ប្តូរ ហើយបន្តដំណើរទៅមុខទៀតនៅលើឆាកជីវិតមួយនេះ។

រូបតំណាង

៣. កុំខ្វល់ខ្វាយច្រើនពេក! ព្យាយាមដោះស្រាយបញ្ហាតាមសម្រួលទៅ

ពេលខ្លះ ការព្រួយបារម្ភហួសហេតុរបស់អ្នកមិនអាចជួយដោះស្រាយអ្វីបាននោះទេ វាមានតែបន្ថែមនូចបញ្ហាដល់អ្នក។ អ្នកគួរគិតថា យើងមិនមែនទេវតានោះទេ រឿងខ្លះដោះបានចាំដោះ បើដោះមិនបានទេ បណ្តោយតាមយថាកម្មទៅចុះ ហើយខំតាំងស្មារតីឱ្យមាំក្នុងការត្រៀមទទួលយកនូវការផ្លាស់ប្តូរនោះទៅចុះ ៕

ជារួម ដើម្បីងាយស្រួលក្នុងការទទួកយកនូវការផ្លាស់ប្តូរនៅក្នុងជីវិត មិនថារឿងការងារ គ្រួសារ មិត្តភ័ក្ត ឬ រឿងស្នេហាក្តី អ្នកគួរឧស្សាហ៍ដាស់តឿនខ្លួនឯងថា អ្វីៗនៅលើលោកនេះគឺមិនទៀងឡើយ ហើយមានតែការផ្លាស់ប្តូរទេដែលមិនផ្លាស់ប្តូរ៕