តើពិតទេ ដែលស្រលាញ់ត្រូវតែហួងហែង?
- 2019-11-19 04:45:00
- ចំនួនមតិ 0 | ចំនួនចែករំលែក 0
តើពិតទេ ដែលស្រលាញ់ត្រូវតែហួងហែង?
ជាការពិតណាស់ ការហួងហែងភាគច្រើនគឺ មកពីការស្រលាញ់នោះឯង ទើបបណ្តាលឱ្យមនុស្សភាគច្រើននិយាយថា បើស្រលាញ់អ្នកណាម្នាក់ត្រូវតែហួងហែង ត្រូវតែខ្វាយខ្វល់គ្រប់ពេល ទើបគេហៅថាស្រលាញ់។ តើមតិមួយនេះ ជាការពិតឬយ៉ាងណា?
ការស្រលាញ់ជាទូទៅ តែងមានលេចចេញនូវសកម្មភាពខ្វល់ខ្វាយ បារម្ភ និងយកចិត្តទុកដាក់ចំពោះដៃគូរបស់អ្នកជាមិនខាន។ មនុស្សភាគច្រើន តែងសម្តែងចេញនូវអារម្មណ៍របស់ខ្លួនតាមរយៈកាយវិការ និង ពាក្យសម្តី ដែលកាយវិការនិងសម្តីនោះផងដែរ តែងបង្កប់នូវ ការយកចិត្តទុកដាក់ ទៅកាន់មនុស្សដែលយើងស្រលាញ់។ ចម្លើយគឺស្ថិតនៅលើថា តើអ្នកដែលយើងហួងហែង ខ្វល់ខ្វាយនោះ គេពេញចិត្តនឹងទង្វើនោះដែរឬទេ?
ពិតណាស់ មានអ្នកខ្លះជាមនុស្សចូលចិត្ត ការថ្នាក់ថ្នម ការបារម្ភ ការហួងហែង ពីមនុស្សដែលខ្លួនស្រលាញ់ ហើយប្រាថ្នាចង់បាននូវកាយវិការទាំងនោះ ទើបជឿជាក់ថាគេស្រលាញ់ និង យកចិត្តទុកដាក់ជាមួយខ្លួនពិតមែន។ ដូចនេះ សម្រាប់ពួកគាត់ អ្នកទាមទារបញ្ចេញនូវទង្វើ និង សម្ដីដែលបង្ហាញថាអ្នកពិតជា ខ្វល់ខ្វាយពីគាត់មែន។
ដោយឡែក មានអ្នកខ្លះទៀត មិនសូវពេញចិត្តនូវទង្វើហួងហែងច្រើននោះទេ ពួកគាត់គិតថា ការបញ្ចេញនូវកាយវិការ និង សម្តីខ្វល់ខ្វាយច្រើន គឺជាការរំខាន និង មិនផ្តល់សេរីភាពដល់ពួកគាត់។ ការស្រលាញ់ ពេលខ្លះមិនចាំបាច់ព្យាយាមបង្ហាញជ្រុល រហូតដល់ភាគីម្ខាងទៀតមានសម្ពាធនោះទេ។ បើភាគីម្ខាងទៀត មិនចូលចិត្តការហួងហែងច្រើន អ្នកគួរកាត់បន្ថយហើយព្យាយាមសម្របតាមគេវិញ។ វាក៏ដូចជា ការផ្តល់ឱកាសដើម្បីឱ្យពួកគេរៀនធ្វើអ្វីដោយខ្លួនឯង និង មានម្ចាស់ការលើខ្លួនឯងផងដែរ។
ដូចនេះ មិនមែនរាល់ការហួងហែង គឺត្រូវបានពេញចិត្តដោយភាគីម្ខាងទៀតនោះទេ។ ហើយក៏មិនមែនរាល់ការស្រលាញ់ ត្រូវតែបារម្ភ ខ្វល់ខ្វាយនោះដែរ គឺវាអាស្រ័យទៅលើភាគីដែលអ្នកស្រលាញ់ ថាតើគាត់ជាមនុស្សចូលចិត្តការហួងហែងនោះឬក៏អត់ ៕