ចង់មានក្ដីសុខ រឿងខ្លះចោលបានចោលទៅ កុំចង់ដឹងគ្រប់រឿងពេក

2019-11-18 04:40:00
ចំនួនមតិ 0 | ចំនួនចែករំលែក 0

ជីវិតមួយនេះគឺគ្មានពេលគ្រប់គ្រាន់សម្រាប់យើងខ្វល់ខ្វាយតែរឿងគេនោះឡើយ។ ដើម្បីក្លាយជាមនុស្សស្រីដែលមានសុភមង្គល គួរធ្វើតែជាមនុស្សល្អល្មមបានហើយ កុំល្អពេក។ ចេះដឹងល្មមបានហើយ កុំដឹងគ្រប់រឿងពេក។ មនុស្សស្រីយើងកើតមក ល្អតែមួយល្មមរស់បាន កុំរវល់តែគិតពីអ្នកដទៃហើយភ្លេចអាត្មាខ្លួនឯងឲ្យសោះ។ នារីយើងដឹងរឿងមួយល្មមបានហើយ កុំដឹងគ្រប់ជ្រុងជ្រោយ។ កុំរឿងអ្វីក៏ចំណាប់ អំរែកមួយណាក៏ប្រឹងរែក។ ចង់បានក្ដីសុខ កុំធ្វើជាមនុស្សល្អឥតខ្ចោះពេក។

មនុស្សប្រុសរស់នៅដោយការប្រើខួរក្បាល មនុស្សស្រីរស់នៅដោយប្រើមនោសញ្ចេតនា។ ដូច្នេះនៅពេលគោរពស្រលាញ់នរណាម្នាក់ហើយ មនុស្សស្រីនឹងធ្វើអស់ពីចិត្តដើម្បីមនោសញ្ចេតនាមួយនោះ។ បើសម្រាប់ស្នេហារបស់ខ្លួនវិញ ប្រសិនជាអាច គឺនាងអាចលះបង់បានគ្រប់បែបយ៉ាង។ ប៉ុន្តែនៅលើលោកនេះ ពេលខ្លះមិនឲ្យតែយើងជឿជាក់ ឲ្យតែយើងស្រលាញ់អ្នកដទៃ មិនមែនគេនឹងតបស្នងមកវិញដូចយើងដែរនោះទេ។

ខ្ញុំធ្លាប់ឮគេនិយាយជាច្រើនដងថា៖ ធ្វើបុណ្យឲ្យតែច្រើនទៅ ទេវតាមានភ្នែកមើលហើយ។ តែពេលខ្លះខ្ញុំសួរខ្លួនឯងថា តើជីវិតវែងគ្រប់គ្រាន់ដល់ថ្ងៃដែលយើងមើលឃើញបុណ្យទាំងនោះឬអត់។ ហើយរាល់អំពើល្អដែលយើងធ្វើចំពោះគេ តើនឹងបានផលអ្វី ឬក៏ពេលខ្លះបានត្រឹមធ្វើបុណ្យរន្ទះបាញ់ប៉ុណ្ណោះ? បើយើងល្អដល់ថ្នាក់បាត់បង់អស់អ្វីពីខ្លួន តើស័ក្ដិសមឬអត់?

មានមនុស្សស្រីខ្លះ ប្រឹងអស់ពីខ្លួន អស់ពីកាយ ក៏ដើម្បីតែចិត្តស្មោះរបស់មនុស្សប្រុសម្នាក់។ គេព្យាយាមក្លាយជាមនុស្សដែលល្អឥតខ្ចោះ គ្មានចន្លោះខ្វះខាត ដល់ពេលខ្លះត្រូវដើរតួជាអ្នកដទៃដែលមិនមានជាខ្លួនឯង តែចុងបញ្ចប់ក៏ទទួលបានតែការក្បត់ដដែល។ សួរថារាល់អ្វីដែលនាងលះបង់ តើស័ក្ដិសមនឹងទទួលបែបនេះឬអត់? ដូចនេះហើយ ធ្វើល្អអ្វីក៏ដោយ ក៏មានកំរិតទៅបានហើយ កុំដល់ថ្នាក់បោសគូទខោពេក អ្នកដែលខាតបង់គ្មានអ្នកណាក្រៅពីអ្នកដែលលះបង់នោះទេ។ រឿងខ្លះក៏ដូចគ្នា បើទម្លាក់បានខ្លះ ក៏ទម្លាក់ទៅ កុំអោបក្រសោបពេក ព្រោះមិនប្រាកដថាដឹងគ្រប់រឿងគឺល្អឡើយ រឿងខ្លះដឹងហើយមានតែនាំទុក្ខដាក់ខ្ឡួន៕