រឿង ៥ យ៉ាង មនុស្សស្រីរីករាយនិងមានទំនុកចិត្តខ្ពស់ មិនបណ្តោយឲ្យយាយីសុភមង្គលរបស់នាង

2019-11-05 08:50:00
ចំនួនមតិ 0 | ចំនួនចែករំលែក 0

មនុស្សស្រីដែលមើលទៅពោរពេញដោយភាពសប្បាយស្រស់ស្រាយ មិនមែនកើតមកមានស្រាប់ជាប់ខ្លួន ឬដោយសារតែគេមានលុយមានជីវិតខ្ពង់ខ្ពស់អីនោះដែរ។ ប៉ុន្តែគឺមកពីនាងអាចប្រកាន់ខ្ជាប់នូវគំនិតវិជ្ជមាន ចេះកែប្រែទុក្ខទៅជាក្តីសុខ ទោះកំពុងតែជួបបញ្ហា ឬស្ថិតក្នុងស្ថានភាពលំបាកយ៉ាងណាក៏ដោយ។

នាងយល់ច្បាស់ថា នៅក្នុងជីវិតមិនអាចទប់ស្កាត់រឿងរ៉ាវទាំងឡាយមិនឲ្យកើតឡើងបានទេ។ ភាពស្ត្រេស ការព្រួយបារម្ភ ការទទួលរងសម្ពាធ ភាពបរាជ័យ និងក្តីឈឺចាប់ផ្សេងៗ សុទ្ធតែគ្មាននរណាម្នាក់អាចជៀសផុត។ មនុស្សស្រីដែលជ្រើសរើសយកភាពរីករាយ និងមានទំនុកចិត្តខ្ពស់ តែងតែចេះគ្រប់គ្រងជីវិតបានល្អ និងមិនបណ្ដោយឲ្យរឿង ៥ យ៉ាងខាងក្រោមនេះ ចូលមកយាយីបំផ្លាញជីវិតនាងដាច់ខាត។

១. កំហុសរបស់នាង

កំហុសគឺជាផ្នែកមួយនៃជីវិត។ អ្វីដែលត្រូវចងចាំទុកនោះគឺ កំហុសដោយមិនបានព្រាងទុក មិនអាចវិនិច្ឆ័យពីសន្តានរបស់មនុស្សម្នាក់ៗបានទេ។ កំហុសក៏មិនអាចកំណត់ពីតម្លៃរបស់អ្នក រឹតតែមិនអាចមកបំផ្លាញសុភមង្គលរបស់អ្នក។ មនុស្សស្រីមានទំនុកចិត្តខ្ពស់ សប្បាយរីករាយនឹងរៀនសូត្រពីកំហុស និងចាត់ទុកជាមេរៀនដ៏ល្អ សម្រាប់ការពារខ្លួននាពេលអនាគត។

២. ការគិតរបស់អ្នកដទៃមកលើនាង

មនុស្សរីករាយពិតប្រាកដ ប្រៀបបានដូចជាផ្កាត្រូវទឹកសន្សើម។ ទោះបីមានអ្នកមិនចូលចិត្ត មានអ្នកបង្អាប់បន្ទាបពីសម្រស់ មើលមិនឃើញពីគុណសម្បត្តិ នាងនៅតែមានភាពស្រស់បំព្រង មិនស្វិតស្រពោនតាមពាក្យនិន្ទារបស់អ្នកដទៃ។ នាងជឿជាក់និងហ៊ានទទួលយកទាំងចំណុចខ្លាំងរួមទាំងចំណុចខ្សោយដែលខ្លួនមាន។ ពិសេសខ្លាំងបំផុត នាងរឹងមាំនិងដឹងច្បាស់ពីតម្លៃក្នុងខ្លួន ដែលគ្មានដាក់តាំងនៅទីសាធារណ។

៣. មិនព្រួយចិត្តដេកកើតទុក្ខចំពោះអ្វីដែលនាងគ្មាន

ពេលក្រឡេកមើលទៅអ្នកដទៃហាក់បីដូចជាគេមានសព្វគ្រប់អស់ ប៉ុន្តែបើអ្នកមិនទាន់មានដូចគេ ក៏មិនអីដែរ ព្រោះពេលវេលានៅវែងឆ្ងាយទៀត។ ដរាបណាអ្នកពេញចិត្តសប្បាយរីករាយនូវអ្វីដែលខ្លួនកំពុងមាន ត្បិតមិនទាន់ធុំដុំអីក៏ដោយ តែវាគឺជាកម្លាំងចិត្តដ៏ធំធេងដើម្បីជួយជំរុញអ្នកបន្តដំណើរឆ្ពោះទៅមុខ រហូតឈានទៅដល់គោលដៅដែលខ្លួនប្រាថ្នានៅថ្ងៃណាមួយមិនខាន។

៤. ភាពបរាជ័យដែលនាងបានឆ្លងកាត់

នារីរីករាយមានទំនុកចិត្ត មិនរារែកពេលជួបបរាជ័យ ហើយក៏មិនដែលចាត់ទុកវាជាចំណុចបញ្ចប់ដែរ។ សំខាន់នាងអាចពង្រឹងសមត្ថភាព បន្តភាពរឹងមាំ ដើម្បីចាប់ផ្តើមសាជាថ្មី។ នាងជឿជាក់យ៉ាងមុតមាំថា បើដើរដួលត្រូវតែចេះងើបដោយថាមពលនិងប្រាជ្ញា នោះឱកាសនឹងនៅតែមាន មិនអស់សង្ឃឹមលើកទង់សងាយៗឡើយ។

៥. វិប្បដិសារីក្នុងជីវិតរបស់នាង

ឥលូវនេះកំពុងតែរស់នៅជាមួយបច្ចុប្បន្នកាលទេតើ ចុះហេតុអ្វីត្រូវស្តាយក្រោយ ផុងជាប់ជាមួយរឿងអតីតកាលនោះ? រឿងកន្លងផុតទៅហើយ មានវិប្បដិសារី ក៏មិនបានអ្វីមកវិញដែរ មានតែធ្វើឲ្យកើតទុក្ខព្រួយបារម្ភគ្រប់ពេលវេលា។ ហេតុនេះហើយកុំយកក្តីសុខនិងសុភមង្គលរបស់អ្នក ទៅចងជាប់ស្អិតជាមួយនឹងបញ្ហាអតីតឲ្យសោះ។