ពេលអ្នកកើតអាឡែហ្សី នេះជាអ្វីដែលអ្នកគួរដឹងដើម្បីកាត់បន្ថយបានឆាប់រហ័ស
- 2019-10-16 10:35:00
- ចំនួនមតិ 0 | ចំនួនចែករំលែក 0
ពេលអ្នកកើតអាឡែហ្សី នេះជាអ្វីដែលអ្នកគួរដឹងដើម្បីកាត់បន្ថយបានឆាប់រហ័ស
ជួនកាលរាងកាយអាចកើតអាឡែហ្សីបាននៅពេលប៉ះពាល់នឹងអាកាសធាតុ គ្រឿងសម្អាង អាហារ ។ អាឡែហ្សីធ្វើឲ្យអ្នកជំងឺមានអារម្មណ៍មិនស្រណុកស្រួល និងមិនសប្បាយចិត្តឡើយ។ ដូច្នេះហើយ កញ្ញា សូមបង្ហាញដំបូន្មានខ្លះៗសម្រាប់អ្នកមានបញ្ហាទាំងនេះ។
១. មានបញ្ហាអាឡែហ្សីលើស្បែកមុខ
ដំណោះស្រាយ ដំបូងត្រូវកំណត់អត្តសញ្ញាណដែលបណ្ដាលឲ្យកើតវាសិន។ វាអាចមកពីការប៉ះពាល់នៃបំពុលបរិយាកាស ទឹកមិនស្អាត អាហារមានសារជាតិអាឡែហ្ស៊ី គ្រឿងសម្អាងមិនត្រូវនឹងស្បែក ជាដើម។ វានឹងលេចរមាស់លើស្បែក មុខក្រហម មានចំណុចតូចៗកន្ទួលជាដើម។ ករណីធ្ងន់ធ្ងរជាងនេះ ស្បែកនឹងរមាស់បែបក្រហាយៗ ហើយស្ងួតខ្លាំង។ លើសពីនេះ អមដោយរោគសញ្ញាដូចជា ហើមបបូរមាត់ ហើមអណ្ដាត ភ្នែកក្រហម ឬរមាស់ជាដើម។
-ដូច្នេះតើគួរដោះស្រាយបែបណា?
-ប្រើប្រេងដូង៖ លាបប្រេងដូងធម្មជាតិសុទ្ធ ដោយម៉ាស្សាថ្នមៗលើមុខប្រហែល៥ -១០ នាទីហើយលាងទឹកចេញ។
-ប្រើទឹកដោះគោជូ៖ លាងមុខឲ្យស្អាត បន្ទាប់មកយកទឹកដោះជូ (គ្មានជាតិស្ករ) លាបលើមុខ។ ម៉ាស្សាដោយទុកចោល២០នាទីហើយលាងទឹកចេញ។
-ប្រើទឹកអំបិល៖ ស្បែកមុខរបស់អ្នកបានចាប់ផ្ដើមជាប្រភេទប្រតិកម្មនិងស្ដើងហើយ។ ម្ល៉ោះហើយ អ្នកគួរលាងមុខដោយទឹកអំបិលដែលមានកំហាប់ ០,៩%។ វានឹងជួយលាងសម្អាតមេរោគលើស្បែកព្រមទាំងការពារការខូចខាតនៃស្បែកថែមទៀត។
-ប្រើប្រទាលកន្ទុយក្រពើ៖ យកចាហួយរបស់ប្រទាលនេះលាបមុខ ហើយម៉ាស្សាថ្នមៗពិសេសត្រង់បរិវេណរោលក្រហម។ ទុកចោល២០នាទី ហើយលាងដោយទឹកក្តៅ។
បើកន្ទួលក្រហមនោះធ្ងន់ធ្ងររហូតមានខ្ទុះ និងពងបែក អ្នកគួរប្រញាប់ទៅជួបគ្រូពេទ្យ។
២. ស្បែកអាឡែហ្ស៊ីដោយសារម្ហូបអាហារ
វាមកពីគ្រឿងផ្សំមួយចំនួននៅក្នុងអាហារ ដែលធ្វើឲ្យកើតអាឡែហ្សី។ ពេលម្ហូបផ្ទុកជាតិអាឡែហ្ស៊ី ប្រព័ន្ធភាពស៊ាំរបស់រាងកាយនឹងយល់ច្រឡំថា អាហារខ្លះមានគ្រោះថ្នាក់។ ដូច្នេះហើយ ប្រព័ន្ធភាពស៊ាំនឹងផលិតអង្គបដិប្រាណដែលហៅថា immunoglobulin E (IgE) ។ អង្គបដិប្រាណទាំងនេះនឹងដើរតួលើប្រព័ន្ធភាពស៊ាំដើម្បីបញ្ចេញអ៊ីស្តាមីន។ ទាំងនេះនឹងបង្កឲ្យមានអាឡែហ្សីមួយចំនួនដូចជា រមាស់ ហៀរសំបោរ បំពង់កស្ងួត ក្អួតចង្អោរ ថប់ដង្ហើមជាដើម។
ជារឿយៗអាហារដែលច្រើនមានអាឡែហ្សីកើតលើមនុស្ស ជាប្រភេទអាហារសមុទ្រ សណ្ដែកដី ស៊ុត និងប្រភេទត្រីមួយចំនួន។ មធ្យោបាយតែមួយគត់ដើម្បីចៀសវាងអាឡែហ្សីអាហារគឺចៀសវាងអាហារដែលបង្កឲ្យមានប្រតិកម្មរមាស់។
-ដើម្បីការពារ អ្នកគួររក្សាចិត្តនូវទម្លាប់ដូចជា៖
-ចៀសវាងបរិភោគអាហារដែលហួសគុណភាព និងមិនសូវមានជីវជាតិ
-ចាក់ថ្នាំប្រឆាំងនឹងប្រតិកម្មអាឡែហ្សី
-ប្រាប់សាច់ញាតិឬទៅជួបគ្រូពេទ្យ ពេលសង្ស័យថាអាឡែហ្សីអាហារ
-មានអនាម័យចង្រ្កានបាយ ចៀសវាងមេរោគបង្កជាអាឡែហ្សីលើអាហារ។
៣. ប្រការដែលមិនគួរធ្វើ នៅពេលដឹងថាមានអាឡែហ្សី
មិនថាអាការៈអាឡែហ្ស៊ីបណ្ដាលឲ្យរមាស់លើរាងកាយឬមុខ អ្នកត្រូវយកចិត្តទុកដាក់ចៀសវាងរឿងមួយចំនួនកុំឲ្យប្រតិកម្មកាន់តែធ្ងន់ធ្ងរ។
-កុំងូតទឹកក្តៅខណៈរាងកាយកំពុងរមាស់
-កុំអេះ ព្រោះនឹងធ្វើឲ្យការរមាស់កើនឡើងនិងជំរុញឲ្យកម្រិតអាឡែហ្សីឈានទៅស្ថានភាពយ៉ាប់យឺន
-កុំប្រើសាប៊ូមានផ្ទុកជាតិកាត់ខ្លាំង ពិសេសសាប៊ូដុំ ដែលបណ្តាលឲ្យស្បែកទៅជារលាក
-កុំប្រើថ្នាំលេបផ្តេសផ្តាស គួរតែលេបថ្នាំតាមវេជ្ជបញ្ជា
-ករណីអាឡែហ្ស៊ីធ្ងន់ធ្ងរ គប្បីចៀសវាងអាហារមានជាតិស្ករនិងអំបិល ព្រោះធ្វើឲ្យគ្រឿងក្នុងរបស់អ្នកមិនប្រក្រតី។
-ចៀសវាងទទួលទានសុរា កាហ្វេ ឬជក់បារី
-ប្រសិនបើអ្នកកំពុងមានអាការៈហើមពោះ គួរកាត់បន្ថយអាហារដែលមានទឹកច្រើនដូចជាស៊ុប និងត្រូវផឹកទឹកល្មមបានហើយ។
យ៉ាងណាក៏ដោយ ឱសថខាងលើអាចមានប្រសិទ្ធភាពចំពោះតែអាឡែហ្សីស្រាលៗប៉ុណ្ណោះ។ ករណីធ្ងន់ធ្ងរ អ្នកត្រូវទៅជួបគ្រូពេទ្យដើម្បីទទួលការព្យាបាលប្រសើរជាងនេះ៕
ចុចអាន៖ គុណសម្បត្តិខ្ពស់! ជំងឺអាចកាត់បន្ថយបាន ដោយគ្រាន់តែលាងដៃ