ឧស្សាហ៍តានតឹងអារម្មណ៍និងស្រ្តេសច្រើន គួរដឹងពីវិធីងាយៗ ដើម្បីលុបបំបាត់ឲ្យទាន់ពេលវេលា

2019-10-16 04:50:00
ចំនួនមតិ 0 | ចំនួនចែករំលែក 0

ភាពស្រ្តេសនិងការតានតឹងថប់អារម្មណ៍ បានកើតឡើងទៅលើមនុស្សជាច្រើន នៅជុំវិញសកលលោក។ ជាក់ស្តែង មានមនុស្សវ័យជំទង់ ៧០% ហើយ ដែលរស់នៅសហរដ្ឋអាមេរិក បានទទួលរងឥទ្ធិពលពីបញ្ហាទាំងនេះ។ យ៉ាងណាក៏ដោយ មានវិធីច្រើនណាស់ ដែលអ្នកអាចយកទៅអនុវត្ត ដើម្បីកាត់បន្ថយនិងបំបាត់ភាពធុញថប់ អាការៈស្រ្តេស បានយ៉ាងមានប្រសិទ្ធភាព។ កុំបណ្តោយឲ្យវានៅតោងទាមក្នុងខ្លួនយូរពេក ព្យាយាមបណ្តេញចេញបន្តិចៗម្តង អ្នកនឹងបានធូរស្រាលប្រសើរឡើងវិញ ថែមទាំងអាចការពារមិនឲ្យស្ថានភាពកាន់តែធ្ងន់ធ្ងរ។

រូបតំណាង

**១. ធ្វើលំហាត់ប្រាណ**

ការហាត់ប្រាណ ជារឿងសំខាន់បំផុត ដែលអាចជួយបំបាត់ស្រ្តេសបានយ៉ាងល្អ។ ដរាបណាអ្នកបានហាត់ប្រាណបញ្ចេញញើសជាប្រចាំ ការប្រឈមនឹងភាពតានតឹងស្មុគស្មាញ ស្ទើរតែធ្លាក់ចុះដល់កម្រិតសូន្យ ប្រសើរជាងអ្នកដែលមិនបានហាត់ប្រាណទាល់តែសោះ។

អត្ថប្រយោជន៍សំខាន់ៗមានដូចជា៖

កាត់បន្ថយកម្រិតអ័រម៉ូនដែលបណ្តាលឲ្យស្រ្តេស រួមមាន ក័រទីសុល និងអង់ដូហ្វីន។
អាចធ្វើឲ្យអ្នកគេងលក់ស្កប់ស្កល់ មិនគិតរវើរវាយច្រើន។
ជួយឲ្យរាងកាយមានថាមពល បង្កើនការជឿជាក់ និងពង្រឹងសុខភាពផ្លូវចិត្ត។

ព្យាយាមជ្រើសរើសវិធីហាត់ប្រាណណាមួយដែលអ្នកចូលចិត្ត អាចជួយឲ្យអារម្មណ៍ស្រស់ថ្លា មានដូចជា ការដើរ ការរាំ ហាត់យ៉ូហ្គាជាដើម។

រូបតំណាង

២. គិតគូពីអាហារ

កុំមើលឲ្យសោះ សូម្បីអាហារមួយចំនួនដែលអ្នកញ៉ាំ ក៏អាចកែខៃបញ្ហាស្រ្តេសនិងតានតឹងបានដែរ។ ក្នុងនោះមានដូចជា៖

ស្លឹកប្រេងខ្យល់៖ វាស្ថិតនៅក្នុងប្រភេទស្លឹកដែលមានក្លិនឈ្ងុយនិងហឹរតិចៗ ដែលត្រូវបានគេរកឃើញថា អាចប្រឆាំងនឹងអារម្មណ៍ធុញថប់។

រូបតំណាង

អាហារដែលមាន អាស៊ីដអូមេហ្គា ៣៖ វាអាចជួយកាត់បន្ថយស្រ្តេសបាន ២០%។ អាហារទាំងនោះរួមមាន ត្រីសាល់ម៉ុន ផ្លែបឺរ ស៊ុត ផ្កាខាត់ណាខៀវ កូនស្ពៃ គ្រាប់អាល់ម៉ុន...។

រូបតំណាង

តែបៃតង៖ វាមានសារធាតុ phenolic ខ្ពស់ មានអត្ថប្រយោជន៍ច្រើនចំពោះសុខភាព ថែមទាំងអាចធ្វើឲ្យកម្រិត serotonin កើនឡើង ជាហេតុជួយកាត់បន្ថយស្រ្តេសនិងអារម្មណ៍តានតឹង។

៣. អុជទៀន

រូបតំណាង

គួរអុជទៀនជាមួយនឹងប្រេងដែលមានក្លិនក្រអូបប្រហើរ ដើម្បីជួយឲ្យអារម្មណ៍ស្រស់ស្រាយ។ អ្នកអាចជ្រើសរើសក្លិន ផ្កាឡាវេនឌ័រ ផ្កាកុលាប ឬក្លិនក្រូចជាដើម។ នេះជាវិធីព្យាបាលដោយប្រើប្រេងក្រអូប អាចជួយឲ្យអារម្មណ៍ស្រស់ថ្លា និងគេងលក់ស្រួល។

៤. កាត់បន្ថយភេសជ្ជៈដែលមានជាតិកាហ្វេអ៊ីន

រូបតំណាង

ជាតិកាហ្វេអ៊ីន មាននៅក្នុងកាហ្វេ តែ សូកូឡា និងភេសជ្ជៈផ្តល់ថាមពលផ្សេងៗ។ កាលណាផឹកវាកាន់តែច្រើន អារម្មណ៍តានតឹងនឹងកើនឡើងកាន់តែខ្លាំងដូចគ្នា។ បើអ្នកកត់សម្គាល់ថា ភេសជ្ជៈទាំងនោះ ធ្វើឲ្យអ្នកប្រឈមនឹងបញ្ហាពិតមែន ត្រូវព្យាយាមកាត់បន្ថយឬផឹកក្នុងកម្រិតសមល្មមមិនលើសប្រមាណ។

៥. កត់ត្រា

រូបតំណាង

នេះជាវិធីមួយ ដើម្បីអាចគ្រប់គ្រងភាពស្រ្តេស។ កុំព្យាយាមផ្តោតលើទុក្ខខ្លាំងពេក ត្រូវកត់ត្រារឿងល្អៗដែលបានកើតឡើងមកលើអ្នក។ មានតែគំនិតវិជ្ជមានប៉ុណ្ណោះ ដែលអាចនាំឲ្យជីវិតប្រសើរឡើង។

៦. ទំពាស្ករកៅស៊ូ

រូបតំណាង

សម្រាប់វិធីងាយៗនិងលឿនបំផុត ការទំពាស្ករកៅស៊ូអាចជួយអ្នកបាន។ នៅពេលទំពា ប្រៀបបានដូចជាអ្នកបានទៅដាស់ខួរក្បាលឲ្យភ្ញាក់ឡើង ថែមទាំងជួយឲ្យលំហូរឈាមទៅកាន់ខួរក្បាល មានដំណើរការល្អផងដែរ។

៧. ចំណាយពេលនៅជាមួយមិត្តភ័ក្តិនិងក្រុមគ្រួសារ

ការចូលរួមចំណែកពីមិត្តភ័ក្តិនិងក្រុមគ្រួសារ អាចជួយឲ្យអ្នកឆ្លងផុតពីភាពស្រ្តេស និងជួយកែប្រែស្ថានភាពឲ្យប្រសើរឡើង។ ប្រសិនបើអ្នកព្យាយាមផ្តាច់ខ្លួន សំងំនៅស្ងាត់តែម្នាក់ឯងច្រើនពេក អាចបណ្តាលឲ្យការធុញថប់កើនឡើងខ្លាំងជាងមុន។

រូបតំណាង

៨. សើច

អារម្មណ៍តានតឹងពិបាកកើតឡើងខ្លាំងណាស់ នៅពេលដែលអ្នកសើច។ សើចឲ្យបានច្រើន កាន់តែល្អសម្រាប់សុខភាព អាចជួយដល់ប្រព័ន្ធភាពស៊ាំនិងធ្វើឲ្យអារម្មណ៍ស្រស់ថ្លាទៅតាមហ្នឹងដែរ។ អាចនិយាយលេងជាមួយមិត្តជិតស្និទិ្ធ មនុស្សនៅជុំវិញខ្លួន និងមើលកម្មវិធីទូរទស្សន៍សប្បាយៗ ដើម្បីបង្កើនសំណើចដល់ខ្លួនឯងនិងអ្នកដទៃ។

រូបតំណាង

៩. មិនទុកកិច្ចការគរលើគ្នា

រូបតំណាង

កិច្ចការណាដែលសំខាន់ជាងគេ គួរព្យាយាមបញ្ចប់វាតាមលំដាប់លំដោយ ដាច់ខាតមិនត្រូវទុកចោលឲ្យនៅគរលើគ្នា ព្រោះវាអាចនាំភាពស្មុគស្មាញដល់ឲ្យអ្នកកាន់តែខ្លាំង មិនដឹងគួរធ្វើមួយណាទុកមួយណា។

១០. ហ្វឹកហាត់រៀបចំចិត្តឲ្យបានល្អ

នរណាក៏មានទុក្ខដែរនៅក្នុងជីវិត គ្រាន់តែគេមានវិធីសាស្ត្រផ្សេងៗគ្នា ក្នុងការជួយសង្គ្រោះខ្លួនឯង។សំខាន់អ្នកមិនបណ្តែតបណ្តាយឲ្យភាពតានតឹង ធុញថប់ កើតមានយូរខ្លាំងពេក។ ចង់បានក្តីសុខឬទុក្ខ វាជាជម្រើសផ្ទាល់ខ្លួនរបស់អ្នក។ គួរហ្វឹកហាត់រៀបចំចិត្តគំនិតឲ្យបានល្អរាល់ថ្ងៃ អ្នកនឹងអាចរស់នៅដោយភាពសប្បាយរីករាយរាល់ថ្ងៃ។

អារម្មណ៍ស្រស់ថ្លា មិនស្មុគស្មាញតានតឹង មិនត្រឹមតែមានផលវិជ្ជមានសម្រាប់ខ្លួនអ្នកប៉ុណ្ណោះទេ វាថែមទាំងអាចជះឥទ្ធិពលល្អសម្រាប់មនុស្សគ្រប់គ្នានៅជុំវិញខ្លួនផងដែរ៕