គំនិតអប់រំចិត្តសំខាន់ៗ ដែលមនុស្សស្រីឆ្លាត តែងអនុវត្តក្នុងសង្គមទំនើប

2019-10-11 08:00:00
ចំនួនមតិ 0 | ចំនួនចែករំលែក 0

ពីមួយដំណាក់កាលទៅមួយដំណាក់កាលក្នុងជីវិត មានទាំងពេលសប្បាយនិងពេលទុក្ខសោក។ គ្រាន់តែមនុស្សមួយចំនួន ពេកជួបបញ្ហា តែងយកទុក្ខដាក់ខ្លួនមិនព្រមលែង។ នេះហើយជាឧបសគ្គបណ្តាលឲ្យអ្នកធ្លាក់ទឹកចិត្ត និងដើរយឺតជាងគេ។ ក្នុងសង្គមទំនើបសម្បូរបែប មនុស្សស្រីឆ្លាត មិនអាចរវល់តែស្រ្តេសរហូតបានទេ។ ត្រូវតែចេះពីវិធីអប់រំចិត្ត មានគំនិតចាស់ទុំ អាចបត់បែនទៅតាមស្ថានការណ៍លំបាកៗរាប់មិនអស់។

គំនិតល្អសម្រាប់ការរស់នៅប្រចាំថ្ងៃ

រូបតំណាង

- គួររៀនធ្វើចិត្តឲ្យសប្បាយដោយខ្លួនឯង ពុំដូច្នោះទេគ្មាននរណាអាចជួយឲ្យអ្នករីករាយបានគ្រប់ពេលនោះឡើយ។

ប៉ុន្មានដងហើយ ដែលអ្នកធ្លាប់ឈឺចាប់ខ្វល់ចិត្ត ដោយសារតែពាក្យសម្តីអ្នកដទៃ? សួរថាតើធ្វើបែបនេះ បានអ្វីមកវិញទៅ?
ប្រសិនបើនៅតែខ្លាច មិនហ៊ានប្រឈមនឹងហានិភ័យផ្សេងៗ អ្នកគ្មានថ្ងៃអាចរៀននិងទទួលបានបទពិសោធន៍ថ្មីៗសម្រាប់ខ្លួនឯងទេ។
កុំព្យាយាមយកចំណុចខ្សោយរបស់ខ្លួន ទៅប្រៀបធៀបនឹងចំណុចខ្លាំងរបស់អ្នកដទៃច្រើនពេក។គួរងាកមកពង្រឹងសមត្ថភាព ខិតខំប្រឹងប្រែងឲ្យដល់ទីបំផុត។
គោរពឲ្យតម្លៃមនុស្សស្មើៗគ្នា មិនថាពួកគេនៅកម្រិតខ្ពស់ឬទាបនោះឡើយ។ ការមិនបែងចែករើសអើងទៅលើនរណាម្នាក់ នឹងជួយឲ្យចិត្តរបស់អ្នកស្រស់ស្រាយ។

គំនិតល្អៗសម្រាប់ស្នេហា

រូបតំណាង

ពេលមានស្នេហា អ្នកអាចសុំមតិយោបល់ពីមនុស្សជិតស្និទ្ធបាន ប៉ុន្តែដាច់ខាតកុំបណ្តាយឲ្យគំនិតអ្នកដទៃមានឥទ្ធិពលខ្លាំងជាងបេះដូងរបស់អ្នក។
ពេលឈឺចាប់ខ្លាំងកុំបន្ទោសលើស្នេហា គឺមកពីអ្នកចូលចិត្តរំពឹងទុកខ្ពស់ហួសហេតុពេក។ គ្រប់យ៉ាងមិនអាចឋិតថេរបានឡើយ បើវាទៅផុតហើយ កុំនៅស្តាយតទៀត។ កុំនៅភ័យខ្លាចព្រោះតែអតីតកាលមិនល្អ បើអ្នកក្លាហានក្នុងការចាប់ផ្តើមសាជាថ្មី អ្នកនឹងបានជួបរឿងថ្មីល្អៗ មិនមែនសុទ្ធតែអាក្រក់ដូចរឿងចាស់។
បើមានបុរសសុំស្រលាញ់ច្រើននាក់ក្នុងពេលតែមួយ ត្រូវប្រុងប្រយ័ត្នឲ្យបានល្អមុនសម្រេចចិត្ត។ ជ្រើសរើសនរណាដែលគិតថាស័ក្តិសមនឹងទទួលបានបេះដូងរបស់អ្នក។

គំនិតល្អៗសម្រាប់នៅកន្លែងធ្វើការ

រូបតំណាង

មិត្តរួមការងារត្រូវតែមានចិត្តចេះជួយគ្នាទៅវិញទៅមក ស្របពេលជាមួយគ្នានេះដែរ អ្នកក៏គួរតែចេះការពារដើម្បីកុំឲ្យគេកេងយកផលប្រយោជន៍លើទឹកចិត្តដ៏ល្អរបស់អ្នក។
អ្នកអាចនឹងគិតថា ការងារដែលខ្លួនកំពុងធ្វើសព្វថ្ងៃ គឺងាយស្រួលថែមទាំងប្រាក់ខែច្រើនគួរសមដែរ ប៉ុន្តែពេលខ្លះ អ្នកបានមើលរំលង ថាតើវាបានផ្តល់ឱកាសនិងការអភិវឌ្ឍរីកចម្រើនសម្រាប់ខ្លួនឯងដែរទេ។
បើអ្នកជួបបញ្ហាជាមួយនឹងការងារ កុំទុកក្នុងចិត្តតែម្នាក់ឯង ត្រូវស្វែងរកប្រឹក្សាពិគ្រោះយោបល់ ជាមួយមិត្តភ័ក្តិឬមនុស្សចាស់ទុំដែលមានបទពិសោធន៍មុនអ្នក ដើម្បីថ្លឹងថ្លែងរកដំណោះស្រាយ។
ការខិតខំប្រឹងប្រែងនិងលទ្ធផល មានអំណាចជាងការប្រើតែពាក្យសម្តី។ បើនិយាយឲ្យតែរួចៗ ប៉ុន្តែគ្មានដំណោះស្រាយនិងទំនួលខុសត្រូវច្បាស់លាស់ទេ អ្នកក៏គ្មានថ្ងៃស្គាល់ភាពជោគជ័យបានដែរ ៕