កុំចាំតែពេលទៅវត្ត មានទង្វើច្រើនយ៉ាងទៀត ដែលអ្នកអាចសាងបុណ្យកុសលរាល់ថ្ងៃ

2019-10-07 06:05:00
ចំនួនមតិ 0 | ចំនួនចែករំលែក 0

ជាទូទៅមនុស្សភាគច្រើន ដែលកាន់ព្រះពុទ្ធសាសនា តែងមានផ្នត់គំនិតមួយថា ប្រសិនបើចង់ធ្វើបុណ្យសាងកុសលឲ្យបានច្រើន មានតែការទៅវត្តយកផ្កាថ្វាយព្រះឬចង្ហាន់ប្រគេនព្រះសង្ឃជាដើម។

រូបតំណាង

តាមការពិត ការគិតបែបនេះគឺផ្ទុយស្រឡះ ព្រោះសូម្បីតែទង្វើល្អៗប្រចាំថ្ងៃ ដែលពេលខ្លះអ្នកមើលរំលង ក៏អាចជួយសាងបុណ្យសន្ធឹកសន្ធាប់ ឃើញផលភ្លាមៗមិនចាំដល់ជាតិក្រោយ។

បើគ្មានពេលគ្រប់គ្រាន់សម្រាប់ទៅវត្តក៏មិនអីដែរ អ្នកអាចធ្វើបុណ្យដោយការរៀបចំចង្ហាន់បន្តិចបន្តួច ប្រគេនជាលុយកាក់ឬរបស់របរផ្សេងៗ នៅពេលឃើញព្រះសង្ឃនិមន្តបិណ្ឌបាត។

រូបតំណាង

នៅពេលឃើញនរណាម្នាក់កំពុងតែជួបបញ្ហា ត្រូវការសុំជំនួយពីអ្នក កុំដាច់ចិត្តមើលរំលងឲ្យសោះ។ ទោះបីមិនមែនជារឿងធំដុំ សូម្បីតែការជួយមនុស្សចាស់ដើរឆ្លងថ្នល់ ជូនថវិកាទៅឲ្យអ្នកក្រខ្សត់វេទនា ជនពិការ...ក៏បានបុណ្យមិនស្ទើរដែរ។
ពេលមាននរណាម្នាក់រងគ្រោះឈឺចាប់ ហើយត្រូវការសុំមតិយោបល់ពីអ្នក ត្រូវប្រាកដថាអ្នកបានចែករំលែកគំនិតល្អៗដែលមានប្រយោជន៍ និងមិនបំបាក់ទឹកចិត្ត ជាន់ឈ្លីនាំឲ្យរឿងរ៉ាវកាន់តែលេចលង់ជ្រៅជាងមុន។
ពេលទិញទំនិញថោកៗឬតិចតួចពីអ្នកក្រ កុំតថ្លៃខ្លាំងហួសហេតុពេក ព្រោះប្រាក់ចំណេញប្រចាំថ្ងៃរបស់ពួកគេ ជួនកាលមិនស្មើនឹងអ្នកចូលហាងមួយពេលផង។

រូបតំណាង

បើសម្រេចចិត្តថាយកសត្វចិញ្ចឹមមករស់នៅក្នុងផ្ទះជាមួយ ត្រូវមើលថែរក្សាឲ្យបានល្អ។ ថ្វីត្បិតតែពួកគេជាសត្វ ក៏ត្រូវការភាពកក់ក្តៅពីម្ចាស់ មានចំណីអាហារនិងកន្លែងស្នាក់នៅត្រឹមត្រូវ មិនខុសពីមនុស្សឡើយ។
យកចិត្តទុកដាក់ពីសុខទុក្ខរបស់ឪពុកម្តាយ យាយតា ដែលនៅផ្ទះ ទិញនំចំណីដែលគាត់ចូលចិត្តពិសា ធ្វើឲ្យគាត់សប្បាយចិត្តជានិច្ច។