មន្តស្នេហ៍ ៥ របស់ភរិយាមហាសេដ្ឋី Mark Zuckerberg ធ្វើឲ្យស្វាមីកាន់តែឲ្យតម្លៃ ស្រលាញ់លើសដើម
- 2019-10-01 05:10:00
- ចំនួនមតិ 0 | ចំនួនចែករំលែក 0
មន្តស្នេហ៍ ៥ របស់ភរិយាមហាសេដ្ឋី Mark Zuckerberg ធ្វើឲ្យស្វាមីកាន់តែឲ្យតម្លៃ ស្រលាញ់លើសដើម
អ្នកស្រី Priscilla Chan ដែលជាភរិយារបស់មហាសេដ្ឋី និងជាអ្នកជាគ្រប់គ្រងបណ្តាញសង្គម Facebook លោក Mark Zuckerberg មិនត្រឹមតែបានចូលរួមចំណែកក្នុងកម្មវិធីសប្បុរសធំៗប៉ុណ្ណោះទេ ប៉ុន្តែនៅមានរឿងរ៉ាវអស្ចារ្យជាច្រើនទៀត ដែលពុំសូវមានអ្នកដឹង។
បន្ទាប់ពីរៀបការរួច ស្រ្តីជនជាតិចិនដ៏មានទេពកោសល្យរូបនេះ បានធ្វើឲ្យមនុស្សជាច្រើនលាន់មាត់សរសើរនិងចាប់អារម្មណ៍ពីភាពសាមញ្ញ ព្រមទាំងភាពវៃឆ្លាតរបស់នាង។ លើសពីនេះទៅទៀត អ្នកស្រីបានបញ្ចប់ការសិក្សា ពីសាកលវិទ្យាល័យ Harvard ដ៏ល្បីនៅសហរដ្ឋអាមេរិក និងទទួលបានសញ្ញាបត្រផ្នែកវេជ្ជសាស្ត្រពីសាកលវិទ្យាល័យកាលីហ្វ័រញ៉ា សាន់ហ្វ្រាន់ស៊ីស្កូ (UCSF) រួមទាំងបានបរិច្ចាគថវិការាប់សិបលានដុល្លារ ចូលទៅក្នុងមូលនិធិ ដើម្បីធ្វើការសិក្សាស្រាវជ្រាវលើផ្នែក សុខភាព ចំណេះដឹងនិងបរិស្ថាន។
ក្រៅពីមានទឹកចិត្តល្អនិងចំណេះដឹងខ្ពស់ នៅមានអាថ៌កំបាំងធំៗមួយចំនួនទៀត ដែលនាំឲ្យស្វាមីរបស់អ្នកស្រី កាន់តែឲ្យតម្លៃ ស្រលាញ់ខ្លាំងលើសដើម។
អ្នកស្រីបានបើកសាលារៀនឯកជនមួយ
កាលពីឆ្នាំមុន Priscilla បានសម្រេចចិត្ត បើកសាលារៀនឯកជនមួយ នៅក្នុងទីក្រុង Palo Alto ដែលមានឈ្មោះថា The Primary School។ សាលារៀននេះគឺមានគុណភាពខ្ពស់ និងបើកទទួលសិស្សដែលមានអាយុឆាប់ពី ១ខួបកន្លះ ដល់៧ឆ្នាំ ឲ្យមានឱកាសចូលរៀនដោយឥតគិតថ្លៃ។ សិស្សដែលមានអាទិភាពអាចចូលរៀនបាន លុះត្រាតែមកពីគ្រួសារមានចំណូលទាប និងជាអ្នករស់នៅក្នុងតំបន់ San Mateo។ អ្នកស្រីក៏មានគម្រោងបើកសាលារៀនទី២ នៅក្នុងរដ្ឋកាលីញ័រញ៉ា នាចុងឆ្នាំ ២០២០ ផងដែរ។
អ្នកស្រីគឺជាមនុស្សស្រីម្នាក់ដែលមានឥទ្ធិពល ក្នុងចំណោមស្ត្រីខ្លាំងដទៃទៀតលើពិភពលោក
Priscilla ត្រូវបានទស្សនាវដ្ដី Forbes ដាក់នាមឲ្យថា ជាស្រ្តីដែលមានអំណាច ក្នុងចំណោមស្រ្តី១០០រូបផ្សេងទៀត នៅលើពិភពលោក។ ជាពិសេស មូលនិធិរបស់អ្នកស្រី ដែលមានឈ្មោះថា Chan Zuckerberg បានបរិច្ចាគថវិកាដល់ទៅ ៧៥ លានដុល្លារ សម្រាប់មន្ទីរពេទ្យ San Francisco។
អ្នកស្រីមិនប្រើទូរសព្ទនៅពេលយប់
អ្នកស្រីមិនប្រើប្រាស់ទូរសព្ទនោះទេនៅពេលយប់មុនពេលចូលគេង ដើម្បីកាត់បន្ថយភាពតានតឹង។ យ៉ាងណាមិញ វាមិនមែនជារឿងងាយស្រួលឡើយ ព្រោះនាងត្រូវសង្កេតតាមដានកូនដោយប្រើទូរសព្ទ។ ដើម្បីបង្កភាពងាយស្រួលដល់ប្រពន្ធ Mark បានបង្កើតប្រអប់មួយ ដើម្បីឲ្យនាងអាចដាក់ទូរសព្ទចូលទៅ ហើយប្រអប់នោះនឹងបង្ហាញភ្លើងភ្លឺផ្លេក នៅពេលដែលកូនៗភ្ញាក់ឡើង។ ហេតុនេះហើយ វាគឺជាឧបករណ៍ពិសេសមួយសម្រាប់ Priscilla ដែលអាចដឹងពីកូនៗ ដោយពុំចាំបាច់ប៉ះពាល់គ្រឿងអេឡិចត្រូនិកដូចមុន។
អ្នកស្រីគិតគូពីអ្នកដទៃ ដោយការបង្កើតកម្មវិធីផ្តល់ឱកាសដល់អ្នកជាប់គុក
Priscilla ជឿជាក់ថា មានតែកម្មវិធីផ្តល់ចំណេះដឹងប៉ុណ្ណោះ ទើបអាចផ្លាស់ប្តួរជីវិតដល់អ្នកជាប់គុកទាំងឡាយ។ ក្នុងឆ្នាំ ២០១៩ អ្នកស្រីបានធ្វើដំណើរទៅកាន់គុកមួយ នៅ Oklahoma និងបង្កើតកម្មវិធីមួយឈ្មោះថា Last Mile ដើម្បីពន្យល់ណែនាំ ផ្តល់វិជ្ជាជីវៈត្រឹមត្រូវដល់អ្នកជាប់គុក ឲ្យមានឱកាសល្អសម្រាប់ធ្វើកិច្ចការផ្សេងៗក្នុងជីវិត។
ដោយសារតែការចូលរួមចំណែកយ៉ាងសន្ធឹកសន្ធាប់ ក្នុងសង្គមធ្វើឲ្យគេឯងកោតសរសើរអ្នកស្រីមិនដាច់ពីមាត់។
ក្លាយជាប្រពន្ធមហាសេដ្ឋីល្បីឈ្មោះខ្លាំងយ៉ាងណា ក៏អ្នកស្រីនៅប្រកាន់ជំហរបែបសាមញ្ញ មិនអាត្មានិយម យកភាពស្អាតបាតពីខាងក្នុងចិត្តជាធំ។
មិនចូលចិត្តផាត់មុខរញ៉េរញ៉ៃច្រើន មិនតុបតែងខ្លួនទាមទារចំណាប់អារម្មណ៍ ប៉ុន្តែនៅតែលេចធ្លោទាក់ទាញក្នុងក្រសែភ្នែកស្វាមីនិងមនុស្សគ្រប់គ្នា។
អ្នកស្រីគឺជានិមិត្តរូបដែលអាចឆ្លុះបញ្ចាំងឲ្យមនុស្សស្រីដទៃទៀតបានដឹងថា ទង្វើប្រចាំថ្ងៃ ទំនួលខុសត្រូវ ទឹកចិត្ត ប្រាជ្ញា និងគុណធម៌ គឺជាតម្លៃពិតប្រាកដ ដែលមិនអាចខ្វះបាន៕
ចុចអានបន្ត៖ ២២ សន្លឹកលាតត្រដាងអត្ថន័យជីវិតពិត មិនអាចប្រកែកបាន