ប្រយ័ត្នជ្រួញខ្លាំងកែលែងឡើង! គួរដឹងគន្លឹះសំខាន់ ៤ ដើម្បីការពារស្បែកមិនឲ្យឆាប់ចាស់

2019-09-20 05:30:00
ចំនួនមតិ 0 | ចំនួនចែករំលែក 0

ការវិវត្តនៃអាយុកាលជារឿងធម្មជាតិរបស់មនុស្ស។ វ័យកាន់តែច្រើន ស្បែកក៏កាន់តែលេចចេញស្នាមជ្រួញ មិនអាចប្រកែកបាន។ ក្នុងអំឡុងពេលនេះ ជាពេលដែលអ្នកត្រូវទទួលយកការពិត មិនមែនខំប្រឹងលះបង់កែកុនដើម្បីចង់ឲ្យក្មេងនោះទេ។ វិធីដ៏ល្អមានតែ ការការពារឲ្យបានទាន់ពេលវេលា មុនពេលស្នាមជ្រួញចូលមកដល់។

១. ផ្តល់សំណើមដល់ស្បែកឲ្យបានគ្រប់គ្រាន់

មិនថាអាកាសធាតុក្តៅឬត្រជាក់ ត្រូវលាបឡេផ្តល់សំណើមដល់ស្បែករាល់ថ្ងៃបន្ទាប់ពីងូតទឹករួច។ គួរសាប៊ូដុសខ្លួនប្រភេទជែល ផ្សំចេញពីធម្មជាតិ ប្រសើរជាងសាប៊ូដុំ ដែលអាចបណ្តាលឲ្យស្បែកស្ងួតប្រេះបែកស្រកា និងឆាប់ចាស់មុនវ័យ។

២. ញ៉ាំអាហារជំនួយដល់សុខភាពស្បែក

ចង់ឲ្យស្បែកភ្លឺថ្លាក្មេងបានយូរ ត្រូវតែគិតគូរបំប៉នពីខាងក្នុង។ អាហារមួយចំនួន ដែលមានបន្ថែមពណ៌ រសជាតិ ឬក្លិនសិប្បនិម្មិតពិតជាប៉ះពាល់ខ្លាំងណាស់សម្រាប់សុខភាពស្បែក។ ជាពិសេសចំពោះអ្នកដែលមានបញ្ហាមុន ស្បែកឆាប់ប្រតិកម្ម រួមទាំងបញ្ហានានា ត្រូវតែយកចិត្តទុកដាក់ក្នុងការជ្រើសរើសរបបអាហារ។

អាហារដែលអាចជំនួយដល់ស្បែករួមមាន៖

អាហារសម្បូរអាស៊ីតខ្លាញ់អូមេហ្គា៖ ត្រីសាល់ម៉ុន ត្រីសាឌីន សាច់ត្រី walnuts ប្រេងអូលីវ...។
អាហារសម្បូរសេលេនីញ៉ូម៖ ក្តាម អយស្ទ័រ សាច់គោ បង្គា សាច់ចៀម ផលិតផលធ្វើពីសណ្តែកសៀង ស៊ុត...។
អាហារសម្បូរវីតាមីន A៖ បណ្តុំបន្លែនិងផ្លែឈើដែលមានពណ៌ស្រស់។ ក្នុងនោះរួមមាន ដំឡូងផ្អែម កូនស្ពៃ ប៉េងប៉ោះ គ្រាបសណ្តែក ម្រេច ផ្លែប៊ឺរី...។
អាហារសម្បូរវីតាមីន C៖ ខាត់ណា ឃីវី ក្រូចឆ្មារ ផ្លែក្រូច ម្ទេសហាវៃក្រហម បន្លែបៃតង ល្ហុង...។

៣. ហាត់យូហ្គានិងធ្វើសមាធិ

ការហាត់យូហ្គានិងធ្វើសមាធិ ផ្តល់អត្ថប្រយោជន៍ជាច្រើនសម្រាប់រាងកាយ ថែមទាំងអាចការពារអ្នកមិនឲ្យឆាប់ចាស់ទៀតផង។ ការបត់បែនពត់ដងខ្លួន អាចជួយបន្ថយភាពតានតឹង ធ្វើឲ្យអារម្មណ៍បានធូរស្រាល នាំឲ្យស្បែកស្រស់ថ្លា។ បើអ្នកអាចឆ្លៀតពេលហាត់ជាប្រចាំ នោះសភាពស្បែកនឹងភ្លឺចេញពីខាងក្នុង មើលទៅមិនស្រអាប់ និងមានសុខភាពល្អ។

៤. រក្សាជាតិខូឡាជែន

អាយុកាន់តែច្រើនរាងកាយផលិតជាតិខូឡាជែនកាន់តែតិច ដូច្នេះហើយអ្នកត្រូវតែថែរក្សានិងរកវិធីបន្ថែមខូឡាជែនដល់ស្បែកឲ្យបានគ្រប់គ្រាន់ មានដូចជាការញ៉ាំវីតាមីន លាបគ្រីមថែរក្សាស្បែកជាដើម៕