ភ្ញាក់ផ្អើលពេលដឹងអត្ថប្រយោជន៍នៃការញ៉ាំផ្លែស្រកានាគ ជាពិសេសសម្រាប់នារីៗ

2019-08-16 03:00:00
ចំនួនមតិ 0 | ចំនួនចែករំលែក 0

ផ្លែស្រកានាគសម្បូរកាកសរសៃច្រើនលើសលប់ ដែលជាសារធាតុសំខាន់ជួយសម្រួលជាតិស្ករក្នុងរាងកាយ កាត់បន្ថយកម្រិតជាតិស្ករ និងរក្សាទម្ងន់ខ្លួនឱ្យនឹងនរ។ ទោះជាមានសារធាតុមានប្រយោជន៍សម្រាប់រាងកាយក៏ដោយ គួរញ៉ាំផ្លែឈើនេះក្នុងកម្រិតសមស្រប បើសិនត្រូវញ៉ាំក្នុងកម្រិតច្រើន ហើយមានអាការៈមិនស្រួល គួរទៅពិភាក្សាជាមួយគ្រូពេទ្យជំនាញ ព្រោះបើញ៉ាំច្រើនជ្រុល អាចបន្ថយកម្រិតជាតិស្ករក្នុងខ្លួនកាន់តែច្រើនដែលអាចបង្កគ្រោះថ្នាក់បាន។

អ៊ីចឹងចង់ដឹងអត់ថា ក្នុងផ្លែស្រកានាគមួយផ្លែមានគុណប្រយោជន៍អ្វីខ្លះចំពោះសុខភាពនិងសម្រស់?

បំប៉នសរសៃសក់ ជួយឱ្យសក់ខ្មៅរលោង ទន់ដូចសរសៃសូត្រ

ទឹកស្រកានាគគឺជារូបមន្តសម្ងាត់មួយដើម្បីជួយថែរក្សាសក់ឱ្យមានសុខភាពល្អ ពណ៌ឡើងខ្មៅរលើបរលោង។ វិធីធ្វើគឺយកផ្លែស្រកានាគកិនឬក្រឡុកឱ្យម៉ត់ ហើយយកមកលាយជាមួយថ្នាំបន្ទន់សក់ រួចយកមកលាបលើសក់ឱ្យបានសព្វ ទុកចោលមួយសន្ទុះ រួចលាងសម្អាត។ ធ្វើបែបនេះរាល់ពេលប្រើថ្នាំបន្ទន់ ឬអប់សក់ដើម្បីឆាប់បានឃើញលទ្ធផល។

ពន្យារភាពចាស់មុនអាយុ

សារធាតុប្រឆាំងអុកស៊ីតកម្មដែលមានក្នុងផ្លែស្រកានាគអាចជួយថែរក្សាស្បែកឱ្យឡើងតឹងណែន និងនៅក្មេងបានយូរ។ អ្នកក៏អាចយកផ្លែឈើមួយប្រភេទនេះធ្វើជាម៉ាសបិទមុខ ដោយលាយជាមួយទឹកឃ្មុំដែលជារូបមន្តធម្មជាតិការពារភាពចាស់មុនអាយុ។

ការពារការកើតមុន

នៅក្នុងផ្លែស្រកានាគមួយផ្លែសម្បូរវីតាមីន C ដែលមានប្រសិទ្ធភាពព្យាបាលមុនមិនថានៅលើមុខ ឬស្បែកដងខ្លួន។ ចិញ្ច្រាំ ឬកិនផ្លែស្រកានាគឱ្យឡើងជាល្បាយខាប់ រួចយកមកលាបលើតំបន់ដែលកើតមុន ទុកមួយសន្ទុះសឹមលាងចេញជាមួយទឹកស្អាត។ ដើម្បីឆាប់ឃើញលទ្ធផល គួរអនុវត្តពីរដងក្នុងមួយថ្ងៃ។ មិនតែប៉ុណ្ណោះ វិធីព្យាបាលមុននេះអាចអនុវត្តបានគ្រប់វ័យ មិនប៉ះពាល់សុខភាពឡើយ។

កាត់បន្ថយនិងព្យាបាលស្បែករលាក

កិនផ្លែស្រកានាគលាយជាមួយត្រសក់និងបន្ថែមទឹកឃ្មុំបន្តិច អ្នកនឹងទទួលបានល្បាយដែលមានធាតុត្រជាក់ដូចជាកន្ទុយក្រពើដែរដែលអាចព្យាបាលស្បែករលាកបានយ៉ាងពូកែ។ វីតាមីន B3 ដែលមានដ៏ច្រើនលើសលប់ក្នុងផ្លែស្រកានាគអាចជួយបន្ថែមសំណើមដល់ស្បែកដែលរលាកខ្លោច និងបន្ថយកម្ដៅចេញពីតំបន់ដែលរលាក។

ថែរាងមិនឱ្យឡើងគីឡូ

ក្រៅពីសារធាតុបំប៉នខាងលើ ផ្លែស្រកានាគមានកម្រិតខូឡេស្តេរ៉ូលទាបបំផុត ដែលអាចឱ្យរាងកាយអាចរំលាយផ្លែឈើនេះបានយ៉ាងឆាប់រហ័ស នាំឱ្យអ្នកមានអារម្មណ៍ល្អ និងមានសុខភាពល្អ។ វាជាផ្លែឈើដ៏ល្អឥតខ្ចោះដើម្បីជួយថែរក្សាទម្ងន់ខ្លួននៅថេរ មិនឡើងគីឡូហួសហេតុ។

សម្រួលដំណើរការបេះដូងឱ្យមានសុខភាពល្អ

វាជាផ្លែឈើដែលមានថាមពលអស្ចារ្យបំផុតដែលជួយកាត់បន្ថយខូឡេស្តេរ៉ូលអាក្រក់ និងបំពេញខេឡេស្តេរ៉ូលល្អឱ្យកើនឡើងបន្ថែម ជួយឱ្យបេះដូងដំណើរការបានល្អប្រសើរ៕

ចុចអាន៖ ញ៉ាំទឹកក្រូចឆ្មារមួយកែវរាល់ព្រឹក អ្នកនឹងបានរាងកាយដែលមិនចេះឈឺថ្កាត់

ប្រភព៖ lifehack | healthline ប្រែសម្រួល៖ សរ សុគន្ធី