តិចនិកស្លៀករ៉ូបវែងមិនឲ្យឆ្គង សម្រាប់ស្រីៗមាឌតូចច្រឡឹង

2019-05-21 08:32:37
ចំនួនមតិ 0 | ចំនួនចែករំលែក 0

សម្រាប់មនុស្សស្រី ដែលមានមាឌតូចច្រឡឹង កម្ពស់ខ្ពស់ល្មម មើលទៅគូរឲ្យស្រលាញ់ ប៉ុន្តែនៅពេលចង់ស្លៀករ៉ូបវែង ត្រូវប្រយ័ត្នប្រយែងបន្តិច ទើបមិនឆ្គងភ្នែក។ ខាងក្រោមនេះ គឺជាតិចនិកងាយៗ ជួយឲ្យអ្នកមានភាពស្រស់ស្អាតឥតទាស់ ជាមួយនឹងម៉ូដរ៉ូមវែង ដែលអ្នកស្រលាញ់ចង់ស្លៀក។

១. ជ្រើសរើសរ៉ូបវែង មានកជ្រៅ ឬវាលស្មា

រ៉ូបដែលមានកបិទជិត ឬកអាវចង្អៀតមិនស្រឡះ មិនស័ក្តិសមជាមនួយមនុស្សស្រីដែលមានមាឌតូចច្រឡឹង ព្រោះវាធ្វើឲ្យមើលឃើញទាបនិងធាត់ជាងមុន។ គួរស្លៀករ៉ូប ដែលមានករាងជ្រៅបន្តិច ឬបិទបាំងរញ៉េរញ៉ៃ ទើបមើលឃើញខ្ពស់ស្រឡះ។

២. ជៀសវាងរ៉ូបដែលមានផ្កាឬរូបសាំញ៉ាំច្រើន

រ៉ូបដែលមានផ្កាឬរូបច្រើនស្អេកស្កះ មានលក្ខណៈស្មុគស្មាញ និងធ្វើឲ្យអ្នកមើលទៅឃើញទាប។ យល់ល្អ គួរជ្រើសរើសរ៉ូបដែលមានសាច់ក្រណាត់លាត មានក្រឡាឬរូបតិចតួចបំផុត និងមានពណ៌តែមួយមិនលាយឡំច្រើន។

៣. ជៀសវាងរ៉ូបវែងហើយដៃវែង

សម្រាប់តារាម៉ូដែល រ៉ូបវែងហើយដៃវែងទៀត គឺពេញនិយមហើយស្អាតខ្លាំងណាស់ ប៉ុន្តែបើអ្នកមានកម្ពស់ក្រោម១,៦០ម គួរកុំស្លៀកអីល្អជាង ពុំដូច្នេះទេវានឹងធ្វើឲ្យអ្នក កាន់តែទាប ហើយដូចដូនជីអីចឹង។ បើចង់ស្លៀករ៉ុបដៃវែង គួរតែស្លៀករ៉ូបខ្លីវិញ។

៤. ស្លៀករ៉ូបវែងដែលមានឆែក

ពេលដែលអ្នកស្លៀករ៉ូបវែងជិតឆឹង ជើងរបស់អ្នកនឹងមើលទៅឃើញខ្លីជាងមុន។ យ៉ាងណាមិញ ដំណោះស្រាយ គឺត្រូវជ្រើសរើសម៉ូដរ៉ូបដែលមានឆែកវែង មើលឃើញជើងពេលដើរ ទើបមានភាពស្រស់ស្អាតសមភ្នែក។

៥. រ៉ូបមានរំភាយនៅជើងក្រោម

បើអ្នកជាមនុស្សស្រី មិនសូវបានកម្ពស់ មិនគួរស្លៀករ៉ូបវែងអូសដីពេកនោះទេ ព្រោះវាមិនសមជាមួយកម្ពស់ហើយពិបាកដើរទៀតផង។ ហេតុនេះ រ៉ូបដែលមានរំភាយនៅជើងក្រោម ហើយវែងល្មម គឺជាជម្រើសដ៏ល្អឥតខ្ចោះ៕