កុំថាឡើយសង្សារ សូម្បីមិត្តភក្តិរកមិនបានផង បើប្រកាន់យកចរិត ៧ នេះជាប់ខ្លួន
- 2019-04-22 07:35:00
- ចំនួនមតិ 0 | ចំនួនចែករំលែក 0
កុំថាឡើយសង្សារ សូម្បីមិត្តភក្តិរកមិនបានផង បើប្រកាន់យកចរិត ៧ នេះជាប់ខ្លួន
មនុស្សស្រីមួយចំនួន គិតថាមិនមានអ្នកស្រលាញ់ក៏អត់ទៅ មិនមានអ្នករាប់អានក៏អត់ទៅ មិនមានអ្នកចូលចិត្តក៏អត់ទៅ ឲ្យតែចេះស្រលាញ់ខ្លួនឯងទៅបានហើយ។
ការគិតបែបនេះមិនប្រាកដថាត្រូវ ១០០ ភាគរយទេ មានមនុស្សពីរបីនាក់មិនចូលចិត្តអ្នកវាជារឿងធម្មតាទេ ព្រោះមនុស្សកើតមកមិនអាចផ្គាប់ចិត្តគេបានគ្រប់គ្នាទេ តែបើអ្នករកមិនបានសូម្បីតែមិត្តល្អម្នាក់នៅក្បែរខ្លួននោះ បញ្ជាក់ថាមិនមែនរឿងធម្មតាទៀតទេ ស្ថានភាពបែបនេះបង្ហាញថាអ្នកកំពុងតែមានបញ្ហាហើយ។
សង្កេតមើលខ្លួនឯងថាមានចរិត៧នេះដែរទេ? បើមានគួរប្រញាប់គិតសារឡើងវិញ ព្រោះគ្មាននរណាម្នាក់ចង់រាប់អាន និងចូលចិត្តមនុស្សស្រីប្រភេទនេះឡើយ៖
មិនទទួលស្គាល់កំហុសខ្លួន មើលឃើញតែកំហុសអ្នកដទៃ
មនុស្សស្រី បែបនេះមិនដែលសារភាពថាខ្លួនឯងខុសទេ គេតែងតែស្វែងរកចំណុចអវិជ្ជមានរបស់នរណាម្នាក់ ហើយរកលេសទម្លាក់កំហុសឲ្យគេទាំងដែលខ្លួនឯងធ្វើខុសក៏ដោយ។ គេអង្គុយចាំតែត្រូវ និងយករួចតែខ្លួនប៉ុណ្ណោះ។ មនុស្សប្រភេទនេះ គ្មាននរណាចង់បានមកធ្វើជាមិត្តឬសង្សារទេ បើសិនជារាប់អានក៏នៅមិនបានយូរដែរ។
រឹងរូសខុសរបៀប
ចាស់ៗតែងនិយាយថា «រឹងមាំ តែមិនរឹងរូស ទន់ភ្លន់ តែមិនទន់ជ្រាយ» អ្នកគួរចែកឲ្យដាច់ពាក្យថារឹងមាំ និងរឹងរូស រឹងរូសមានន័យថាផ្គើន រឹង និយាយមិនស្ដាប់ មិនទទួលយកការកែតម្រូវពីអ្នកដទៃទាំងដែលខ្លួនឯងកំពុងធ្វើខុស ហើយបើមនុស្សស្រីដែលរឹងរូសខុសរបៀបបែបហ្នឹងវិញ គ្មានអ្នកណាចង់យកខ្លួនបៀតទេ។
និយាយមួយម៉ាត់ណាមកក៏អួត
ធ្លាប់ឮគេនិយាយថា អ្នកនិយាយមិនដែលធ្វើ ហើយអ្នកធ្វើមិនដែលនិយាយទេ? មិនខុសទេបើតាមបទពិសោធន៍ធ្លាប់ជួបកន្លងមកមនុស្សដែលមានអំនួតមិនដែលធ្វើអ្វីបានជាដុំកំភួនទេ។ ត្រលប់មកវិញគឺមានតែត្រូវបានគេមិនចូលចិត្ត គេជ្រេញតែប៉ុណ្ណឹង។ នៅក្បែរមនុស្សបែបហ្នឹងគួរឲ្យធុញខ្លាំងណាស់។
ខ្សែលើគេគ្រប់រឿង
មនុស្សបែបហ្នឹងចូលចិត្តធ្វើរឿងយកមុខយកមាត់ណាស់។ ទៅណាមកណាចង់តែធ្វើមេគេ ចង់ឲ្យគេគោរព ឲ្យតម្លៃ តែមិនដែលធ្វើខ្លួនឲ្យសមនឹងគេគោរពចូលចិត្តម្ដងទេ។ ចូលចិត្តបង្អាប់គេហើយសរសើរខ្លួនឯងគ្រប់ពេល។
និយាយស្ដីមិនស្គាល់កាលៈទេសៈ
មនុស្សស្រីប្រភេទនេះ គេហៅថាមនុស្សមិនយល់សាច់ការ និយាយសម្ដីចេញមកដោយមិនបានឆ្លងកាត់ខួរក្បាល។ ដូចជានិយាយថាឲ្យមិត្តភក្តិចំៗនៅកណ្ដាលហ្វូងមនុស្ស ប្រៀបបាននឹងការបំបាក់មុខគេ យករឿងសាច់ការមកលេងសើចមិនមើលពេលវេលា និងទីកន្លែង។
ឃើញគេល្អជាងខ្លួនមិនបាន
គ្មាននរណាប្រាថ្នានៅក្បែរមនុស្សបែបនេះទេ លើសពីនេះនៅក្បែរមនុស្សបែបហ្នឹងគ្មានថ្ងៃរីកចម្រើនទេ។ មិនថាអ្នកមានសម្លៀកបំពាក់ ឬរបស់ប្រើប្រាស់ថ្មីទេ គេនឹងធ្វើគ្រប់វិធីឲ្យបានដូចអ្នកដែរ មនុស្សប្រភេទនេះមិនដែលសប្បាយចិត្តនឹងជោគជ័យរបស់អ្នកទេ។
មិនស្មោះត្រង់
កុំថាឡើយសង្សារ សូម្បីបីមិត្តភក្តិក៏មនុស្សធន់នេះក្បត់បានដែរ។ អ្នកត្រូវចាំថាមនុស្សបើមិនស្មោះត្រង់ហើយគឺក្បត់អ្នកសាហាវជាងមនុស្សប្រុសទៅទៀត៕
ចុចអាន៖