រឿងស្នេហា មនុស្សស្រីខ្លាចបំផុតពេលមនុស្សប្រុសអស់ចិត្ត តែមាត់នៅប្រកែក
- 2019-04-22 02:40:00
- ចំនួនមតិ 0 | ចំនួនចែករំលែក 0
រឿងស្នេហា មនុស្សស្រីខ្លាចបំផុតពេលមនុស្សប្រុសអស់ចិត្ត តែមាត់នៅប្រកែក
ទោះបីជាចិត្តអស់ក្ដីស្រលាញ់ហើយក្ដី តែមនុស្សប្រុសមួយចំនួនមិនហ៊ានទទួលការពិតឡើយ ដោយនៅតែស្រែកក្ដែងៗថានៅស្រលាញ់គេ ឲ្យគេមានក្ដីសង្ឃឹម ហើយចុងក្រោយក៏បញ្ចប់ទាំងអស់នៅពេលគេមានអ្នកថ្មី។
ក្នុងរឿងមនោសញ្ចេតនា មនុស្សស្រី និងមនុស្សប្រុសប្រៀបដូចប៉ូល២បញ្ច្រាស់គ្នា ដោយគ្រាដំបូង មនុស្សប្រុសតែងប្រឹងអស់ពីសមត្ថភាពដើម្បីយកចិត្តមនុស្សស្រី។ ទទួលរាល់កំហុសទាំងអស់ជារបស់ខ្លួន រាល់ពេលមានរឿងកើតឡើង គេចាត់ទុកមនុស្សស្រីដូចរាជិនី។
ក៏ជាមនុស្សប្រុសដដែលនោះដែរ តែនៅពេលស្រលាញ់គ្នាបានមួយរយៈហើយ គេចាប់ផ្ដើមលែងសូវរវល់ ក៏ដូចជាយកចិត្តទៀត ឬរហូតដល់ថ្នាក់ នៅពេលមនុស្សស្រីយំដោយសារអន់ចិត្ត គេនឹងបង្ហាញពីភាពធុញទ្រាន់ភ្លាម។ គួរឲ្យសោកស្ដាយ មនុស្សស្រីបែរជាផ្ទុយពីមនុស្សប្រុសវិញ ព្រោះនៅពេលដែលគេចាប់ផ្ដើមលែងរវល់នេះហើយ ដែលជាពេលដែលមនុស្សស្រីបានដាក់អារម្មណ៍ទាំងស្រុងលើមនោសញ្ចេតនាមួយនេះហើយដកខ្លួនលែងរួច។
គេថាស្នេហាកាន់តែយូរ កាន់តែយល់គ្នា នឹងឈានដល់មង្គលការ។ តែមួយចំនួនទៀត នៅពេលដែលកាន់តែយូរទៅ នឹងដើរទៅកាន់ច្រកទាល់ ទៅមុខលែងរួច។ នោះគឺជាពេលដែលខាងស្រី ចង់ឈានដល់មង្គលការ តែខាងប្រុសរក្សាភាពស្ងៀមស្ងាត់។ គេរកលេសមួយពាន់ហេតុផលដើម្បីពន្យារពេលដូចជា សេដ្ឋកិច្ចមិនទាន់រឹងមាំ នៅក្មេងមិនទាន់គិតដល់រឿងគ្រួសារ ឬចាំមានអីជាដុំកំភួនសិនជាដើម។
តាមការពិត បើស្រលាញ់ពិត ហេតុផលទាំងនេះគឺអាចជម្នះបានទាំងអស់ ខ្លាចតែអស់ចិត្តទេ ទើបយកលេសនោះ។ មនុស្សប្រុសមិនចង់និយាយពាក្យបែកព្រោះខ្លាចខូចឈ្មោះ ជាប់ដានទៅថ្ងៃ ក្រោយ។ គេសុខចិត្តធ្វើឲ្យមនុស្សស្រីអស់ចិត្តខ្លាំងមែនទែនដោយខ្លួនឯង ហើយសុំបែកមុន។
សម្រស់ និងយុវវ័យមនុស្សស្រីសុទ្ធតែមានកំណត់ បើជ្រុលជាអស់ស្រលាញ់ហើយ សូមស្ដីតែមួយម៉ាត់ ដើម្បីគេរកមនុស្សដែលល្អជាងយើង។ កុំចងគេដោយភាពមិនច្បាស់លាស់ ហើយចុងបញ្ចប់អ្នកខាតគឺខាងស្រី ៕
ចុចអាន៖ លេចចេញ១០សញ្ញានេះ បង្ហាញថាអ្នកចង់បញ្ចប់មនោសញ្ចេតនា តែមិនហ៊ាននិយាយ