ដើរលេងហាលថ្ងៃរហូតដល់ស្បែកខ្មៅខ្លោច គួរដឹងពីវិធីកែខៃឡើងវិញ

2019-04-18 04:30:00
ចំនួនមតិ 0 | ចំនួនចែករំលែក 0

រាងកាយមនុស្សយើងត្រូវប៉ះនឹងពន្លឺថ្ងៃខ្លះ ដើម្បីស្រូបយកវីតាមីន D ចូលក្នុងខ្លួន ប៉ុន្តែបើអ្នកបណ្តែតបណ្តោយនៅហាលថ្ងៃយូរពេក នោះស្បែករបស់អ្នកនឹងប្រែក្លាយទៅជាខ្មៅខ្លោចមិនខាន។ ជាពិសេសពេលទៅដើរលេងក្នុងអំឡុងពេលមេឃក្តៅខ្លាំង កាំរស្មីព្រះអាទិត្យនឹងបំផ្លាញស្បែក ត្រង់ផ្នែកណាមួយ។ បើអ្នកជួបប្រទះបញ្ហាទាំងនេះ អាចសាកល្បងតាមវិធីខាងក្រោម ដើម្បីជួយឲ្យស្បែកឆាប់បានធូរស្រាល ដូចដើមឡើងវិញ៖

សម្រាប់ស្បែកខ្មៅខ្លោចដោយកម្តៅព្រះអាទិត្យ ក្នុងកម្រិតស្រាលល្មម

ទឹកដោះគោ

លាងសម្អាងមុខ ខ្លួន និងគ្រប់ផ្នែកទាំងអស់ដែលខ្មៅខ្លោចពីពន្លឺថ្ងៃជាមួយនឹងទឹកធម្មតា ទុកឲ្យស្ងួតមុនលាបទឹកដោះគោលើស្បែក។ យកទឹកដោះគោក្លាសេឲ្យត្រជាក់ បន្ទាប់មកចាក់ចូលក្នុងចាន ទុកចោល៥នាទី។ យកសំឡីទៅជ្រលក់ទឹកដោះគោ លាបត្រង់កន្លែងស្បែកដែលមានបញ្ហា ទុកចោលរហូតដល់ទឹកដោះគោស្ងួត ឲ្យបាន២-៣ម៉ោង សឹមលាងទឹកចេញ ហើយធ្វើបែបនេះម្តងទៀត។

ចំណាំ៖ គួរប្រើទឹកដោះស្រស់គ្មានបន្ថែមជាតិស្ករ ព្រោះទឹកគោកែច្នៃ អាចធ្វើឲ្យអ្នកមានអារម្មណ៍ថា មានខ្លាញ់លើស្បែក។

ប៉េងប៉ោះ

ប៉េងប៉ោះសម្បូរលីកូពីន ដែលជាសារធាតុប្រឆាំងអុកស៊ីតកម្ម អាចជួយព្យាបាលស្បែកដែលខូចខាត ឲ្យមានភាពប្រសើរឡើងវិញ។ វិធីងាយៗគឺគ្រាន់តែ ផឹកទឹកប៉េងប៉ោះឲ្យបានច្រើន រហូតទាល់តែស្បែកខ្មៅខ្លោចបានធូរស្រាល។ ជាពិសេស គួរជ្រើសរើសមុខម្ហូបណាដែលមានបន្ថែមប៉េងប៉ោះ ហើយកុំភ្លេចផឹកទឹកឲ្យបានច្រើន ដើម្បីផ្តល់សំណើមជួយឲ្យស្បែកឆាប់ជាសះស្បើយ។

សម្រាប់ស្បែកខ្មៅខ្លោចដោយកម្តៅព្រះអាទិត្យ ក្នុងកម្រិតធ្ងន់

បើស្បែករបស់អ្នកឡើងក្រហមខ្លាំងប៉ះទៅមានអារម្មណ៍ថាក្រហាយៗ គួរសាកវិធីនេះ៖

ទឹកខ្ទិះដូង

យកកាកដូង ត្រាំជាមួយទឹកក្ដៅឧណ្ណៗ៥នាទី បន្ទាប់មកច្របាច់យកតែខ្ទិះ ដាក់ក្លាសេក្នុងទូទឹកកក រួចយកលាបត្រង់បរិវេណដែលមានបញ្ហាជាការស្រេច។

សម្រាប់ស្បែកខ្មៅខ្លោចដោយកម្តៅព្រះអាទិត្យ ក្នុងកម្រិតធ្ងន់ធ្ងរខ្លាំង

បើអ្នកមានអារម្មណ៍ថាស្បែកក្រហាយរហូតប៉ះលែងបាន ឬមានរបកៗជាដើមគួរសាកវិធីនេះ៖

ប្រទាលកន្ទុយក្រពើ

វាមានតួនាទីជួយធ្វើឲ្យស្បែកត្រជាក់និងកាត់បន្ថយភាពឈឺចាប់ ពិសេសសម្រាប់ស្បែកដែលត្រូវបានដុតបំផ្លាញដោយកម្តៅថ្ងៃខ្លាំង។ ដំបូងត្រូវយកប្រទាលកន្ទុយក្រពើ ចិតសំបកខាងក្រៅចេញ កិនឲ្យម៉ដ្ឋ រួចយកទៅលាបត្រង់កន្លែងស្បែកមានបញ្ហា ទុកចោលឲ្យយូរតាមដែលអាចធ្វើទៅបាន។ ត្រូវលាបឲ្យបានញឹកញាប់។

ចុចអានបន្ត៖