អរគុណប្រុសក្បត់! អ្នកធ្វើឱ្យខ្ញុំរឹងមាំ និងមើលអ្នកដួលយ៉ាងពេញចិត្ត
- 2018-10-28 05:17:45
- ចំនួនមតិ 0 | ចំនួនចែករំលែក 0
អរគុណប្រុសក្បត់! អ្នកធ្វើឱ្យខ្ញុំរឹងមាំ និងមើលអ្នកដួលយ៉ាងពេញចិត្ត
ជីវិតប្ដីប្រពន្ធទោះរៀបការហើយក៏មិនទាន់ អាចចាត់ទុកថាជាជោគជ័យ ឬហៅថា Happy Ending ដូចក្នុងភាពយន្តបានដែរ។ អ្នកទាំងពីរត្រូវប្រឈមមុខនឹងរឿងជាច្រើនដែលអ្នកមិនធ្លាប់ជួប កាលពីពេលនៅលីវ បន្ទុកកាន់តែច្រើន បញ្ហាស្មុគស្មាញក៏នឹងចូលមកមិនចេះនោះដែរ។
ដូចសាច់រឿងក្នុងវីដេអូខាងក្រោមនេះ និយាយពីប្ដីប្រពន្ធមួយគូ ដែលខាងប្ដីស្រាប់តែចុះចោលប្រពន្ធទៅមានស្រីថ្មីដោយមិនខ្វល់ខ្វាយពីប្រពន្ធ និងកូនប្រុស។ គេទៅចោលនាងដោយមិនបានផ្ដល់ប្រាក់សូម្បីមួយសេនផ្គត់ផ្គង់កូនប្រុសអាយុ៥ឆ្នាំរបស់ពួកគេ។
ថ្ងៃមួយកូនប្រុសធ្លាក់ខ្លួនឈឺ ហើយត្រូវការប្រាក់ច្រើនដើម្បីព្យាបាល ប៉ុន្តែនាងគ្មានប្រាក់ឡើយ។ នាងក៏សម្រេចចិត្តទៅរកអតីតប្ដីរបស់នាង ដើម្បីសុំប្រាក់ខ្លះ ព្រោះយល់ថាជាកូនរួមគ្នា។ ប៉ុន្តែអតីតប្ដីរបស់នាងបែរជាឆ្លើយថា "ខ្ញុំគ្មានប្រាក់ទេ! លុយទាំងអស់ខ្ញុំយកទៅបណ្ដាក់ទុនរកស៊ីអស់ហើយ!”
ទឹកចិត្តជាម្ដាយ មិនអាចឈរមើលកូនឈឺ ហើយមិនអាចព្យាបាលបែបនេះបានទេ។ នាងបានខំប្រឹងធ្វើការរកលុយកើនមួយទ្វេជាបី ដោយមិនគិតយប់ថ្ងៃ ឈឺជា ហើយចុងក្រោយកូនប្រុសរបស់នាងក៏បានជាសះស្បើយ ចំណែកនាងក៏ជោគជ័យក្នុងការងារ ព្រោះតែការឈឺចាប់ និងការមើលងាយមើលថោករបស់អតីតប្ដីរបស់នាង រហូតអាចទិញបានផ្ទះថ្មីមួយ ឱ្យកូនរៀនសាលាថ្លៃៗនឹងគេ។
រឿងនឹកស្មានមិនដល់ ថ្ងៃមួយតាមផ្លូវត្រឡប់មកផ្ទះ នាងនិងកូនបានឃើញបុរសម្នាក់អង្គុយដូចអ្នកសុំទាននៅលើបង់មួយ និងបានស្រែកហៅឈ្មោះនាង ប្រាប់ថាគេជាអតីតប្ដីរបស់នាង។ គេបានសុំប្រាក់នាងខ្លះ និងប្រាប់ថាក្រុមហ៊ុនរបស់គេក្ស័យធុន ហើយផ្ទះក៏ត្រូវគេរឹបអូសព្រោះជំពាក់បំណុលគេដែរ។
នាងមិនបានសើចចំអកអីទេ គ្រាន់តែប្រាប់ថា "ខ្ញុំគ្មានប្រាក់ទេ! លុយទាំងអស់ខ្ញុំប្រឹងរក ហើយចំណាយទៅលើការរៀនសូត្ររបស់កូនអស់ហើយ!” រួចក៏ដឹកដៃកូនដើរចេញទៅ!
ពិតមែនហើយ ជីវិតពិតជាមើលមិនឃើញមែន ថ្ងៃនេះបានសុខ មិនប្រាកដថាថ្ងៃស្អែកបានសុខដែរនោះទេ។ ទាន់ពេលវេលានៅមាន គួរតែចំណាយលើមនុស្សដែលស្រលាញ់យើងឱ្យបានច្រើនជាជាងទៅប្រើលើផ្លូវខុស ឬមិនឱ្យតម្លៃអ្នកដែលធ្លាប់រួមទុក្ខនិងសុខជាមួយយើង ហើយទៅរកសុខតែម្នាក់ឯង ចុងក្រោយប្រយ័ត្នដូចបុរសខាងលើនេះ!