ស្រលាញ់គេតែម្ខាង ខ្ញុំមិនមែនជាមនុស្សស្រីតែមួយគត់ដែលគេមាន
- 2017-12-12 02:22:54
- ចំនួនមតិ 0 | ចំនួនចែករំលែក 0
ស្រលាញ់គេតែម្ខាង ខ្ញុំមិនមែនជាមនុស្សស្រីតែមួយគត់ដែលគេមាន
ទឹកដាំបើទោះបីជាភ្លើងតិចឬច្រើនក្ដី ឲ្យតែដល់១០០អង្សាក៏គង់តែពុះ តែស្នេហាតែម្ខាង ទោះបីជាស្រលាញ់គេយ៉ាងណាក៏ដោយ បើមិននិយាយចេញមក មនោសញ្ចេតនានេះគ្មានថ្ងៃត្រូវបានគេតបស្នងឡើយ។
ខ្ញុំមិនមែនជាសុភមង្គលតែមួយគត់របស់អ្នក។ មានថ្ងៃខ្លះ ខ្ញុំខំប្រឹងទៅសាលាយ៉ាងលឿនដើម្បីគ្រាន់តែបានមើលមុខអ្នក តែក៏ខកចិត្តនៅពេលអ្នកមិនមករៀន ឬក៏រឹតតែខ្លោចចិត្តជាងនេះទៅទៀតនៅពេលអ្នកមកជាមួយស្រីម្នាក់ទៀត តែប្រាកដណាស់មិនមែនជារូបខ្ញុំ។ ខ្ញុំឈរពីចម្ងាយ បានត្រឹមតែពិបាកចិត្តមិនហ៊ានបន្ទោសអ្នក ព្រោះក្នុងនាមជាអ្វី? គ្រាន់តែស្រមៃថា ថ្ងៃណាមួយស្រីម្នាក់ដែលដើរក្បែរអ្នកគឺជារូបខ្ញុំ។ ហើយមិនយូរមិនឆាប់ ថ្ងៃសៅរ៍ក៏មកដល់ ធ្វើឲ្យខ្ញុំរំពឹងថាថ្ងៃអាទិត្យឆ្លងផុតឲ្យឆាប់ទៅដើម្បី ខ្ញុំបានជួបអ្នកជាថ្មីទៀត។
មានពេលខ្លះប្រមូលអស់កម្លាំងកាយចិត្ត បម្រុងនឹងសារភាពប្រាប់អ្នក តែមិនទាន់បានបើកមាត់ផង ក៏ឃើញអ្នកកៀកស្មើស្រីស្អាតម្នាក់ដែលខ្ញុំដឹងថាគ្មានថ្ងៃខ្ញុំស្អាតដូចគេទេ។ ពេលនោះខំហាមចិត្តខ្លួនឯងដែរ តែមិនដឹងជាល្ងង់អី ទឹកភ្នែកនៅតែស្រក់ ពិតជាឆោតមែន។ ទោះជាយំដល់រីងទឹកភ្នែក ក៏អ្នកមិនដឹងដែរថាមានមនុស្សស្រីម្នាក់ យំដោយសារអ្នក តែបន្ទោសអ្នកឯណាបានបើអ្នកមិនបានធ្វើអីខុសផងហ្នឹង។
ថ្ងៃនេះអ្នកស្អាតចម្លែកក្នុងឈុតក្រហ្សេកូនកំលោះដើរត្រសងនៅក្បែរកូនក្រមុំរបស់អ្នក ដែលជាថ្មីម្ដងទៀតមិនមែនជាស្រីល្ងង់ម្នាក់នេះ។ គ្មានអ្វីត្រូវស្ដីបន្ទោស មានតែពាក្យជូនពរ។ ខ្ញុំស្រលាញ់អ្នកជាងពាក្យស្រលាញ់ទៅទៀត តែរយៈពេលប៉ុណ្ណេះក៏គួរតែបញ្ចប់ហើយ។ អរគុណណាស់ដែលអ្នករៀបការ ព្រោះបើអ្នកមិនរៀបការ ស្រីល្ងង់រូបនេះនឹងរង់ចាំបងបន្តទៀត។
លាហើយស្នេហាតែម្ខាងរបស់ខ្ញុំ...៕