បើរកសុភមង្គលឲ្យគ្នាមិនឃើញទេ កុំចូលមកក្នុងជីវិតគ្នាអី

2017-12-08 03:14:14
ចំនួនមតិ 0 | ចំនួនចែករំលែក 0

អ្វីដែលឈឺចាប់បំផុតនៅលើលោកនេះនោះគឺ នៅពេលយើងដើរចូលជីវិតរបស់នរណាម្នាក់ហើយវាក៏ប្រែក្លាយជាឋាននរកជំនួសឲ្យឋានសួគ៌ ក្នុងកំឡុងពេលស្រលាញ់គ្នា។ តែអ្វីដែលកាន់តែទុក្ខសោកជាងនេះទៀតនោះគឺ អ្នកទាំង២មិនព្រមព្រលែងគ្នាចេញពីឋាននរកនោះ។ នេះគេហៅថាផ្លូវទាល់នៃមនោសញ្ចេតនា។

គេតែងសួរថា សុភមង្គលរវាងមនុស្ស២នាក់គឺជាអ្វី? អ្នកខ្លះថានោះគឺអាពាហ៍ពិពាហ៍ហើយរស់នៅជាមួយគ្នា។ តែមង្គលការមិនមែនជាការធានាឲ្យសុភមង្គលឯណា។ បើមានសុភមង្គល គឺមានតាំងពីដើមឯណោះ មិនមែនរៀបការហើយគឺមានសុភមង្គលនោះឡើយ។ បើនិស្ស័យតម្រូវមកថាគ្មានសុភមង្គលទៅហើយ មង្គលការគ្រាន់តែជាចំណងតែប៉ុណ្ណោះ។ ពេលចាប់ផ្ដើមមនោសញ្ចេតនាមួយ គួរណាស់ នាំមកនូវអ្វីដែលល្អ បើទោះបីជាថ្ងៃក្រោយបែកគ្នាក៏នៅអាចញញឹមដាក់គ្នាបាន។ ហើយការដើរជាមួយគ្នានោះ ទោះបីជាខ្លីក៏ដោយ ក៏ជាជម្រើសដ៏ត្រឹមត្រូវមួយ ដើម្បីកុំឲ្យពេលនឹកឃើញហើយស្ដាយក្រោយជាមួយការជ្រើសយករបស់ខ្លួន។

មានពេលខ្លះ មនោសញ្ចេតនាពិតជាធ្វើឲ្យមនុស្សគិតលែងត្រូវពិតមែន តែវាគ្រាន់តែពេលខ្លះប៉ុណ្ណោះ ហើយក្រៅពីនោះ គឺយើងផ្ទាល់ដែលត្រូវទទួលខុសត្រូវចំពោះវា។ កុំបន្ទោសថាមកពីស្រលាញ់ហើយគិតអត់ដល់ ធំអស់ហើយ មិនមែនក្មេងទៀតឡើយ។ ពេលចូលក្នុងជីវិតនរណាម្នាក់ ត្រូវធានាថានឹងនាំមកសុភមង្គលឲ្យគេ ឬយ៉ាងហោចណាស់ក៏មានកំឡុងពេលរីករាយដែរ។ បើមិនធានាទេ សូមបញ្ឈប់ហើយ គិតឡើងវិញ ឬបោះបង់គំនិតនេះតែម្ដងក៏បាន។

មានមនុស្សជាច្រើន ដោយសារតែគិតថាគេស្រលាញ់យើងខ្លាំងពេក ហើយក៏ចង់ចូលក្នុងជីវិតគេដើម្បីលេងសើចមួយរយៈឲ្យសប្បាយ។ តែទង្វើនេះក្រៅពីធ្វើឲ្យគេឈឺ យើងក៏ជាប់ឈ្មោះជាមនុស្សលេងសើចនឹងមនោសញ្ចេតនារបស់គេដូចគ្នា៕