ក្លាយជាមនុស្សល្ងង់ម្នាក់ហើយ ឲ្យតែចូលចិត្តផុស ៥យ៉ាងនេះលើហ្វេសប៊ុក

2017-11-29 00:55:00
ចំនួនមតិ 0 | ចំនួនចែករំលែក 0

អត្ថបទនេះ នឹងបង្ហាញពីអ្វីដែលនារីៗគួរយល់ដឹងពាក់ព័ន្ធនឹងការបង្ហាញរឿងរ៉ាវផ្សេងៗលើបណ្ដាញសង្គមដូចជា Facebook និង Instagram ជាដើម។ ជឿជាក់ថាស្រីៗសម័យអ៊ីនធឺណិតប្រាកដជាចំណាយពេលវេលាច្រើនជាមួយបណ្ដាញសង្គមទាំងនេះ ដោយសារវាមានភាពងាយស្រួល អាចទទួលបានដំណឹងរហ័សទាន់ហេតុការណ៍ ប៉ុន្តែបណ្ដាញនេះក៏អាចបំផ្លាញជីវិតយើងបានដែរ ឬអាចធ្វើឲ្យអ្នកដទៃមើលមកយើងមិនល្អទៀតផង បើសិនមិនប្រយ័ត្ន។ តាមដានជាមួយ កញ្ញា ទាំងអស់គ្នាថាតើទង្វើលើហ្វេសប៊ុកដូចម្ដេចខ្លះដែលអាចឲ្យយើងក្លាយជាមនុស្សល្ងង់ក្នុងខ្សែភ្នែកអ្នកដទៃ៖

១. ផុសជេរសង្សារចាស់ ហើយចង់ដុតផ្ទះសង្សារថ្មីរបស់គេ

ពិតហើយនៅពេលខូចចិត្ត យើងពិតជាពិបាកទ្រាំ ហើយត្រូវការកន្លែងបញ្ចេញអារម្មណ៍ ប៉ុន្តែសូមរំឭកថាបណ្ដាញអ៊ីនធឺណិតមិនមែនជាទីកន្លែងឯកជនសម្រាប់យើងនោះទេ ប៉ុន្តែវាជាបណ្ដាញសាធារណៈ ដូច្នេះហើយនៅពេលដែលយើងនិយាយអ្វីផ្ដេសផ្ដាសពីសង្សារចាស់ វានឹងធ្វើឲ្យតម្លៃរបស់យើងធ្លាក់ចុះ ហើយកាន់តែធ្ងន់ធ្ងរបើផុសជេរដល់សង្សារចាស់របស់គេទៀត។ បើចង់បញ្ចេញអារម្មណ៍គួរជ្រើសរើសកន្លែងផ្សេងក្រៅពីបណ្ដាញសង្គម ដោយនិយាយប្រាប់មិត្តភ័ក្ដិ ឬនរណាដែលយើងទុកចិត្តបំផុតបានហើយ។

២. បង្ហោះរូបយំ

ជួនកាលយើងក៏ចង់បានកម្លាំងចិត្តខ្លះពីមិត្តភ័ក្ដិក្នុងហ្វេសប៊ុក ប៉ុន្តែការបង្ហោះរូបយំអីនេះ គឺដូចជាទាក់ទាញចំណាប់អារម្មណ៍ខ្លាំងបន្តិចហើយ ព្រោះវាមានន័យថាអ្នកមិនអាចគ្រប់គ្រងលើអារម្មណ៍ខ្លួនឯងបាន ហើយកុំសង្ឃឹមថាធ្វើបែបនេះហើយអាចធ្វើឲ្យមនុស្សភាគច្រើនយល់ចិត្តអ្នក តែគេមានតែគិតថាអ្នកនៅមានចរិតក្មេងមែនទែន។

៣. Comment សម្ដីឈ្លើយៗ ហើយឡើងជឿជាក់

សេរីភាពនៅលើបណ្ដាញសង្គមបានធ្វើឲ្យមនុស្សបង្ហាញទង្វើ និងទស្សនៈអាក្រក់ៗចេញមកដោយតាំងចិត្ត និងមិនបានតាំងចិត្ត ដូចជាការ Comment ប្រកែកតវ៉ាដោយសារនរណាម្នាក់មិនធ្វើអ្វីមួយឲ្យត្រូវចិត្តរបស់ខ្លួន ឬនរណាម្នាក់មានគំនិតផ្ទុយពីខ្លួនឯង ដោយប្រើពាក្យសម្ដីមិនសមរម្យ ប៉ះពាល់កិត្តិយសរបស់គេ និងបាត់បង់ភាពថ្លៃថ្នូររបស់ខ្លួនឯងក្នុងពេលតែមួយ។ មិនត្រឹមប៉ុណ្ណឹងឆ្លៀតបញ្ចប់ ដោយឃ្លាជឿជាក់មួយចំនួនទៀតដូចជា “តាមការយល់ឃើញផ្ទាល់ខ្លួន”, “ហ៊ានជេរ ជេរវិញ” ជាដើម។

៤. យករឿងផ្ទៃក្នុង មកហែកហួរឲ្យពិភពលោកដឹង

មិនថាជារឿងមិត្តភ័ក្ដិ រឿងស្នេហា រឿងគ្រួសារ ឬនៅកន្លែងធ្វើការក៏ដោយ ការយកមកហែកកេរ្តិ៍ឲ្យពិភពលោកដឹង មិនបានជួយដោះស្រាយបញ្ហាអ្វីនោះទេ គឺមានតែធ្វើឲ្យបញ្ហាកាន់តែធំ។ ដូច្នេះគួររកវិធីចាត់ការដែលសមរម្យជាងនេះ ព្រោះបើយើងជ្រុលបង្ហោះអ្វីខុសនោះ អាចជីវិតយើងរងផលប៉ះពាល់ផ្សេងៗបានយ៉ាងងាយ ហើយអ្វីកាន់តែសំខាន់នោះគឺវាហាក់ដូចជាអ្នកគ្មានសមត្ថភាពគ្រប់គ្រាន់ក្នុងការដោះស្រាយបញ្ហាផ្សេងៗ និងសូម្បីតែគ្រប់គ្រងអារម្មណ៍ខ្លួនឯង។

៥. មាត់ដាចជាទម្លាប់

យុវវ័យសម័យនេះអាចនឹងគិតថា ការបង្ហាញពាក្យពេចន៍ដាច់សាច់ គឺជារឿងឡូយ ឬចង់បង្ហាញថាខ្លួនឯងជាមនុស្សមិនលាក់ពុត ប៉ុន្តែការពិតគឺពួកគេកំពុងបង្ហាញភាពទន់ខ្សោយ និងភាពមិនជឿជាក់ឲ្យពិភពលោកបានដឹងទៅវិញទេ ព្រោះមនុស្សម៉ឺងម៉ាត់ពិតប្រាកដគេនឹងបង្ហាញឲ្យឃើញតាមរយៈសកម្មភាព មិនមែនប្រើពាក្យអាក្រក់ៗមកទាក់ទាញចំណាប់អារម្មណ៍តាមបណ្ដាញសង្គមឡើយ។