ស្រឡាញ់គ្នាបែបណា ទើបគ្មានទុក្ខ និងការឈឺចាប់? ៥ចំណុចនេះសំខាន់បំផុត!

2017-11-20 01:02:00
ចំនួនមតិ 0 | ចំនួនចែករំលែក 0

“ទីណាមានស្នេហា ទីនោះមានការឈឺចាប់" គ្រប់គ្នាប្រហែលជាធ្លាប់បានឮពាក្យនេះ តែស្នេហាក៏មិនមែនត្រូវតែឈឺចាប់រហូតនោះទេ។ កុំភ្លេចថា ស្នេហាក៏បានបង្កើតអ្វីល្អៗសម្រាប់ជីវិតយើងដូចគ្នា។ ការឈឺចាប់ ខូចចិត្ត អាចកើតមានដោយសារយើងមិនបានយល់ច្បាស់ថាស្នេហា គឺវាលើសពីការស្រឡាញ់គ្នា ដែលទាមទារឲ្យមានកត្តារួមផ្សំជាច្រើនទៀតដើម្បីឲ្យវាដំណើរការទៅរលូន។

ប៉ុន្តែវាក៏មិនអាចទៅរួចដែរដែលគូស្នេហ៍អាចមានក្ដីសុខគ្រប់ពេល។ ពេលខ្លះបញ្ហាក៏អាចកើតឡើងខ្លះ ដូចអណ្ដាតនិងធ្មេញត្រូវប៉ះទង្គិចគ្នា គឺជារឿងធម្មតា។ ប៉ុន្តែបើមានបញ្ហាកើតឡើងច្រើនពេក យើងត្រូវអង្គុយគិតរកហេតុផលឲ្យបានច្បាស់លាស់។ ខាងក្រោមនេះ កញ្ញា នឹងបង្ហាញថាតើស្រឡាញ់គ្នាដូចម្ដេចទើប “គ្មានទុក្ខ”៖

រូបតំណាង

**១. ស្រឡាញ់គ្នាប៉ុន្តែក៏មានការក្រែងចិត្ត**

ពិតហើយថាមនុស្សស្រឡាញ់គ្នា គឺគួរតែមានចិត្តមួយថ្លើមមួយ អាចនិយាយជាមួយគ្នាបានគ្រប់រឿង ប៉ុន្តែពេលខ្លះក៏គួរយល់អារម្មណ៍គ្នា ដោយយកចិត្តគេមកដាក់ក្នុងចិត្តយើងខ្លះ។ យកល្អ អ្នកគួរមានការក្រែងចិត្តគ្នា និងខ្វល់ខ្វាយពីអារម្មណ៍គ្នាឲ្យបានច្រើន។

២. ស្រឡាញ់គ្នាដោយការយល់ចិត្ត

ចំណុចនេះសំខាន់ណាស់ព្រោះ ប្រសិនបើយើងស្រឡាញ់គ្នាប៉ុន្តែគ្មានការយល់ចិត្តគ្នាទេ វាក៏ពិបាកនឹងធ្វើឲ្យស្នេហារលូនទៅមុខបានដែរ ថែមទាំងធ្វើឲ្យមានទុក្ខញឹកញាប់ទៀត។ ឧទាហរណ៍បើខាងប្រុសជាមនុស្សចូលចិត្តជួបជុំជាមួយមិត្តភ័ក្ដិ ប៉ុន្តែមិនពេញចិត្ត មិនមានការយោគយល់ពីតម្រូវការរបស់មនុស្សប្រុស នោះវានឹងអាចបង្កឲ្យមានបញ្ហានានាកើតឡើង។ ក្នុងសេចក្ដីស្នេហា អ្វីដែលសំខាន់លើសពីការស្រឡាញ់គឺការចេះយោគយល់ ទុកចិត្តគ្នាទៅវិញទៅមក ទើបធ្វើឲ្យស្នេហាមានភាពស្ថិតស្ថេរយូរអង្វែង។

៣. ស្រឡាញ់គ្នាដោយមិនរំពឹងចង់បាន

នៅពេលស្រឡាញ់គ្នា យើងក៏មានការរំពឹងចង់ឲ្យភាគីម្ខាងទៀតក្លាយជាបែបនេះ បែបនេះតាមចិត្តយើងប្រាថ្នា ប៉ុន្តែបើវាមិនដូចអ្វីដែលយើងរំពឹងទេ វាមានតែធ្វើឲ្យយើងខកចិត្ត ព្រោះគ្មាននរណាអាចធ្វើតាមអ្វីដែលយើងចង់បានទាំងអស់នោះទេ។ គួរគិតថាស្នេហាគឺការ “ផ្ដល់ឲ្យ” ដូច្នេះអ្នកគួរតែកុំរំពឹងអ្វីច្រើនពេក។ អ្វីដែលសំខាន់អ្នកទាំងពីរត្រូវព្យាយាមធ្វើវាឲ្យអស់ពីសមត្ថភាព ហើយព្រមទទួលយកលទ្ធផលឲ្យបាន។

រូបតំណាង

៤. ទទួលស្គាល់ការប្រែប្រួល

ស្រឡាញ់គ្នាដំបូង អ្វីៗគ្រប់យ៉ាងក៏ផ្អែមល្ហែម ពិភពលោកហាក់មានតែពណ៌ស៊ីជម្ពូ ប៉ុន្តែជឿទៅថាគ្មានអ្វីដែលអាចដូចដើមរហូតនោះទេ ព្រោះសូម្បីតែខ្យល់ក៏ត្រូវប្ដូរទិស ចុះទម្រាំមនុស្ស។ ដូច្នេះ បើគេមិនផ្អែមល្ហែមដូចដើមទេ វាអាចដោយសារគេមានការងារកាន់តែច្រើន ឬដោយសារស្នេហាយើងបាត់បង់ភាពផ្អែមល្ហែមខ្លះ ប៉ុន្តែមិនមែនមានន័យថាគេលែងស្រឡាញ់យើងនោះទេ។ ជម្រើសល្អ អ្នកគួរធ្វើចិត្តទទួលយកវាឲ្យបាន ហើយព្យាយាមបន្ថែមភាពផ្អែមល្ហែមឲ្យគ្នាវិញប្រសើរជាង។

៥. ចេះអភ័យទោសឲ្យគ្នាពេលមានកំហុសឆ្គង

គ្មាននរណាមិនធ្លាប់ធ្វើខុសនោះទេ សូម្បីតែអ្នកប្រាជ្ញក៏នៅភ្លាត់ភ្លេចម្ដងៗ ដូច្នេះពេលខ្លះមនុស្សដែលយើងស្រឡាញ់ក៏អាចធ្វើអ្វីមួយខុស ដែលធ្វើឲ្យយើងមិនពេញចិត្ត ធ្វើឲ្យយើងខឹង ប៉ុន្តែបើយើងស្រឡាញ់គេ ហើយជ្រើសរើសគេជាគូជីវិតហើយ យើងក៏ត្រូវទទួលស្គាល់ និងអាចអភ័យទោសឲ្យគេជានិច្ច ចាប់ពីរឿងតូចតាចដល់រឿងផ្សេងៗ។ ប៉ុន្តែអ្នកដែលធ្វើខុសហើយ គឺត្រូវទទួលកំហុស និងរៀនកែប្រែអ្វីដែលខុសឆ្គងនោះ មិនឲ្យកើតមានញឹកញាប់ ពុំដូច្នោះទេ វានឹងអាចដល់ចំណុចមួយដែលភាគីម្ខាងទៀតអស់ការអត់ធ្មត់ ៕

ចុចអាន៖

ប្រភព៖ fungtumpost ប្រែសម្រួល៖ ស្វាយ វ៉ាន់ថន