ប្ដីល្អក៏អាចក្លាយជាប្ដីអាក្រក់បាន បើប្រពន្ធមិនចោលចរិត ៥យ៉ាងនេះ

2017-11-19 01:56:17
ចំនួនមតិ 0 | ចំនួនចែករំលែក 0

មុននឹងសម្រេចចិត្តរៀបការជាមួយបុរសណាម្នាក់ មនុស្សស្រីគ្រប់រូបតែងតែសង្កេត និងរៀនសូត្រពីអត្តចរិត ទម្លាប់ ចំណង់ចំណូលចិត្ត ឬបុគ្គលិកលក្ខណៈដទៃទៀតយ៉ាងច្រើន ដើម្បីប្រាកដថាបុរសម្នាក់នោះមានគុណសម្បត្តិគ្រប់គ្រាន់ក្នុងការក្លាយជាអនាគតស្វាមីល្អរបស់ខ្លួន។ ប៉ុន្តែក្រោយរៀបការរួចទង្វើរបស់មនុស្សស្រីខ្លួនឯងមួយចំនួនបានឲ្យប្តីល្អម្នាក់ប្រែជាអាក្រក់ដោយមិនដឹងខ្លួន៖

រូបតំណាង

**១. លែងឲ្យតម្លៃចំពោះទង្វើល្អរបស់គាត់**

ទង្វើល្អសាមញ្ញៗរបស់គាត់ចំពោះអ្នកដូចជា បើកទ្វាឡាន យកសំរាមទៅចោល វៃពីងពាង ចាក់សាំងឡាន អ្នកចាប់ផ្តើមស៊ាំជាមួយវា រហូតគិតថាវាជាតួនាទីរបស់គាត់។ អ្នកលែងមានអារម្មណ៍រំភើប ឬត្រេកអរដូចពីមុន។

២. រិះគន់ហួសហេតុ

ពេលអ្នកមួម៉ៅអ្នកតែងជះកំហឹងដាក់គាត់ រករឿងចាប់កំហុស រិះគន់នូវកំហុសសព្វគ្រប់បែបយ៉ាងរបស់គាត់។ មនុស្សប្រុសណាក៏មិនចូលចិត្តការរអ៊ូរទាំរបស់ប្រពន្ធដែរ។ ការអត់ធ្មត់របស់គាត់មានកម្រិត ដូច្នេះវានឹងផ្ទុះនៅពេលណាមួយជាក់ជាមិនខាន។

៣. អ្នកមើលស្រាលចំពោះតួនាទីរបស់គាត់

ជាមនុស្សស្រីដែលធ្វើការពេញម៉ោង ហើយមកដល់ផ្ទះត្រូវដើរតួនាទីជាមេផ្ទះ ចំណែកឯប្តីបែរជាអង្គុយចុចទូរស័ព្ទយ៉ាងស្រួល។ ជឿជាក់ថាអ្នកប្រាកដជាធុញទ្រាំ និងលែងផ្តល់តម្លៃចំពោះតួនាទីជាប្តីរបស់គាត់។ អ្នកត្រូវដឹងថាមនុស្សប្រុសធ្លាប់តែជាមេគ្រួសារ ហើយគាត់មិនទាន់សម្របខ្លួនជាមួយរបត់សង្គមថ្មី។ កុំលាក់ទុកសម្ពៀតបែបនោះក្នុងខ្លួនតែឯង អ្នកទាំងពីរគួរពិភាក្សាគ្នារកដំណោះស្រាយរួម។

រូបតំណាង

៤. យកតែចិត្តខ្លួនឯង

មុនរៀបការ អ្នកទាំងពីរតែងលះបង់ឲ្យគ្នាទៅវិញទៅមក។ ប៉ុន្តែក្រោយមកអ្នកតែងតែចង់ឲ្យគាត់តម្រូវចិត្តខ្លួនតែម្ខាង ដូចជាអ្នកចង់ញ៉ាំរបស់ដែលអ្នកចូលចិត្តគ្រប់ពេល លែងខ្វល់ពីចំណូលចិត្តរបស់គាត់។ ច្បាស់ណាស់ប្រសិនគាត់ប្រឆាំង ឬជំទាស់ អ្នកប្រាកដជានិយាយថាគាត់លែងស្រឡាញ់អ្នកដូចមុន។

៥. ការរំពឹងខ្ពស់

មនុស្សស្រីណាក៏ចង់ឲ្យប្តីខ្លួនជោគជ័យដែរ ប៉ុន្តែពេលខ្លះប្រសិនបើអ្នករំពឹងខ្ពស់ពេក វានឹងផ្តល់សំពាធផ្លូវចិត្តដល់គាត់។ សម្រាប់រឿងក្នុងផ្ទះ ប្រសិនអ្នកចង់ឲ្យគាត់ជួយអ្វី ប្រាប់គាត់ទៅ កុំលាក់ក្នុងចិត្ត រួចរំពឹងថាគាត់ដឹងដោយខ្លួនឯង។ មនុស្សប្រុសមិនមែនទេវតាដែលអាចដឹងគ្រប់រឿងនោះទេ ៕

ប្រភព៖ familyshare ប្រែសម្រួល៖ អូន បញ្ញា