ហេតុផល ៦យ៉ាងដែលអ្នកគួរស្រឡាញ់មនុស្សប្រុសមិនសង្ហា
- 2017-11-17 10:31:24
- ចំនួនមតិ 0 | ចំនួនចែករំលែក 0
ហេតុផល ៦យ៉ាងដែលអ្នកគួរស្រឡាញ់មនុស្សប្រុសមិនសង្ហា
“មនុស្សយើងរើសកំណើតមិនបានទេ” ប្រយោគនេះពិតខ្លាំងណាស់ ព្រោះបើសិនរើសបានមែន អ្នកណាៗក៏ចង់កើតមកមានមុខមាត់ស្អាតទាំងព្រមដែរ ត្បិតមនុស្សភាគច្រើនចូលចិត្តសម្លឹងមើលតែមនុស្សស្អាត សង្ហា។ ទោះយ៉ាងណាមនុស្សប្រុសដែលមានមុខមាត់ធម្មតាៗ ក៏កុំទាន់តូចចិត្តតូចថ្លើមអី ព្រោះមនុស្សស្រីភាគច្រើនមិនបានរើសគូដោយមើលលើរូបរាងខាងក្រៅជាធំនោះទេ។ មិនតែប៉ុណ្ណោះ ពេលខ្លះការមានសង្សារមិនសង្ហាអាចមានគុណសម្បត្តិច្រើននឹកស្មានមិនដល់ទៀតផង។ ចង់ដឹងមានអ្វីខ្លះ សូមតាមដានជាមួយ កញ្ញា ខាងក្រោមនេះ៖
១. មិនបាច់ព្រួយបារម្ភ ខ្លាចមនុស្សស្រីផ្សេងមកចែចង់
អ្នកនឹងមិនបាច់ខ្វល់ខ្វាយច្រើន ព្រោះមិនបាច់ចាំឃ្លាំមើលថាអ្នកណាមកលួចមើល ឬដណ្ដើមគូស្នេហ៍របស់យើងដូចជាការមានគូស្នេហ៍ជាបុរសសង្ហា ព្រោះមនុស្សប្រុសមិនសង្ហារមែងមិនមែនជាគោលដៅរបស់មនុស្សស្រីទាំងនោះឡើយ។ ដូច្នេះបើដឹងថាខ្លួនឯងជាមនុស្សស្រីពូកែប្រចណ្ឌ គួរជ្រើសរើសសង្សារមុខមាត់ធម្មតាៗទើបអាចស្រណុកចិត្តជាង។
២. យើងនឹងលេចធ្លោជានិច្ច
នៅពេលបណ្ដើរគ្នា ឬទៅណាមកណាជាមួយគ្នា អ្នកនឹងមើលទៅស្រស់ស្អាតជានិច្ច ព្រោះគ្មានសម្រស់របស់គេមកលុប ហើយអ្នកនឹងបានឮពាក្យសរសើរពីមិត្តភ័ក្ដិរបស់គេជានិច្ចថា “សង្សាររបស់ឯងស្អាតដល់ហើយ”។ ឮតែប៉ុណ្ណឹងញញឹមបានបីបួនថ្ងៃបាត់ មែនអត់?
៣. អ្នកនឹងត្រូវគេសរសើរថាជាមនុស្សស្រីដែលរើសគូដោយមិនមើលលើសម្រស់
ក្រៅពីមើលទៅស្រស់ស្អាតពីខាងក្រៅហើយ ការមានសង្សារមិនសូវសង្ហា ក៏នឹងធ្វើឲ្យអ្នកមើលទៅជាមនុស្សស្រីមានទឹកចិត្តល្អទៀតផង ព្រោះវាបង្ហាញថាអ្នកមើលឃើញតម្លៃពិតរបស់គេលើសពីសម្បកខាងក្រៅ។
៤. គេនឹងមិនងប់ងុលនឹងខ្លួនឯង
មនុស្សប្រុសដែលមានមុខមាត់ធម្មតាៗ រមែងមិនសូវទទួលបានការសរសើរញឹកញាប់ដូចអ្នកមានមុខមាត់ស្អាតនោះទេ ដូច្នេះគេនឹងមិនសូវមានភាពងប់ងុលនឹងខ្លួនឯង មិនគិតថាខ្លួនអស្ចារ្យជាងអ្នកដទៃ ហើយក៏គ្មានផ្លូវនិយាយអ្វីដែលធ្វើឲ្យអ្នកអន់ចិត្តនឹងខ្លួនឯងដែរ។
៥. គេនឹងព្យាយាមអភិវឌ្ឍផ្នែកផ្សេងៗរបស់ខ្លួនជានិច្ច
ព្រោះដឹងថាខ្លួនមិនមានចំណុចទាក់ទាញលើមុខមាត់ គេនឹងត្រូវអភិវឌ្ឍសមត្ថភាពផ្សេងៗរបស់ខ្លួនឲ្យបានល្អ មិនថាការងារ សមត្ថភាព ឬសូម្បីតែអត្តចរិតផ្ទាល់ខ្លួន ដើម្បីឲ្យមើលទៅគ្រាន់បើនឹងគេខ្លះ។ ប៉ុន្តែចំណុចទាំងនេះគឺសំខាន់ជាងមុខមាត់ទៅទៀត ដូច្នេះហើយនារីៗអាចទុកចិត្តផ្ញើអនាគតជាមួយគេបាន។
៦. គេនឹងសុខចិត្តចាញ់អ្នកច្រើនជាងបុរសសង្ហា
នៅពេលគេគ្មានភាពងប់ងុលនឹងខ្លួនឯង នៅពេលណាមានបញ្ហាឈ្លោះគ្នា គេនឹងងាយព្រមចុះចាញ់អ្នកច្រើនជាងបុរសដែលសង្ហា ព្រោះជាធម្មតាអ្នកមានមុខមាត់ស្អាតនឹងមានជម្រើសច្រើនទៀតចូលមកក្នុងជីវិតរបស់គេ ដែលធ្វើឲ្យគេយល់ថាអ្នកត្រូវលួងគេ។ ដូច្នេះហើយមនុស្សប្រុសដែលមានមុខមាត់ធម្មតានឹងអាចផ្ដល់ការថ្នាក់ថ្នមដល់អ្នកច្រើនជាង។
ឃើញទេ ការមានគូស្នេហ៍មានមុខមាត់ធម្មតាៗមានគុណសម្បត្តិច្រើនណាស់ ដូច្នេះហើយស្រីៗគួរសាកល្បងបើកចិត្តខ្លះ កុំឲ្យការរំពឹងលើរូបរាងខាងក្រៅធ្វើឲ្យអ្នកបាត់បង់ឱកាសក្នុងការជួបដៃគូជីវិតដែលល្អៗ ព្រោះរូបសម្រស់ខាងក្រៅមិនមែនជាអ្វីដែលស្ថិតស្ថេរនោះទេ អ្វីដែលសំខាន់បំផុតនោះគឺអត្តចរិតនិងចិត្តគំនិតដូចគ្នាប៉ុណ្ណោះទើបអាចឲ្យស្នេហាគង់វង្សយូរអង្វែងបាន ៕
ចុចអាន៖
ចាំទុក! បើស្រឡាញ់ប្ដី កុំឲ្យប្ដីរកលុយតែម្នាក់ឯងឲ្យសោះ!
មុនរៀបការជាមួយអ្នកណាម្នាក់ អ្នកត្រូវតែដឹងរឿងទាំងនេះមុនសិន