ឧស្សាហ៍ឈឺជើង ប្រយ័ត្នកើតបញ្ហានេះ

2017-11-17 09:24:14
ចំនួនមតិ 0 | ចំនួនចែករំលែក 0

ជំងឺស្ទះសរសៃវ៉ែន (DVT) ជាបញ្ហាសុខភាពមួយកំពុងកើតឡើងញឹកញាប់បំផុត សូម្បីតែពេលកំពុងធ្វើដំណើរយូរក៏ដោយ។ វាជាកំណកឈាមក្នុងសរសៃវ៉ែន ហើយភាគច្រើនបំផុត កើតនៅសរសៃវ៉ែនដែលនៅជ្រៅនៃជើង ឬដៃ។ ជំងឺនេះគំរាមកំហែងដល់ជីវិត ដោយស្ទះសរសៃឈាមសួត ឬបាត់បង់មុខងាររបស់ប្រឹសបេះដូង និងហើមជើងរ៉ាំរ៉ៃ។

កំណកឈាមក្នុងសរសៃវ៉ែនដែលនៅជ្រៅ អាចគ្មានរោគសញ្ញាឲ្យយើងមើលឃើញ ប៉ុន្តែករណីខ្លះ រោគសញ្ញាអាចលេចឡើង ដូចជា ហើម និងឈឺចុកចាប់លើជើង ឈឺចាប់ខ្លាំងនៅតំបន់មានកំណកឈាមស្ទះ ស្បែកនៅលើតំបន់មានកំណកឈាម ឡើងក្ដៅ និងក្រហមខុសធម្មតា។

ជាទូទៅ អ្នកជំងឺ ៥០% ឈឺចាប់ជើង។ បើមិនព្យាបាល ដុំឈាមកកអាចនឹងបែកជាបំណែកតូចៗ ធ្វើដំណើរទៅកាន់សរសៃឈាមនៅសួត ហើយធ្វើឲ្យរាំងស្ទះចរន្តឈាមទៅសួត ដែលជាហេតុធ្វើឲ្យស្ទះសរសៃឈាមសួត (pulmonary embolism) គំរាមកំហែងដល់ជីវិត។

មនុស្សប្រភេទណាខ្លះ អាចកើតជំងឺស្ទះសរសៃវ៉ែន?

មនុស្សចាស់
អ្នកមានជំងឺដាច់សរសៃឈាមខួរក្បាល ឬអសកម្មរយៈពេលយូរ ដូចជា បន្ទាប់ពីការវះកាត់ ឬអំឡុងពេលធ្វើដំណើរផ្លូវឆ្ងាយ
អ្នកទទួលការវះកាត់ធំ ជាពិសេស ការវះកាត់ពោះ ឆ្អឹងអាងត្រគាក និងអាវៈយវៈខាងក្រោម
អ្នកមានគ្រោះថ្នាក់បាក់ឆ្អឹងត្រគាក ភ្លៅ ឬជើង
អ្នកជំងឺខ្សោយបេះដូង និងស្ទះសរសៃឈាមបេះដូង
អ្នកជំងឺទឹកនោមប្រៃ
ស្ដ្រីមានផ្ទៃពោះ អ្នកប្រើថ្នាំពន្យារកំណើត ឬអ្នកប្រើអ័រម៉ូនក្រោយអស់រដូវ
លើសទម្ងន់ ឬធាត់។

ត្រូវការពារម៉េចខ្លះ?

សម្រាប់អ្នកមានភាគរយខ្ពស់កើតជំងឺស្ទះសរសៃវ៉ែន ឬធ្លាប់មានជំងឺនេះពីមុន ទាំងអស់នេះអាចមានប្រយោជន៍៖

កាត់បន្ថយ ឬឈប់ជក់បារី
ញ៉ាំរបបអាហារមានតុល្យភាព
ផឹកទឹកឱ្យបានច្រើន ចៀសវាងផឹកស្រា
ពិនិត្យសុខភាពជាប្រចាំ
ធ្វើចលនាឱ្យបានឆាប់ បន្ទាប់ពីការវះកាត់ ក្រោយពេលគ្រូពេទ្យអនុញ្ញាត ឬជាពីជំងឺ
បើកំពុងធ្វើដំណើរ សូមធ្វើចលនាជើងឲ្យបានញឹកញាប់ ដោយបត់ និងសណ្ដូកជើង។ អ្នកអាចឈរ និងដើរលើយន្តហោះ ដើម្បីបង្កើនលំហូរឈាម និងធ្វើឲ្យឈាមរត់បានស្រួល។
ពាក់ស្រោមជើងរឹតបន្តឹង បង្ការហើមជើង
ប្រើថ្នាំតាមគ្រូពេទ្យប្រាប់

ទោះជាមូលហេតុជំងឺស្ទះសរសៃវ៉ែនភាគច្រើន គេមិនដឹង និងវាអាចជាវិញឯកឯងដោយគ្មានផលវិបាកក៏ដោយ ការស្លាប់ដោយសារការស្ទះសរសៃឈាមសួត (pulmonary embolism) ពាក់ព័ន្ធនឹងជំងឺស្ទះសរសៃវ៉ែន នៅតែមានលទ្ធភាពខ្ពស់។ ដូចនេះ ការធ្វើរោគវិនិច្ឆ័យបានលឿនទាន់ពេល និងព្យាបាលឲ្យបានត្រឹមត្រូវ ជារឿងល្អបំផុត។

បើមានសំណួរពាក់ព័ន្ធនឹងអត្ថបទនេះ ឬការថែរក្សាសុខភាព អាចទាក់ទងតាម៖