ទម្លាប់សម្អាតទ្វារមាសមិនត្រឹមត្រូវ ស្ត្រីគួរយល់ដឹង និងជៀសវាង

2017-11-13 06:00:00
ចំនួនមតិ 0 | ចំនួនចែករំលែក 0

ការថែរក្សាអនាម័យប្រដាប់ភេទគឺពិតជាសំខាន់ណាស់ ព្រោះការថែទាំត្រឹមត្រូវនាំមកនូវសុខភាព តែផ្ទុយទៅវិញបើថែទាំដោយមិនបានដឹងក្បួនច្បាប់ត្រឹមត្រូវ អាចបណ្ដាលឲ្យឆ្លងជំងឺផ្សេងៗបានទៀតផង។ ដូចនេះ កញ្ញា សូមលើកយកទម្លាប់នៃការសម្អាតទ្វារមាសមិនត្រឹមត្រូវ និងផលប៉ះពាល់ដែលស្ត្រីគួរយល់ដឹង ហើយជៀសវាងឲ្យបាន៖

១.ការប្រើក្រដាសអនាម័យក្រោយពេលបន្ទោបង់

ស្ត្រីមួយចំនួនចូលចិត្តជូតត្រង់បរិវេណរន្ធគូទ អូសមកដល់ទ្វារ ដែលនេះមិនគួរអនុវត្តឡើយព្រោះវាបណ្ដាលឲ្យមេរោគដែលតោងជាប់ក្រដាសនោះឆ្លងចូលទៅប្រដាប់ភេទយ៉ាងងាយ។ ការជូតដែលត្រឹមត្រូវគឺគួរប្រើក្រដាសជូតត្រង់បរិវេណទ្វារធំដោយឡែក ហើយសឹមប្រើក្រដាសថ្មីសម្អាតត្រង់បរិវេណទ្វាមាស។

២.កុំប្រើក្រដាសជូតដៃទៅជូតគូទ

ក្រដាសអនាម័យមាននាទីផ្សេងគ្នា ដូចជាក្រដាសសម្រាប់ជូតដៃមានលក្ខណៈក្រាស់រឹងជាងហើយមានបន្ថែមក្លិន រីឯក្រដាសជូតគូទមានលក្ខណៈទន់ ងាយរលាយ ហើយគ្មានក្លិន។ ការប្រើប្រាស់ក្រដាសអនាម័យឲ្យសមស្របគឺសំខាន់ណាស់ ព្រោះស្បែកកន្លែងផ្សេងៗ ក៏ខុសគ្នាដែរ ជាពិសេសត្រង់ចំណុចប្រដាប់ភេទនោះគឺស្ដើង និងងាយរលាកណាស់បើកកិតនឹងងក្រដាសរឹងច្រើនដង។

៣.ហាមអេះ

មិនត្រូវអេះខ្លាំងៗនោះទេទោះបីជារមាស់យ៉ាងណាក៏ដោយ។ ព្រោះក្រចកជាបណ្ដុំនៃមេរោគ ហើយវាធ្វើឲ្យឆ្លងមេរោគផ្សេងៗយ៉ាងងាយទៅទ្វារមាសដោយសារការអេះដាច់ស្បែក។ អ្នកគួរទ្រាំកុំអេះតែបើទ្រាំពុំបាន គួរត្រដុសកន្លែងរមាស់នោះដោយកុំប្រើក្រចក។ ឧស្សាហ៍លាងសម្អាតទ្វារមាសទើបមិនជួបអាការៈបែបនោះ តែបើនៅតែមិនបាត់គួរទៅពិគ្រោះជាមួយពេទ្យ។

៤.កុំប្រើសាប៊ូលាងសម្អាត

សាប៊ូមានច្រើនប្រភេទណាស់ ហើយមាននាទីខុសគ្នា ដូចនេះមិនគួរប្រើសាប៊ូដុសខ្លួនមកលាងសម្អាតបរិវេណនោះឡើយ។ ការលាងសម្អាតទ្វារមាស ត្រូវជ្រើសរើសទឹកអនាម័យដែលមានជាតិអាស៊ីដទាប។

៥.ប្រើសំឡីទ្រាប់

មិនថាតែសម្រាប់ថ្ងៃមករដូវទេ តែសម្រាប់ថ្ងៃធម្មតាក៏គួរប្រើសំឡីដើម្បីទ្រាប់ដែរ។ ព្រោះការប្រើសំឡីតូចៗប្រចាំថ្ងៃនេះ កាត់បន្ថយអត្រាដែលធ្វើឲ្យមានក្លិនមិនល្អ។ ដោយសារទ្វារមាសវាមានចេញទឹករំអិលជាប្រព័ន្ធសម្អាតធម្មជាតិមួយ ហើយវាអប់ទុកនឹងខោក្នុង ដែលបង្កឲ្យមានមេរោគកើតឡើង ព្រមទាំងមានក្លិនមិនល្អ៕

ចុចអាន៖អ្នកចូលចិត្តញ៉ាំអយស្ទ័រ នឹងភ្ញាក់ផ្អើលបើបានដឹងពីប្រយោជន៍របស់វាចំពោះសុខភាព

ប្រភព៖ healthline | Cleveland Clinic ប្រែសម្រួល៖ Pencharm