បញ្ហានេះហើយ អាចធ្វើឲ្យស្ត្រីកើតកូនមិនគ្រប់នេះមិនគ្រប់នោះ

2017-11-10 10:58:36
ចំនួនមតិ 0 | ចំនួនចែករំលែក 0

មានបញ្ហាជាច្រើន កើតឡើងចំពោះស្ត្រីកំពុងពពោះ និងក្រោយសម្រាល។ ប៉ុន្តែ បញ្ហាទូទៅមួយពេលមានផ្ទៃពោះ និងពេលសម្រាលកូន គឺជំងឺស្លេកស្លាំង។ មូលហេតុចម្បងនៃជំងឺនេះ បណ្ដាលមកពីកង្វះជាតិដែក ដែលស្ត្រីមានផ្ទៃពោះប្រមាណជា ២០% ទៅ ៨០% ទូទាំងពិភពលោក កំពុងប្រឈម។

ម៉េចបានស្ត្រីខ្វះជាតិដែក ពេលមានផ្ទៃពោះចឹង?

អេម៉ូក្លូប៊ីន ជាប្រូតេអ៊ីនក្នុងកោសិកាឈាមក្រហមដែលបង្កើតឡើងដោយជាតិដែក។ វាមានតួនាទីដឹកនាំអុកស៊ីហ្សែនទៅជាលិកានៅក្នុងខ្លួនយើង។ ពេលមានផ្ទៃពោះ រាងកាយត្រូវការជាតិដែកច្រើនដើម្បីផលិតឈាមបន្ថែមទៀតសម្រាប់ផ្គត់ផ្គង់អុកស៊ីហ្សែនដល់កូនក្នុងផ្ទៃ។ បើអ្នកគ្មាន ឬទទួលបានជាតិដែកគ្រប់គ្រាន់ទេនោះ រាងកាយក៏ប្រហែលជាមិនអាចផលិតឈាមបានដែរ។ នោះហើយដែលធ្វើឲ្យអ្នកមានជំងឺស្លេកស្លាំង។

ជំងឺស្លេកស្លាំងអំឡុងពេលមានផ្ទៃពោះ កាន់តែធ្ងន់ធ្ងរឡើង ដោយសារលក្ខខណ្ឌផ្សេងៗ ដូចជា ការហូរឈាមពីស្បូន ឬសុក ក្រពះពោះវៀន និងការបាត់បង់ឈាមក្នុងពេលសម្រាលកូន។ កង្វះជាតិដែក អាចធ្វើឲ្យទារកកើតមិនគ្រប់គីឡូ មិនគ្រប់ខែ ទារកធំធាត់យឺតយ៉ាវក្នុងផ្ទៃម្ដាយ ហើយធ្ងន់ធ្ងរ ម្ដាយអាចស្លាប់ទៀតផង។

រោគសញ្ញាកង្វះជាតិដែក ពេលមានផ្ទៃពោះ៖

ខ្សោយ ឬអស់កម្លាំង
វិលមុខ
ដកដង្ហើមញាប់ៗ
ចង្វាក់បេះដូងលោតញាប់ ឬមិនទៀងទាត់
ឈឺទ្រូង
ស្បែក បបូរមាត់ និងក្រចក ស្លេកស្លាំង
ត្រជាក់ចុងដៃ ចុងជើង
ពិបាកផ្ចង់ស្មារតី។

វិធីការពារ

ញ៉ាំវីតាមីនជាតិដែក ឬអាហារផ្ទុកជាតិដែកដែលមានតុល្យភាព អាចទប់ស្កាត់អ្នកពីបញ្ហាខ្វះជាតិដែក។ គួរជៀសវាងញ៉ាំអាហារសម្បូរជាតិកាល់ស្យូម ដូចជា ផលិតផលទឹកដោះគោ ស៊ុតលឿង កាហ្វេ និងតែ ពេលដែលអ្នកលេបថ្នាំជាតិដែក ព្រោះវាអាចរារាំងមិនឱ្យរាងកាយស្រូបយកជាតិដែកបានល្អ។

ជម្រើសព្យាបាលសំខាន់សម្រាប់ជំងឺស្លេកស្លាំងអំឡុងពេលមានផ្ទៃពោះ គឺថ្នាំគ្រាប់ជាតិដែក និងការផ្ដល់ថ្នាំជាតិដែកតាមសរសៃឈាម។ យ៉ាងណាក៏ដោយ អ្នកត្រូវជួបពេទ្យ បើសង្ស័យថាមានជំងឺស្លេកស្លាំង។ កុំព្យាយាមព្យាបាលដោយខ្លួនឯងឲ្យសោះ ព្រោះការប្រើថ្នាំគ្រាប់ជាតិដែកច្រើនពេក អាចបង្កគ្រោះថ្នាក់បានដែរ។ ពិគ្រោះយោបល់ជាមួយពេទ្យ ដើម្បីដឹងពីកម្រិតជាតិដែកត្រឹមត្រូវ។

បើមានសំណួរពាក់ព័ន្ធនឹងអត្ថបទនេះ ឬការថែរក្សាសុខភាព អាចទាក់ទងតាម៖