ចង់ចេះធ្វើ គីមឈី ឆ្ងាញ់ដូចជនជាតិកូរ៉េ រៀនតាមតិចនិកខាងក្រោម

2017-10-25 09:00:00
ចំនួនមតិ 0 | ចំនួនចែករំលែក 0

ប្រិយមិត្តចូលចិត្តញ៉ាំម្ហូបកូរ៉េច្បាស់ជាស្គាល់គីមឈី ដែលជាជ្រក់ស្បៃបូកគោ គីមឈី។ គីមឈីតែងត្រូវបានឃើញនៅលើតុអាហារជានិច្ចសម្រាប់ប្រជាជនកូរ៉េ ដោយសារតែវាជាអាហារសុខភាព និងមានរសជាតិឆ្ងាញ់។ តាមរយៈរឿងភាគកូរ៉េបញ្ចាំងក្នុងស្រុក ធ្វើឲ្យប្រជាជនខ្មែរចេះញ៉ាំអាហារបែបនេះដែរ ហើយនិយមញ៉ាំផ្ទាប់ជាមួយសាច់អាំង។ គីមឈីដែលលក់តាមហាង និងផ្សារទំនើបមានតម្លៃថ្លៃណាស់តែបើធ្វើខ្លួនឯងវិញឆ្ងាញ់ មានអនាម័យ ហើយថែមទាំងជួយសន្សំសំចៃបានទៀតផងដែរ។ ដើម្បីធ្វើ គីមឈី ឲ្យបានឆ្ងាញ់ដូចជនជាតិកូរ៉េ កញ្ញា សូមលើកយកតិចនិកងាយៗ៖

គ្រឿងផ្សំ៖

១.ស្ពៃបូកគោ ២ គីឡូ កាត់ជាកង់ៗប្រវែង ២ ថ្នាំងដៃ

២.ឆៃថាវ១ ផ្លែធំ ឈូសជាសរសៃ

៣.ការ៉ុត ១ ផ្លែ ឈូសជាសរសៃ

៤.ស្លឹកខ្ទឹមមួយដុំប៉ុនកដៃកូនក្មេង ហាន់កង់ ៗកន្លះថ្នាំងដៃ

៥.ស្លឹកគូឆាយ មួយដុំប៉ុនកដៃកូនក្មេង ហាន់កង់ៗកន្លះថ្នាំងដៃ

៦.បន្លែភ្លៅកង្កែបមួយដុំប៉ុនកដៃកូនក្មេង ហាន់កង់ៗកន្លះថ្នាំងដៃ

៧.ស្ពៃចង្កឹះមួយដុំប៉ុនកដៃកូនក្មេង (មិនដាក់ក៏បាន) ហាន់កង់ៗកន្លះថ្នាំងដៃ

ល្បាយគ្រឿង៖

១.ខ្ទឹមសរបកសំបករួច ១៥ កំពឹស

២.ខ្ញីចិតសំបករួចប៉ុនមេដៃ

៣.ម្សៅម្ទេសមត់កូរ៉េ ១ ពែង (២ ពែងបើអ្នកចូលចិត្តហឹរ)

៤.ខ្ទឹមបារាំងកន្លះផ្លែ

៥.ផ្លែប៉ោម ឬផ្លែសារីកន្លះផ្លែ

៦.ស្ករសរមួយកូនចានចង្កឹះ

៧.ទឹកត្រីមួយកូនចានចង្កឹះ

៨.បាយសក្ដៅ ២ ស្លាបព្រាបាយ

៩.ម្ទេសប្លោកក្រហមមួយផ្លែ

វិធីធ្វើ៖

១.យកស្ពៃបូកគោដែលហាន់រួច ទៅត្រាំក្នុងទឹកអំបិល ទុក៣០នាទី សឹមលាងទឹករួចស្រង់ចេញទុកមួយអន្លើ។

២.លាយល្បាយគ្រឿងដែលបានរៀបរាប់ដូចខាងលើលើកលែងតែម្សៅម្ទេសចូលគ្នាទៅក្នុងម៉ាស៊ីន ក្រឡុក។ ក្រឡុកឲ្យមត់រួចចាក់ដាក់ចានគោម ហើយយកម្សៅម្ទេសមកលាយជាមួយ ទុកមួយអន្លើ។ ដោយល្បាយនោះគួរតែមានសភាពខាប់ ឬគោក។

៣.ចាក់ស្ពៃ និងបន្លែផ្សេងៗចូលគ្នាក្នុងចានដែករួចចាក់ល្បាយគ្រឿងចូលលាយគ្នាឲ្យសព្វ សឹមដាក់ក្នុងប្រអប់ជ័រ ឬកែវដើម្បីរក្សាទុក។

ចំណាំ៖

១.ពេលចាក់ដាក់កែវត្រូវសង្កត់វាអោយណែន ដើម្បីកុំឲ្យមានខ្យល់ចូល។

២.ទុកមួយថ្ងៃចាំលើកដាក់ក្លាស់សេក្នុងទូទឹកកក៕

ចុចអាន៖មកដឹងរបៀបធ្វើស្លាបមាន់ដុតទឹកអំពៅ ទុកញ៉ាំល្ងាចនេះទាំងអស់គ្នា!

ប្រភព៖ YouTube អត្ថបទដោយ៖ Pencharm