៤ ម៉ូដសម្រាប់ស្រីៗដែលមិនសូវបានកក់សក់ ឬសក់ឡើងប្រេង!

2017-10-20 09:01:49
ចំនួនមតិ 0 | ចំនួនចែករំលែក 0

គ្រប់គ្នាជាពិសេសស្រីៗយើងហ្នឹងតែម្ដងផ្លាប់ក្រោកពីគេងឡើងសក់មិនទាន់កក់រញ៉េរញ៉ៃហើយស្អិតពិបាកនិងធ្វើម៉ូត។ជួនកាលទៅដោយសារតែគេងជ្រុលងើបឡើងកក់សក់មិនទាន់ ក៏បង្ខំចិត្តទម្លាក់សក់ទាំងស្អិតជំពាក់ចឹងតែម្ដងទៅ។ តែកុំបារម្ភអានអត្ថបទនេះហើយអ្នកនឹងដឹងថាគួរកែច្នៃសក់យ៉ាងមិចហើយពេលមានអាសន្នដូចនេះ៖

១. សក់បួងរបៀបហ្វ្រីស្ទាយ

គ្រាន់តែអានចំណងជើង នឹងដឹងពីម៉ូតបាត់ទៅហើយ។ សក់បួងនេះ នៅបរទេសគេឲ្យឈ្មោះថា Messy Bun ដែលជាសក់បួងម៉ូតរញ៉េរញ៉ៃ។ ក្នុងនោះដែរ គេបានឲ្យនិយមន័យវាថាកាន់តែគ្មានរបៀបកាន់តែស្អាត ដូចនេះហើយទើបវាសក្តិសមណាស់សម្រាប់អ្នកអត់ទាន់កក់សក់ និងគ្មានពេលសិត។

២.ម៉ូតសក់កន្ត្រើង

ឃើញចំណងជើងហើយកុំទាន់សើច។ អ្នកដែលមានម៉ាក់ ឬម៉ាក់យាយចាស់ ដែលអ៊ុតសក់រួញ ច្បាស់ជាធ្លាប់ឃើញ ពួកគាត់រលាស់សក់ក្រោយពេលងើបពីសម្រាន្តភ្លាមដោយមិនព្រមសិតជាដាច់ខាត ដល់ពេលសួរទៅគាត់ថា ខ្លាចរលាភ្លីសក់។ យើងក៏អាចស្អាតបានរបៀបសក់មិនរលាភ្លីនេះដូចគ្នា ដោយគ្រាន់តែភ្ញាក់ឡើងរលាស់សក់ ហើយស្លៀកពាក់ ផាត់មុខ ដើរចេញទៅយ៉ាងមានទំនុកចិត្ត។

៣.ពាក់សក់បន្ថែម

សម័យនេះទំនើបណាស់ អ្នកសក់ខ្លីអាចធ្វើឲ្យវែងបាន រីឯអ្នកសក់ស្ដើងអាចទៅជាក្រាស់បាន។ ចំពោះអ្នកមានសក់ស្ដើង ហើយខ្លី ឬក៏គេងជ្រុលម៉ោង អត់បានកក់ កុំបារម្ភ សក់និងស្អាតបានដោយគ្រាន់តែដាក់សក់បន្ថែម។ គួរពាក់សក់នោះ ជារបៀបស៊ក បន្ទះសក់ ២-៣បន្ទះ កុំប្រើសក់ពាក់ពេញលើក្បាលទាំងមូល។

៤. ក្រងសក់

គ្មានអ្វីស្រួលជាងក្រងសក់ទៀតនោះទេ បើសក់អ្នកវែងឡើងប្រេង ព្រោះមិនបានកក់អាចចំណាយពេល ៣នាទីក្រងសក់។ បន្ទាប់មកទាញជាភ្លីធំៗឲ្យមើលទៅមានរបៀប និងស្អាតបែបសាមញ្ញ ហើយគ្មានអ្នកណាដឹងថាសក់យើងមិនទាន់កក់នោះទេ។