វីវរបាត់! អ្នកប្រើរោមសត្វ របស់មិនស្អាតមកត្បាលត្រចៀក ប្រយ័ត្នរលាកស្រោមខួរ ធ្ងន់ដល់ថ្នាក់...

2017-10-06 08:57:16
ចំនួនមតិ 0 | ចំនួនចែករំលែក 0

អ្នកចូលចិត្តយករោមសត្វ ឬរបស់ផ្សេងៗដែលមិនបានសម្អាតបានល្អ មកត្បាលត្រចៀក អាចនឹងធ្វើឲ្យកើតជំងឺរលាកត្រចៀកស្រួចស្រាវ ហើយបើជំងឺនេះវិវត្តធ្ងន់ធ្ងរ អ្នកនឹងអាចកើតជំងឺរលាកស្រោមខួរ រលាកខួរក្បាល អាប់សែខួរក្បាល និងបាត់បង់ការស្ដាប់ជាអចិន្ត្រៃយ៍។

ជំងឺរលាកត្រចៀក ក៏អាចបណ្ដាលមកពីជំងឺដទៃទៀត ដូចជា ផ្ដាសាយ ផ្ដាសាយធំ ឬប្រតិកម្មអាលែកហ្ស៊ី ដែលអាចឲ្យមានការកកស្ទះ ហើមរន្ធច្រមុះ បំពង់ក និងបំពង់ eustachian tubes (បំពង់តូចចង្អៀតពីរដែលរត់ពីត្រចៀកកណ្ដាលទៅផ្នែកខ្ពស់ខាងក្រោយបំពង់ក និងនៅពីក្រោយរន្ធច្រមុះ)។

ការសម្អាតត្រចៀកតាមបែបបុរាណរបស់ចិន

រោគសញ្ញាជំងឺរលាកត្រចៀក មាន ឈឺត្រចៀក ហូរទឹករងៃពីត្រចៀក ឈឺក្បាល ក្ដៅខ្លួន មួម៉ៅ និងមានអារម្មណ៍ធ្ងន់ៗក្នុងត្រចៀក។ គ្រូពេទ្យអាចផ្ដល់ថ្នាំបំបាត់ការឈឺចាប់ និងថ្នាំបញ្ចុះកម្ដៅមួយចំនួនដើម្បីជួយបន្ថយការឈឺចាប់ និងគ្រុនក្ដៅ ហើយបើធ្ងន់ធ្ងរអាចនឹងឈានដល់វះកាត់។

អ៊ីចឹង អ្នកគួរសម្អាតត្រចៀកភ្លាមៗ បន្ទាប់ពីមានទឹកមិនស្អាតចូលត្រចៀក និងជៀសវាងការដាក់វត្ថុគ្មានអនាម័យក្នុងត្រចៀក ដើម្បីការពារពីការឆ្លងមេរោគ បាក់តេរី ឬវីរុសផ្សេងៗ ព្រមទាំងមិនគួរព្យាយាមត្បាលអាចម៍ត្រចៀកចេញញឹកញាប់ពេកទេ ព្រោះវានឹងចេញដោយខ្លួនឯង។

ម្យ៉ាងទៀត ត្រូវទៅជួបគ្រូពេទ្យភ្លាមៗ ពេលមានអារម្មណ៍ឈឺចាប់ ឬមិនស្រួលក្នុងត្រចៀក ព្រមទាំងជៀសវាងលេបថ្នាំ មុនពេលពិគ្រោះជាមួយគ្រូពេទ្យ ព្រោះអាចឲ្យអ្នកខ្ជះខ្ជាយពេលវេលា លុយកាក់ ឬអាចធ្វើឲ្យស្ថានភាពជំងឺកាន់តែធ្ងន់ធ្ងរ។

បើមានសំណួរពាក់ព័ន្ធនឹងអត្ថបទនេះ ឬការថែរក្សាសុខភាព អាចទាក់ទងតាម៖