បើសិនជានារីខ្មែរណាប្រកាន់យក ៦ ចំណុចនេះ គឺប្រាសចាកពី «ច្បាប់ស្រី»

2017-10-06 03:44:25
ចំនួនមតិ 0 | ចំនួនចែករំលែក 0

«ច្បាប់ស្រី» អាចនឹងមនុស្សគ្រប់គ្នាធ្លាប់ឮ ប៉ុន្តែក៏ប្រហែលមាននារីមួយចំនួនធំមិនសូវបានអនុវត្តន៍ឲ្យបានខ្ជាប់ខ្ជួន។ ថ្ងៃនេះ កញ្ញា នឹងលើកពីចំណុចខ្លះៗយកមកបង្ហាញទៅដល់នារី ដើម្បីជាការដាស់តឿនរំលឹកឲ្យបានដឹងពីអ្វីដែលខ្លួនបានធ្វើ។ ខាងក្រោមនេះជាចំណុចប្រាសចាកពីគន្លងនៃ «ច្បាប់ស្រី» បើសិននារីមានជាប់ខ្លួន៖

១. ឆ្មើងឆ្មៃ ចិត្តមិនបាន៖ មានន័យថាមិនរាប់ញាតិ ឆ្មើងឆ្មៃគិតថាអ្នកដទៃមិនដល់ខ្លួន ឬក៏រិះថាំ ចិត្តមិនបានជាមួយមនុស្សជុំវិញខ្លួន។ ដូចដែលច្បាប់ស្រីលើកឡើងថា**« ក្រមួយមិនចេះរិះគិត ឃើញញាតិឆ្ងាយជិតហៅឡើងឆីស្លា។ ទោះមានមិនមានក្ដីណា ពាក្យផ្អែមចរចារទើបបគេស្រឡាញ់។ កុំជូរចិត្តស្មូរកំណាញ់ មិនមានអស់អញ នឹងញាតិសន្ដាន។»**

រូបតំណាង

**២. ញ៉េះញ៉ោះដូចក្មេង ឃើញប្រុសស្អាតមិនបាន ៖** មនុស្សស្រីដែលលេងមិនចេះគិតដូចក្មេង មិនដឹងកាលៈទេសៈ មានចរិតង៉ក់ងរច្រើន ហើយពេលដែលឃើញមនុស្សប្រុសតែងតែធ្វើឬកធ្វើពារចូលជិតគេឲ្យគេចាប់អារម្មណ៍ខ្លួនឯង ។ ដូចដែលច្បាប់ស្រីលើកឡើងថា**«កុំលេងដូចក្មេងញ៉េះញ៉ោះ ឃើញប្រុសកម្លោះសសៀរចូលជិត សើចព្រៀងកញ្ច្រៀងមិនគិត ប្រុសព្រើលបានចិត្តវាហ៊ានដោយសារ។»**

៣. មិនខំជួយរក តែជួយតែចាយ ៖ នារីដែលពឹងតែប្ដី មិនខំជួយរក មិនខំជួយថែបែរជាចេះតែដើរចាយ សប្បាយតែមាត់ឯង។ បែបនេះមិនសមជាចរិយាមនុស្សល្អនោះទេ ដូចដែលច្បាប់ស្រីលើកឡើងថា**«ហៅស្រីឥតលក្ខណា ឥតមានកិរិយាមាយាទពុុំសម ធ្វើការផងណាប្រើខំ ទោះត្បាញចាក់ដំ នាងខំឲ្យហើយ។»**

រូបតំណាង

៤. ធ្វើការមិនចប់ចុងចប់ដើម ៖ ការងារធ្វើមិនដែលហើយ ទុកចុះទុកឡើង មួយថ្ងៃទៅមួយថ្ងៃមានលេសរហូត។ បើអ្នកជាមនុស្សបែបនេះគឺខុសនឹងច្បាប់ស្រីដែលបានលើកឡើងថា**« កុំទុកតោមុខទឿតឡើយ ថាចាំបង្ហើយកម្រណាស់ណា។ ទោះធ្វើហូលគោមព្រែផ្កា ដាក់ត្បាញហើយណា បានស្រេចសឹមធ្វើ។»**

៥. នាំភ្លើងចេញ និងចូលក្នុងផ្ទះ ៖ មានន័យថានាំរឿងក្ដៅក្រហាយមកចូលកក្នុងផ្ទះទាំងគ្មានបានប្រយោជន៍អីមកវិញក្រៅពីមួរម៉ៅ ឈ្លៅគ្មា។ មួយទៀតគឺនាំរឿងក្នុងផ្ទះទៅដើរប្រាប់គេឯងមិនចេះលាក់ការលើកមុខមាត់ឲ្យគ្រួសារ។ ដូចក្នុងច្បាប់ស្រីលើកឡើងថា**«ភ្លើងក្នុងមិនប្រុងប្រយ័ត្ន នាំមកបង្កាត់ឲ្យចេះឯក្រៅ។ អុចអាលបណ្ដាលឲ្យក្ដៅ ដាលដល់កូនចៅ អសោយអប្រិយ។»**

រូបតំណាង

៦. ភ្លេចគុណឪពុកម្ដាយ ៖ អកត្តញ្ញូជាមួយអ្នកមានគុណ មាត់ធំមាត់តូចដាក់គាត់ ធ្វើឲ្យគាត់ពិបាកចិត្ត ហើយពេលមានប្ដីមានកូនមិនបានតបស្នងសងគុណ បម្រើលោកឲ្យស្រួល។ បើអ្នកដើរគន្លងនេះមានន័យថាអ្នកប្រាសចាកពីភាពកត្តញ្ញូជាកូនស្រីហើយ ដែលដូចច្បាប់ស្រីថា**«ភ្លើងមួយនោះឲ្យរក្សា គឺគុណមាតា បិតាស្ងួនគ្រង ឲ្យនាងធ្វើដោយគន្លង ប្រណិប័តន៍កុំឆ្កង នឹងម្ដាយឪពុក។»**

នៅមានចំណុចជាច្រើនទៀតដែល កញ្ញា មិនបានលើកមក ប៉ុន្តែទោះជាយ៉ាងណាក៏ដោយក៏យើងគួរតែដឹងថាអ្វីល្អ អ្វីអាក្រក់ដែរ។

ចុចអាន៖ចង់ឲ្យព្រឹកឡើងជាថ្ងៃដ៏ល្អ និងមានសិរីសួស្ដី កុំភ្លេចធ្វើរឿង ៦ យ៉ាងនេះ

អត្ថបទ៖ ផេង ផលធិតា