នារីមានចរិតយ៉ាប់៦យ៉ាង ដែលបុរសភាគច្រើនទទួលយកមិនបាន

2017-09-22 07:43:35
ចំនួនមតិ 0 | ចំនួនចែករំលែក 0

អ្នកណាក៏ចង់ឲ្យមនុស្សដែលយើងស្រឡាញ់លង់ស្នេហ៍យើងវិញដែរមែនអត់? ហើយក៏គ្មានអ្នកណាដែលចង់ឲ្យគូស្នេហ៍របស់ខ្លួនបោះបង់ចោលដោយសារចរិតមិនល្អរបស់ខ្លួនឯងដែរ។ ដូច្នេះហើយថ្ងៃនេះ Kanha នឹងបង្ហាញពីចរិតអវិជ្ជមានចំនួន ៦របស់នារីៗដែលបុរសៗមិនចូលចិត្ត។ អ្នកណាមិនចង់ឲ្យគូស្នេហ៍របស់ខ្លួនរត់ចោលទេ អាចមកអានទាំងអស់គ្នា ក្រែងលោមានត្រូវចំណុចណា ស្រួលកែប្រែឲ្យបានទាន់ពេល៖

១. ធ្វើចរិតដូចចៅហ្វាយនាយ ពូកែត្រួតត្រានិងបញ្ជា

គេមានចៅហ្វាយម្នាក់ហើយនៅកន្លែងធ្វើការ ដូច្នេះសូមកុំធ្វើខ្លួនជាចៅហ្វាយទីពីររបស់គេអី។ គួរធ្វើខ្លួនឲ្យគេមានអារម្មណ៍ថាស្រណុកក្នុងចិត្តដែលមានយើងជាសង្សារ ជាជាងធ្វើឲ្យគេមានអារម្មណ៍ទើសទាល់។ គួរបណ្ដោយឲ្យគេបានគិត បានសម្រេចចិត្ត និងធ្វើអ្វីតាមរបៀបរបស់គេទៅចុះ ព្រោះវាអាចនឹងគ្មានផលល្អទេ បើគេមានអារម្មណ៍ថាដូចជាត្រូវសង្សាររបស់ខ្លួនឯងគ្រប់គ្រងរហូតលែងមានភាពម្ចាស់ការលើខ្លួនឯង។

២. មិនបើកចិត្តស្ដាប់បញ្ហារបស់អ្នកណា ក្រៅពីខ្លួនឯង

មនុស្សប្រុសភាគច្រើនចង់ឲ្យគូស្នេហ៍របស់ខ្លួនអាចដើរតួជាដៃគូគំនិត អាចប្រឹក្សា ឬបញ្ចេញអារម្មណ៍ទុក្ខព្រួយខ្លះ មិនមែនចូលចិត្តនិយាយតែរឿងខ្លួនឯង ហើយមិនស្ដាប់មិនខ្វល់ពីបញ្ហាអ្នកដទៃនោះទេ។ ទោះបីយើងមិនអាចជួយគេបាន តែយ៉ាងហោចណាក៏គួរធ្វើជាអ្នកស្ដាប់បញ្ហារបស់គេ ជួយនិយាយកំដរ លួងលោមចិត្ត ដើម្បីឲ្យគេមានអារម្មណ៍កក់ក្ដៅដោយមិនទូលរែកបញ្ហាតែម្នាក់ឯង។ ផ្ទុយទៅវិញបើយើងតែងសោះអង្គើយជាមួយបញ្ហារបស់គេ គេនឹងមានអារម្មណ៍ថាមានយើង ឬគ្មានយើង ក៏មិនមានអ្វីខុសគ្នាដែរ។

៣. ចូលចិត្តកុហក

ការកុហកជាសញ្ញានៃភាពមិនស្មោះត្រង់។ សាកល្បងគិតខ្លួនឯងទៅមើលថា យើងនឹងមានអារម្មណ៍យ៉ាងណាបើត្រូវនៅជាមួយមនុស្សដែលមិនមានស្មោះត្រង់ជាមួយយើង? ការកុហកអាចនឹងដោះស្រាយស្ថានការណ៍ខ្លះនៅពេលដំបូង ប៉ុន្តែបើញឹកញាប់ គេនឹងអស់ជំនឿមកលើអ្នក ហើយមិនបាច់ប្រាប់ក៏ប្រហែលអ្នកដឹងដែរ ថាអ្នកនឹងក្លាយជាអ្វីក្នុងខ្សែភ្នែករបស់គេ។

៤. មិនចេះនិយាយពាក្យសុំទោស

ឆ្នាំ២០១៧ហើយណា មនុស្សប្រុសស្រីគឺមានសិទ្ធិដូចគ្នា! កុំរវល់តែគិតថា “ទោះបីខ្ញុំខុសឬត្រូវ មនុស្សប្រុសត្រូវតែជាភាគីសុំទោសមុន”។ ការពោលពាក្យសុំទោសនៅពេលយើងធ្វើខុស មិនមែនជារឿងគួរឲ្យខ្មាសអៀនអីឡើយ ប៉ុន្តែវាបង្ហាញឲ្យឃើញពីការទទួលខុសត្រូវចំពោះកំហុសរបស់អ្នក ក៏ដូចជាចំពោះអារម្មណ៍របស់គេ រួមទាំងអារម្មណ៍ខ្លួនឯងដូចគ្នា។

៥. ពូកែជីកឫសជីកគល់រឿងចាស់

អតីតគឺអតីត បច្ចុប្បន្នគឺបច្ចុប្បន្ន។ មនុស្សយើងត្រូវដើរទៅមុខ មិនមែនដើរថយក្រោយទេ មែនអត់? ការជជីកសួរពីកំហុស ឬស្នេហាចាស់របស់គេ ក្រៅពីធ្វើឲ្យខ្លួនយើងមានអារម្មណ៍មិនល្អហើយ វាក៏ធ្វើឲ្យជីវិតគូយើងអាចមានភាពរកាំរកូសដែរ។ ម្យ៉ាងទៀតទោះបីជីកឫសជីកគល់យ៉ាងណាក៏មិនមានអ្វីប្រសើរឡើងដែរ ព្រោះគ្មានអ្នកអាចទាញពេលវេលាថយក្រោយទៅដោះស្រាយបញ្ហាក្នុងអតីតកាលបានទេ។

៦. គ្មានអនាម័យ

កុំថាតែមនុស្សប្រុសដែលមិនចូលចិត្ត ចំណុចនេះអ្នកណាៗក៏មិនចូលចិត្តដែរ! អ្នកណាទៅចង់បានសង្សារមិនចេះស្អាតនោះទេ។ មិនចេះស្អាតត្រង់នេះមិនមែននិយាយតែលើការរៀបចំរូបរាងខាងក្រៅដូចជាសំលៀកបំពាក់ ធ្វើមុខ ធ្វើសក់ តែមួយមុខនោះទេ តែវាក៏រួមបញ្ចូលទាំងទង្វើនានាក្នុងការរស់នៅរបស់យើងដែរ ដូចជាការមើលថែសម្អាតបន្ទប់គេង តុធ្វើការ និងរបស់របរប្រើប្រាស់ផ្សេងៗ ៕

ប្រភព៖ Spiceee ប្រែសម្រួល៖ ស្វាយ វ៉ាន់ថន