ជ្រុលចិត្តស្រលាញ់គេខ្លាំង តែគេវិញធ្វើហីៗ ស្រឡាញ់មិនចំស្រឡាញ់ គួរធ្វើយ៉ាងម៉េចល្អ?
- 2017-09-06 04:30:00
- ចំនួនមតិ 0 | ចំនួនចែករំលែក 0
ជ្រុលចិត្តស្រលាញ់គេខ្លាំង តែគេវិញធ្វើហីៗ ស្រឡាញ់មិនចំស្រឡាញ់ គួរធ្វើយ៉ាងម៉េចល្អ?
មនុស្សប្រុសមិនមែនដូចគ្នាទាំងអស់នោះទេ តែក៏នៅតែមានចំណុចដូចគ្នា នោះគឺការមិនរវល់ មិនសូវខ្វល់ខ្វាយពីមនុស្សដែលស្រឡាញ់គេ រហូតពេលខ្លះធ្វើឲ្យនាងដើរចេញក៏មាន។ បើសិនជាអ្នកកំពុងស្រឡាញ់ចំមនុស្សប្រុសបែបនេះ គួរតែសាកល្បងរៀនពីចំណុចខាងក្រោមនេះ ៖
១. បង្កើនភាពរឹងមាំ និងពេលវេលាឲ្យខ្លួនឯង
ចំណុចនេះមានន័យថាអ្នកត្រូវរៀនធ្វើចិត្តឲ្យរឹងមាំ ទូលាយ និងកុំព្យាយាមចូលខ្លួនទៅក្នុងជីវិតគាត់ច្រើនពេកអី។ ប្រើពេលដែលគាត់ទុកអ្នកចោលដើរចេញទៅក្រៅ ដើម្បីទទួលយកបទពិសោធនថ្មីៗ រាប់អានមិត្តឲ្យបានច្រើន ដើម្បីផ្ដល់ភាពរីករាយឲ្យខ្លួនឯងដូចគ្នា ព្រោះពេលខ្លះបើយើងកាន់តែចូលជិតគាត់នោះគាត់អាចកាន់តែបានចិត្ត កាន់តែធុញ។
**២. ធ្វើខ្លួនឲ្យអាថ៌កំបាំង**
មិនមែនឲ្យអ្នកលាក់ខ្លួនពីគាត់នោះទេ តែត្រូវចេះគ្រប់គ្រងលើសកម្មភាពខ្លួនឯង កុំបង្ហាញឲ្យគាត់ដឹងថាអ្នកកំពុងនៅឯណា ឬកំពុងធ្វើអ្វីច្រើនពេក ព្រោះពេលដែលគាត់លែងដឹងពីអ្នក នោះគាត់នឹងចាប់ផ្ដើមគិតពីអ្នកវិញក៏ថាបាន។ ដូច្នេះហើយត្រូវចេះទប់អារម្មណ៍ខ្លួនឯង ទោះបីអ្នកចង់ឲ្យគាត់ឃើញ គាត់ដឹងក៏ដោយក៏មិនត្រូវបង្ហាញគ្រប់ពេលគ្រប់វេលាដែរ។
៣. កុំបញ្ចេញអារម្មណ៍ដែលអ្នកមានចំពោះគាត់ឲ្យអស់ខ្លាំងពេក
ទោះអ្នកស្រឡាញ់គាត់ខ្លាំងប៉ុណ្ណាក៏ដោយក៏ត្រូវចេះទប់ចិត្តដែរ មិនត្រូវបញ្ចេញឲ្យអស់ឡើយ។ គួរធ្វើខ្លួនធម្មតា ហើយរក្សាគម្លាតរវាងអ្នក និងគាត់ ហើយធ្វើចិត្តឲ្យបាននឹងធឹង ដូចគ្មានរឿងអ្វី។ ទោះអ្នកចង់ប្រាប់ថានឹកគាត់ ស្រលាញ់គាត់ បារម្ភពីគាត់ គ្រាន់តែបញ្ចេញតិចតួចទៅបានហើយ កុំធ្វើតាមអារម្មណ៍ពេក ព្រោះបែបនេះ អាចឲ្យគាត់ងាកមកស្រឡាញ់ បារម្ភពីអ្នកខ្លាំងជាងមុនក៏ថាបាន។
៤. រៀបចំខ្លួនឲ្យបានស្អាតបាត
ទោះមានគាត់ ឬអត់គាត់ក៏អ្នកត្រូវតែចេះរៀបចំខ្លួនឲ្យបានស្អាតដែរ ព្រោះមនុស្សស្រីត្រូវការចំណុចនេះខ្លាំងណាស់។ បង្កើនទំនុកចិត្តជាមួយភាពស្រស់ស្អាតរបស់អ្នក នោះអ្នកនឹងមានអារម្មណ៍ថាខ្លួនឯងមានតម្លៃ ហើយ គាត់ក៏គួរតែឲ្យតម្លៃអ្នកខ្ពស់ជាងនេះមិនមែនហីៗដាក់អ្នកបែបហ្នឹងទេ។
៥. ផ្ញើសារ Good morning ទៅគាត់រាល់ព្រឹក
ដឹងអត់ថាហេតុអីត្រូវធ្វើបែបនេះ? Good morning មួយឃ្លាមានឥទ្ធិពលលើចិត្តមនុស្សណាស់ ទោះបីគាត់ចង់ឃើញ ឬមិនចង់ឃើញក៏ដោយ អ្នកគួរតែផ្ញើទៅដោយមិនបាច់និយាយអីច្រើនទេ ហើយបើគាត់តបវិញ គ្រាន់តែមើលទៅបានហើយមិនបាច់និយាយអីបន្តនោះទេបើគាត់មិនបានសួរអីទៀត។ យូរៗទៅគាត់នឹងយល់ពីអត្ថន័យ និងតម្លៃនៃការស្រឡាញ់របស់អ្នក។
៦. ធ្វើខ្លួនឲ្យរីករាយ និងមានស្នាមញញឹមស្អាតបំផុត
នៅពេលដែលអ្នកកាន់តែមានតម្លៃនោះគាត់នឹងចាប់ផ្ដើមមើលឃើញពីតម្លៃអ្នក មានន័យថាគ្មានគាត់ក៏អ្នកនៅតែសប្បាយចិត្ត និងមានស្នាមញញឹមដ៏ស្រស់ស្អាតមួយដែលមនុស្សប្រុសជាច្រើនប្រាថ្នាចង់ឃើញ។ បែបនេះហើយទើបអ្នកត្រូវតែធ្វើខ្លួនឯងឲ្យរីករាយ ទើបមានថាមពលជាជាងអង្គុយធ្វើខ្លួនឲ្យគេអាណិត។
ការពិតគ្មានអ្នកណាអាចជួយយើងបាននោះទេ ស្រឡាញ់មនុស្សម្នាក់គ្មានហេតុផលណាមួយឡើយ ដូច្នេះបើស្រឡាញ់ហើយត្រូវចេះតស៊ូដើម្បីបានរបស់ដែលយើងចង់បាន តែបើអ្នកអស់ការតស៊ូហើយគួរតែលែងវាឲ្យទៅចុះ៕
ចុចអាន៖កាន់តែឈ្លោះគ្នា ស្នេហារវាងមនុស្សពីរនាក់នឹងកាន់តែខិតជិតផ្លូវបំបែក