កត្តា៦យ៉ាងធ្វើឲ្យនារីមិនមករដូវ និងរដូវមិនទៀង

2017-09-05 06:02:58
ចំនួនមតិ 0 | ចំនួនចែករំលែក 0

មាននារីមួយចំនួនតែងតែជួបបញ្ហារដូវមិនទៀង និង ការខកខានក្នុងការមករដូវ ដូច្នេះនេះគឺជាហេតុផលមួយក្នុងចំណោមហេតុផលជាច្រើន ដែលកើតមានញឹកញាប់បំផុតសម្រាប់ការខកខានក្នុងការមករដូវរបស់អ្នក៖

១. ភាពតានតឹង

អ្នកដឹងរួចហើយថាភាពតានតឹងអាចមានផលប៉ះពាល់មិនល្អដូចជាឈឺក្បាល ការឡើងទម្ងន់ ស្បែកឡើងមុន និងបញ្ហាស្បែកផ្សេងៗទៀតហើយវាក៏អាចប៉ះពាល់ដល់ការមករដូវរបស់អ្នកដែរ។ នៅពេលអ្នកស្ថិតនៅក្រោមភាពតានតឹងខាងរាងកាយ ឬ អារម្មណ៍ ពេលនោះ រាងកាយរបស់អ្នកនឹងបង្កើតអ័រម៉ូនស្ត្រេស អ័រម៉ូន adrenaline និង cortisol ដូច្នេះវាអាចធ្វើឲ្យអ្នកខកខានក្នុងការមករដូវ។

២. ឈឺ ឬ ប្រព័ន្ធភាពស៊ាំថយចុះ

គិតអំពីពេលវេលាដែលអ្នកគួរតែបញ្ចេញពងអូវុល។ ប្រសិនបើអ្នកឈឺបើទោះជាមានជំងឺផ្ដាសាយធម្មតា ឬ ជំងឺដែលធ្ងន់ធ្ងរក៏ដោយ ក៏ការបញ្ចេញអូវ៉ុលអាចត្រូវបានពន្យារពេលឬមិនបានកើតឡើងតែម្ដង នោះមានន័យថារដូវរបស់អ្នកនឹងយឺតឬមិនមានសោះ។ បើបើអាចមានសុខភាពល្អ រឹងមាំឡើងវិញនោះរដូវនឹងត្រឡប់មកដូចដើម។

៣. ទម្ងន់

ទម្ងន់របស់អ្នកអាចប៉ះពាល់ដល់អ៊ីប៉ូតាឡាមស្យូមនៅក្នុងក្រពេញខួរក្បាលដែលទទួលខុសត្រូវក្នុងការធ្វើនិយតកម្មនៃដំណើរការផ្សេងៗនៅក្នុងរាងកាយរួមទាំងវដ្តរដូវរបស់អ្នកទៀតផង។ ការស្រកទម្ងន់ខ្លាំង ឬ ក៏ទទួលអាហារមិនបានត្រឹមត្រូវ នោះរាងកាយរបស់អ្នកនឹងមិនបញ្ចេញអរម៉ូនអ៊ឹស្ត្រូសែនដែលត្រូវការដើម្បីបង្កើតស្រទាប់នៃស្បូននោះទេ។ ម្យ៉ាងវិញទៀតការលើសទម្ងន់ ឬ ទទួលបានច្រើនក្នុងរយៈពេលខ្លីក៏អាចធ្វើឱ្យរាងកាយរបស់អ្នកបង្កើតអ័រម៉ូនអេស្ត្រូសែនច្រើនពេក។ លើសទម្ងន់អាចបណ្ដាលឱ្យអ្នកមិនបញ្ចេញពងអូវុលជាច្រើនខែ ឬ បណ្តាលឲ្យស្រទាប់ខាងក្នុងរីកធំ និង ក្លាយទៅជាគ្មានស្ថិរភាពដែលនាំឱ្យមានរដូវមិនប្រក្រតី។

៤. ប្រើកម្លាំង ឬ ហាត់ប្រាណហួសកម្រិត

ជាការពិតណាស់ការហាត់ប្រាណគឺល្អសម្រាប់អ្នក។ ទោះបីជាយ៉ាងណាក៏ដោយនៅពេលដែលអ្នកហាត់ហួសប្រមាណ រាងកាយរបស់អ្នកនឹងមិនផលិតអ័រម៉ូនអឺរ៉ូគ្រប់គ្រាន់ដើម្បីបញ្ចប់វដ្តរដូវឡើយ។ ស្ត្រីមួយចំនួនដូចជាអ្នករាំរបាំបាឡេ អ្នកហាត់ប្រាណ និង អត្តពលិក ដែលមានជំនាញវិជ្ជាជីវៈ គឺមានហានិភ័យខ្ពស់នៃការអស់រដូវ (ខកខានក្នុងការមករដូវបីខែ ឬ ច្រើនខែជាប់ៗគ្នា) ។ ម្យ៉ាងទៀតការធ្វើការហួសកម្លាំងដោយមិនទទួលយកកាឡូរីគ្រប់គ្រាន់អាចបណ្ដាលឱ្យមានការរំខានដូចគ្នា។

៥. ការផ្លាស់ប្ដូរពេលវេលា

ជឿឬមិនជឿ ការផ្លាស់ប្តូរពេលវេលាដូចជាការធ្វើការវេនយប់ជំនួសឱ្យថ្ងៃ ឬ ធ្វើដំណើរប្រទេសទៅប្រទេសក្រៅដែលមានពេលវេលាមិនដូចយើងអាចធ្វើឲ្យរាងកាយរបស់អ្នកមានការប៉ះពាល់ទៅលើការធ្វើនិយតកម្មអ័រម៉ូន (រួមទាំងទទួលខុសត្រូវសម្រាប់រដូវរបស់អ្នកទៀតផង) ។ ដូច្នេះគួរតែកុំព្យាយាមផ្លាស់ប្ដូរអី បើសិនជាវាស្ថិតក្នុងពេលវេលាធម្មតានោះរដូវអ្នកនឹងត្រឡប់មកវិញ។

៦. ការមានផ្ទៃពោះ

ពេលខ្លះការខកខានក្នុងការមករដូវគឺដោយសារតែរោគសញ្ញាដំបូងនៃការមានផ្ទៃពោះ ដូចជាការឈឺក្បាល ការហើមពោះ និង ការស្រគាលនៃសុដន់ដូចពេលដែលអ្នកមករដូវអីចឹង។ ប្រសិនបើរដូវរបស់អ្នកយឺតយ៉ាវហើយអ្នកបានរួមភេទដោយមិនបានការពារចូរធ្វើតេស្តរកមើលការមានផ្ទៃពោះនៅផ្ទះសិនទៅ ឬ ក៏ដើម្បីចង់ឲ្យកាន់តែច្បាស់អ្នកអាចទៅពិគ្រោះនិងធ្វើតេស្តនៅមន្ទីពេទ្យក៏បាន។

នៅមានហេតុផលជាច្រើនទៀត ដូច្នេះអ្នកគួរតែយកចិត្តទុកដាក់ពីរឿងនេះឲ្យមែនទែន៕

ចុចអាន៖

ប្រភព៖ whattoexpect ប្រែសម្រួល៖ ផេង ផលធិតា