បាបកម្មមានពិតមែន សម្រាប់មនុស្សប្រុសដែលធ្លាប់ធ្វើបាបចិត្តនារីៗ
- 2017-08-18 04:44:06
- ចំនួនមតិ 0 | ចំនួនចែករំលែក 0
បាបកម្មមានពិតមែន សម្រាប់មនុស្សប្រុសដែលធ្លាប់ធ្វើបាបចិត្តនារីៗ
ជូនចំពោះមនុស្សប្រុសដែលចូលចិត្តយកមនុស្សស្រីមកលេងសើច។ ជឿអត់ថាបាបកម្មមានមែន? ហើយវាក៏មិនចាំជាតិក្រោយដែរ មិនយូរទេអ្នកនឹងទទួលបាបនោះដោយខ្លួនឯង។ ខ្ញុំមានមិត្តភក្តិប្រុសម្នាក់ អាចនិយាយថាគេសង្ហារ ម្យ៉ាងទៀតអ្វីដែលពិសេសគឺគេមានចរិតព្រានតែម្ដង មនុស្សស្រីមិនតិចនោះទេដែលតែងតែលង់ស្រឡាញ់គេ។ បើគេចូលចិត្តគេក៏ទាក់ទងជាមួយមនុស្សស្រីនោះ ប៉ុន្តែអ្វីដែលមិនអាចកែប្រែបានគឺគេមិនដែលស្រឡាញ់ស្រីណាបានយូរនោះទេ យ៉ាងច្រើនត្រឹម ៣ ខែ គេក៏ដើរចេញ។
អ្វីដែលខ្ញុំខ្លោចចិត្តជាងគេនោះ គឺមនុស្សស្រីទាំងនោះសុទ្ធតែគ្មានខុសអី ហើយត្រូវមកឈឺចាប់ដោយសារគេ។ ខ្ញុំចាំបានថាពេលមួយគេបានទាក់ទងចំមិត្តភក្តិរបស់ខ្ញុំម្នាក់ នាងពិតជាស្រឡាញ់គេខ្លាំងណាស់ រហូតអាចនិយាយបានថាភ្លេចស្រឡាញ់ខ្លួនឯង។ កំឡុងពេលទាក់ទងគ្នា ភាគតិចណាស់ដែលខ្ញុំឃើញនាងសប្បាយចិត្ត សឹងតែរាល់អាទិត្យនាងតែងតែមកផ្អែកស្មាខ្ញុំហើយស្រក់ទឹកភ្នែក។
នាងនិយាយថា«ហត់ណាស់ តើហេតុអីបានជាគេធ្វើបែបនេះ ខ្ញុំមិនយល់សោះ សុខៗក៏លែងនិយាយ លែងតបអីទាំងអស់ ហេតុផលមួយក៏គ្មាន រួចចេញទាំងបែបនេះ។» ខ្ញុំពិតជាអាណិតនាងណាស់ ហេតុអីគេយកមនុស្សស្រីដ៏ស្លូតបូតម្នាក់មកធ្វើបាបផ្លូវចិត្តយ៉ាងនេះ។ ជាង ១ ឆ្នាំខ្ញុំតែងតែនៅជួយជាយោបល់ពេលនាងឈឺចាប់ ហើយជាងមួយឆ្នាំនេះនាងនៅតែស្រឡាញ់គេ។
ប្រហែល ៣ ឆ្នាំក្រោយមកប្រុសម្នាក់នោះក៏ជាប់ទាក់ទងស្រឡាញ់ជាមួយមនុស្សស្រីម្នាក់ទៀត តែម្ដងនេះ គឺគេជាអ្នកយំមិនមែនម្នាក់ស្រីនោះទេ។ នេះមែនទេហៅថាជាបាបកម្ម ដែលគេធ្លាប់ធ្វើបាបចិត្តមនុស្សស្រីជាច្រើនពីមុនមកនោះ? គេត្រូវមា្នក់ស្រីនោះ ទុកចោល មិនខ្វាយខ្វល់ លួចក្បត់ ធ្វើបាបចិត្ត ហើយធ្វើឲ្យយំម្ដងហើយម្ដងទៀត។ មនុស្សគេធ្លាប់តែអស្ចារ្យបែរជាធ្លាក់ខ្លួនតាមទ្រ តាមយំអង្វរម្នាក់ស្រីនោះដូចឆ្កែរត់តាមម្ចាស់ទៅវិញ ចុងក្រោយម្នាក់ស្រីនោះក៏បែកពីគេទៅយកអ្នកផ្សេងទៀត។ ខ្ញុំក៏ចាប់ផ្ដើមឃើញគេទន់ខ្សោយ អស់តម្លៃ ហើយក៏គិតថាគេពិុតជាសមទទួលបានបាបកម្មនេះខ្លាំងណាស់ គេនឹងយល់ថាអារម្មណ៍ធ្លាប់ផ្ដល់ឲ្យមនុស្សស្រីស្រឡាញ់គេពីមុន វាមានរសជាតិយ៉ាងណា។
ត្រូវចាំថាបាបកម្មពិតជាមានមែន អ្នកធ្វើអ្វី អ្នកនឹងទទួលបាននោះ ហើយមិនចាំបាច់ជាតិក្រោយនោះទេ គឺជាតិហ្នឹងតែម្ដង៕
ចុចអាន៖ហេតុផល ៦ យ៉ាងបង្ហាញថា ស្រីៗមានសង្សាររូបសង្ហា មិនប្រាកដថាមានសំណាង