បទពិសោធដ៏ឈឺចាប់ផ្សេងគ្នារបស់មនុស្សស្រី ធ្លាប់បាត់បង់ស្នេហា

2017-08-16 03:11:44
ចំនួនមតិ 0 | ចំនួនចែករំលែក 0

គ្មានមនុស្សស្រីណាប្រាថ្នាចង់ឲ្យស្នេហាបែកបាក់នោះទេ ប៉ុន្តែពេលខ្លះរឿងដែលបម្រុងនឹងកើតហើយទោះជាព្យាយាមយ៉ាងណាក៏មិនអាចកែប្រែបានដែរ។ សម្រាប់អ្នកដែលធ្លាប់ជួបរឿងនេះប្រាកដជាយល់អារម្មណ៍នេះច្បាស់ណាស់ ហើយខាងក្រោមនេះជាបទពិសោធន៍មួយចំនួនដែលមនុស្សស្រីបានឆ្លងកាត់នៅពេលបាត់បង់ស្នេហា ៖

នីកា ៖ « ខ្ញុំចាំថាកាលហ្នឹងយើងអត់មានបានឈ្លោះគ្នា ឬ ក៏មានរឿងអីអត់ល្អជាមួយគ្នាទេ គឺធម្មតាទាំងអស់ ប៉ុន្តែសុខៗគាត់ក៏អត់ខ្វល់ អត់សួរនាំ Call ក៏អត់ ហើយពេលខ្ញុំ Chat ទៅគាត់ក៏អត់តបដែរ។ ដល់ពេលអីចឹងទៅខ្ញុំក៏អត់ដឹងធ្វើម៉េច មានតែតាមហ្នឹង។ ដំបូងគឺពិបាកធ្វើចិត្តខ្លាំង និយាយទៅគឺសឹងតែរាល់យប់ដែលខ្ញុំយំនឹកគាត់ ប៉ុន្តែពេលវេលាគឺល្អបំផុតក្នុងការកាត់ចិត្ត។»

លីនីន ៖ « ពួកយើងបែកគ្នាដោយសារគាត់លួចមានអ្នកថ្មី ហើយគាត់ចង់បានម្ដងទាំងពីរ តែខ្ញុំធ្វើអត់បាន រួចក៏ដើរចេញខ្លួនឯង។ ពេលហ្នឹងខ្ញុំខូចចិត្តខ្លាំង សឹងតែមិត្តភក្តិ ភ័យថាខ្ញុំគិតអីផ្ដេសផ្ដាសទៀតផង ប៉ុន្តែពេលវេលាកាន់តែយូរខ្ញុំកាន់តែគិតយល់ជាងមុន បន្ទាប់មកខ្ញុំក៏តាំងចិត្តថាធ្វើជីវិតខ្លួនឯងឲ្យល្អជាងមុន ហើយមកដល់ពេលនេះ គឺជិត ៣ ឆ្នាំហើយដែលពួកយើងបែកគ្នា។»

គីមលី ៖ « ខ្ញុំឈឺចាប់ជាងគេគឺពេលដែលគាត់ប្រាប់ខ្ញុំថា គាត់នៅស្រឡាញ់សង្សារចាស់គាត់ ហើយគាត់អរគុណខ្ញុំដែលកំដរគាត់។ ឭគាត់និយាយអីចឹងហើយ ឲ្យខ្ញុំតស៊ូម៉េចទៀតទៅ មានតែដើរចេញទោះខ្ញុំស្រឡាញ់គាត់ខ្លាំងប៉ុណ្ណាក៏ដោយ។ មកដល់ឥលូវខ្ញុំនៅតែស្រឡាញ់គាត់ តែខ្ញុំជឿថាមិនយូរទេខ្ញុំនឹងធ្វើចិត្តបានព្រោះមនុស្សក៏ចេះយំហត់ដែរ ខ្ញុំជឿថាពេលខ្ញុំហត់ខ្ញុំនឹងឈប់ខ្លួនឯង។»

រ៉ានីត ៖ « និយាយទៅគាត់អត់ដែលស្រឡាញ់ខ្ញុំផង គាត់ទុកខ្ញុំចោលរហូត ពេលខ្ញុំអត់សប្បាយចិត្ត ពេលខ្ញុំត្រូវការគាត់ គឺអត់មានមុខគាត់ទេ។ សួរថាមនុស្សស្រីប៉ុន្មាននាក់អាចទ្រាំបាន? គាត់ចំណាយពេលសប្បាយជាមួយអ្នកផ្សេង ច្រើនជាងនិយាយជាមួយខ្ញុំទៀត។ បែបហ្នឹងហើយខ្ញុំក៏ដកខ្លួនចេញពីគាត់ទៅ ព្រោះគិតថានៅក៏អត់ន័យ អ្វីដែលខ្ញុំលះបង់ដូចខ្យល់អីចឹងគេអត់ដែលមើលឃើញឡើយ។»

ការពិតនៅមានរឿងជាច្រើនទៀតដែលធ្វើឲ្យស្នេហាបែកបាក់ បើយើងដឹងថាគ្មានន័យអីហើយ ដោះលែងវាក៏ល្អដែរ ព្រោះកាន់តែឱបក្រសោប អ្នកកាន់តែឈឺចាប់៕

ចុចអាន៖មនុស្សបែកគ្នាហើយ ហេតុអីមិនអាចរាប់អានគ្នាវិញបាន?

អត្ថបទ៖ ផេង ផលធិតា