កុំភ្លេចខ្លួន! ជំងឺរលាកថ្លើម ឆ្លងតាមការរស់នៅដ៏សាមញ្ញប្រចាំថ្ងៃដែលអ្នកមិនចាប់អារម្មណ៍

2017-07-28 05:49:27
ចំនួនមតិ 0 | ចំនួនចែករំលែក 0

បើយោងតាមអង្គការសុខភាពពិភពលោក ៧០% នៃប្រជាជនដែរមានជំងឺរលាកថ្លើមភាគច្រើនមាននៅក្នុងប្រទេសមួយចំនួនដូចជា កម្ពុជា ហ្វីលីពីន ថៃ នេប៉ាល់ ម៉ូរ៉ូកូ និងប៉េរូ។ គ្រាន់តែនៅចុងឆ្នាំ 2015 មានមនុស្សប្រមាណ 325 លាននាក់មានជំងឺរលាកថ្លើមរ៉ាំរ៉ៃរួចទៅហើយ។រហូតមកដល់ពេលនេះមានមនុស្ស 257 លាននាក់ កំពុងរស់នៅជាមួយនឹងជំងឺរលាកថ្លើម B និង 71 លាននាក់ទៀតមានជំងឺរលាកថ្លើម C ។

នៅពេលដែរថ្លើមឈានទៅដល់ការរលាក ពេលនោះអ្នកជំងឺអាចមាននូវរោគសញ្ញាមួយចំនួនដូចជា រមាស់ស្បែក ខាន់លឿង ឈឺពោះ ប៉ោងពោះ មិនឃ្លានបាយ និងហើមជើងជាដើម។ ទោះបីជាយ៉ាងណាក៏ដោយ ភាគច្រើននៃអ្នកជំងឺមិនមានរោគសញ្ញាអ្វីទាំងអស់រហូតទាល់តែការវិវត្តទៅជាជំងឺថ្លើមរ៉ាំរ៉ៃ។

ជំងឺរលាកថ្លើមក៏អាចបណ្ដាលមកពី ស្រា ថ្នាំ ជាតិពុល បាក់តេរី ប៉ារ៉ាស៊ីតផងដែរ តែជួនការទៀត អាចបណ្តាលមកពីប្រព័ន្ធការពាររាងកាយខ្លួនឯងបានវាយប្រហារទៅលើថ្លើមខ្លួនឯង ដែរបញ្ហានេះជាករណីកំរមួយ។ ជំងឺរលាកថ្លើមប្រភេទ A និង E អាចចម្លងមកអ្នកតាមរយៈទឹកឬចំណីអាហារដែរមានផ្ទុកនូវមេរោគ។ ចំណែកឯមេរោគរលាកថ្លើម B និង C អាចចម្លងតាមរយៈ ម្ជុលស៊ីរាំង ការបញ្ចូលឈាម ឬការរួមភេទ។ ចំណែកឯមេរោគរលាកថ្លើម D វិញឆ្លងតាមរយៈឈាមដូចគ្នា តែវាមិនមានសកម្មភាពអ្វីទេ លុះត្រាតែអ្នកមានផ្ទុកនូវមេរោគរលាកថ្លើម B មួយទៀតទើបអាចបង្កជាបញ្ហាធ្ងន់ធ្ងរដល់អ្នកបាន។

ប៉ុន្តែកុំបារម្ភអី មានមធ្យោបាយងាយៗដើម្បីទប់ស្កាត់ជំងឺរលាកថ្លើមបាន៖

ការផ្លាស់ប្តូររបៀបរស់នៅ

ប្រសើនបើអ្នកមានផ្ទុកនូវមេរោគរលាកថ្លើមរួចហើយ សូមរក្សាសុខភាពអោយល្អ។ ចៀសវាងទទួលទានជាតិអាល់កុល និងថ្នាំមួយចំនួន ដែលអាចប៉ះពាល់ដល់ថ្លើម។ ទទួលទានរបបអាហារដែលផ្តល់នូវជីវជាតិ និងហាត់ប្រាណជាប្រចាំ។

ចាក់វ៉ាក់សាំង

ប្រសិនបើអ្នកមិនមានផ្ទុកនូវមេរោគទេ សូមស្វែងរកវ៉ាក់សាំងសម្រាប់ជំងឺរលាកថ្លើមប្រភេទ B ដែលមានប្រសិទ្ធភាពការពារបានរហូតទៅដល់ 95 ភាគរយក្នុងការបង្ការការឆ្លងមេមេរោគ។ សូមសាកសួរអ្នកផ្តល់សេវាថែទាំសុខភាពដែលនៅជិតលោកអ្នកបំផុត ដើម្បីទទួលបានដំបូន្មានអំពីថ្នាំបង្ការ។ ប្រសិនបើអ្នកបានឆ្លងមេរោគរលាកថ្លើមរួចហើយ សូមទៅពិភាក្សាជាមួយនឹងវេជ្ជបណ្ឌិត ដើម្បីទទួលបាននូវសេវាព្យាបាលដ៏ត្រឹមត្រូវមួយ។

សូមមានការប្រុងប្រយ័ត្ននូវបញ្ហាដូចខាងក្រោម៖

ត្រូវការពារខ្លួនអ្នកជានិច្ចជាពិសេសពាក់ស្រោមអនាម័យពេលរួមភេទ ដើម្បីការពារការឆ្លងដោយមិនដឹងខ្លួន។ ដូចគ្នានេះដែរជៀសវាងការប្រើម្ជុលស៊ីរាំងរួមគ្នា ជាពិសេសសម្រាប់អ្នកប្រើប្រាស់គ្រឿងញៀន។

អត្ថបទ៖ DKSH